Апта ортасында университеттің Жастар ресурстық орталығында түлектерге салтанатты түрде диплом табысталды. Жиынға Түркістан облысы мен Шымкент қаласының құрметті азаматтары, зиялы қауым өкілдері бастаған қонақтар қатысты. Салтанатты кеште ҚР Ұлттық ғылым академиясының академигі, педагогика ғылымдарының докторы, профессор Оңалбай Аяшев мамандық иесі атанып, жаңа өмірге қадам басқалы тұрған бітірушілерге ақ жол тіледі.
– Биыл Тәшенев университетінің құрылғанына 25 жыл толып отыр. Біз қазір әлемнің дамыған Ұлыбритания, Бельгия, Греция, Израиль және Солтүстік Македония секілді мемлекеттерінде орналасқан озық оқу орындарымен тығыз байланыс орнатып, «қос дипломдық» бағдарлама түзудеміз. Бұйыртса, студенттеріміздің бір мезгілде екі бірдей дипломға ие болуына зор мүмкіндік туғалы тұр. Көп тіл білсеңіздер, сіздер үшін барлық мемлекеттің есігі ашық болады. Осыны ұмытпаңыздар. Бүгінгі маман иелеріне жолдары ашық болып, алған білімдерінің жемісін көруді тілейміз, – деді Оңалбай Аяшев.
Сондай-ақ, Түркістан облыстық мәслихатының хатшысы Нұралы Әбішов оқу орнында студенттерге білім берумен қатар ғылыми және қоғамдық жұмыстарға белсене араласып жүрген профессор-оқытушыларды Алғыс хатпен марапаттады. Марапатталушылардың қатарында университеттің оқу ісі жөніндегі проректоры П. Байнеева мен оқу орнының қалыптасуына үлес қосып жүрген ұстаздар да бар.
-Биыл университетті мың жарымға жуық, оның ішінде күндізгі бөлімді 863 түлек бітірді. Біз үшін әр шәкірттің өмірден өз орнын тауып, сапалы маман атануы өте маңызды, – деді университет ректоры Қанат Байболов.
Болашаққа жолдама алған 863 түлектің 25-і қызыл диплом иегері. Салтанатты жиында осынау үздік бітірушілерге диплом беріліп қана қоймай, басшылық тарапынан алғыс хат та тапсырылды. Түлектердің көпшілігінің университет қабырғасында магистратураны жалғастырмақ ойлары бар екен. Ол үшін оқу орнында бар жағдай жасалынған.
Жыл сайын университетті таңдайтын түлектер саны да артып келеді. Оқу орны 2023-2024 оқу жылына талапкерлерге есігін айқара ашып, қабылдау комиссиясының жұмысы басталып та кетті. Қабылдау комиссиясы жұмысының салтанатты ашылу рәсіміне қатысқан университет ректоры Қанат Байболов жаңаша бағытта білім беріп жүрген оқу орнын таңдаған барша талапкерлерге сәттілік тіледі.
Қоғам қайраткері, қаламызға белгілі азамат Созақбай Әбдіқұлов та өз немересінің осы оқу орнында оқуға ниет білдіріп жатқанын айтып, болашақ студенттерге ақ жол тілеп, осында білім алып, мамандық иесі болған азаматтардың еліміздің әлеуметтік-экономикалық ахуалының өркендеуіне үлес қосатынына сенім білдірді.
Университтетте 5000 шәкірт бар. Биыл 3000-ға жуық студент қабылдамақ. Сонымен қатар, жетім және мүмкіндігі шектеулі балалар үшін жеңілдіктер қарастырылған. -Комиссия құрамына факультеттердің арнайы мамандары, тәжірибелі оқытушылар және декан орынбасарлары енгізілген. Олар кәсіби бағыт-бағдар, кеңес беру және бакалавр, магистратура бойынша түсіндіру жұмыстарын жүргізеді. Комиссия мүшелері талапкерлерге онлайн және офлайн форматта сапалы әрі жедел қызмет көрсетеді. Қабылдау комиссиясының алғашқы күнінде ҰБТ қорытындысымен шекті балл жинаған 7 талапкер біздің университетімізді таңдап, құжатын өткізді. Комиссия жұмысын бастаған алғашқы сәттерден-ақ талапкердің бізді таңдап құжат тапсыруы біз үшін үлкен қуаныш, мәртебе, – деді университеттің әлеуметтік және тәрбие істері жөніндегі проректоры Ғалымжан Битұрсын.
Құжат тапсырған талапкердің бірі – Шымкент қаласындағы №90 мектебінің түлегі Олжас Аязбай қаламыздағы бірқатар оқу орнын саралап, таңдау Тәшенев университетіне түскенін қуанышпен жеткізді. Олжасты оқу орнының білім беру бағдарламалары, студенттерге жасалған жағдайы қызықтырыпты.
Оқуға қабылдануға үмітті 7 талапкерге университеттің директорлар кеңесінің төрағасы Оңалбай Аяшевтің атынан Алғыс хат табыс етілді.
Талапкерлер оқу ордасындағы мамандықтар туралы толық ақпаратты tashenev.edu.kz сайтынан таба алады. Сондай-ақ ең қажетті әрі маңызды ақпараттар универсиеттің ресми сайты мен әлеуметтік желілердегі парақшаларында күнделікті жарияланып отырады.
Айта кетейік, Тәшенов университеті – көпсалалы жоғары оқу орны. Бүгінде университет 34 білім беру бағдарламасы бойынша бакалавр, 6 білім беру бағдарламасы бойынша магистратура бағытында елімізге аса қажетті мамандар дайындайды.
Дайындаған
Ырысты ҮСЕН
