Жол бойында полицей тұр...

Среда, 18 Ноябрь 2020 04:12

 DSC2551

Шымкентте көше қиылысындағы көлік кептелісін реттеген жол сақшысының әрекеті жүргізушілерді дән риза етті. Іле-шала әлеуметтік желіде бағдаршамы істен шыққан жолдың қақ ортасына тұрып, көлік қозғалысын қалыпқа түсірген полицей туралы видео лезде тарап кетті. Антына адал патрульдік полиция полкі қызметкерінің бұл ісі көпшілікті сүйсіндірмей қоймады. Оқиғаның әлқисасына оралсақ...

12 қараша. Таңғы сағат онның шамасы. Шымкент қаласының Ұ.Арғынбеков пен С.Бәйтереков көшелері көлікке лық толы. Жолдың бір бағытындағы көліктер қозғалғанда, екінші бетіндегі жүргізушілер оған жол беретін әдеттегі тәртібінен жаңылғандай... Кептелістің «көкесі» көліктерді ығы-жығы еткен. Өйткені қос көшенің қиылысындағы бағдаршам жұмыс істемей тұр.
Шымкент қалалық полиция департаменті жергілікті полиция басқармасы патрульдік полиция полкінің қызметкері Алдаберген Мылтықбайдың түнгі кезекшіліктен шыққан беті еді. Үйіне қайтып бара жатқан оны жолдағы мына жағдай бейжай қалдырған жоқ. Ұйқысы шала болса да жол сақшысы ұзын-сонар кезекті реттеуге әп-сәтте кірісіп кетті. Ауа райының қолайсыз, жауын-шашынды болғандығына қарамастан темір тұлпар тізгіндегендерді тәртіпке шақырып, оңға, солға бағыттап тұрды. Көшедегі көлік қозғалысына жауапты әріптесі келгенше орнынан тапжылмай қауіпсіздікті қамтамасыз етті. Осыдан кейін ғана кептелген көлік ағыны қалыпқа түсті. Алайда Алдаберген Керімбайұлы әлеуметтік желідегі өзі туралы мақтау сөздерге ыңғайсызданып: «Қоғамдық тәртіпті сақтау, жол ережесін қадағалау полиция қызметкерлерінің міндеті. Менің орнымда болса, басқа жігіттер де солай жасар еді. Мен үшін басты парыз – қызметке адалдық», - дейді.
Иә, жыл он екі ай аптап ыстықта да, жауында, қарлы, боранды қыста да көшеде тұрып, жол қозғалысын қадағалау оңай емес. Жыл өткен сайын аумағы ұлғайып келе жатқан мегаполисте автомашина саны да арта түсуде. Жол сақшылары қадағалап тұрмаса, ерсілі-қарсылы ағылған көлік нөпірі кезінде түрлі келеңсіз оқиғалар орын алып жатады. Жүргізушілердің тәртібі мен білігі де әртүрлі...
Ал Алдаберген Мылтықбайдың мамандығына махаббаты, антына адалдығы өзгелерге үлгі. Патрульдік полиция полкінің 12-рота инспекторы, полиция аға лейтенанты ішкі істер органдарында сегіз жылдан бері еңбек етіп келеді. Мінсіз қызметі үшін бірнеше мәрте басшы құрамның марапатын иеленіп, алғысына бөленді. Қызмет бабынан тыс уақытта да оның жол үстіндегі сауысқандай сақ, қырандай қырағылық танытқан кезекті әрекеті елеуге тұрарлық.
Анығында погон таққан полицейлердің арасында Алдаберген Керімбайұлы сынды өз жұмысына адал қызметкерлер аз емес. Бәлкім жол сақшыларының күнделікті бейнетті де, беймаза қызметі елене бермейтін де шығар. Бірақ күндіз-түні тіршілік тынысы тоқтамайтын жол үстінде олардың қырағы қызметі арқасында жол-көлік тәртібі өз ретін тауып жататыны анық.

 

76 main

Елімізде коронавирус індеті бойынша эпидемиологиялық ахуал тұрақталғанымен, қауіп басым. Ковидтің екінші толқыны қайта бас көтере бастағаны алаңдатпай тұрған жоқ. Вирустық инфекциялар, тұмау, маусымдық аурулар басталған кезде коронавирустың күшеюі мүмкін екендігін де мамандар жасырмайды. Сонымен, мамандар болжаған пандемияға дайындығымыз қалай? Жаздағы күрделі жағдайдан қаншалықты сабақ алдық? Осы орайда Шымкент қалалық денсаулық сақтау басқармасының басшысы Бақытжан Позиловпен сұхбаттасқан едік.

позилов3– Бақытжан Жолдасбекұлы, коронавирустың ықтималды «екінші толқыны» өрши қалған жағдайда оған қаншалықты дайынбыз?

– Иә, дүниежүзілік денсаулық сақтау ұйымы күзде пандемияның екінші кезеңі болуы мүмкін екенін жоққа шығармады. Себебі, жедел респираторлық вирусты аурулар дәл осы кезде өршиді. Күн салқындағанда індетпен бірге қосарланады деген қауіп болды. Сол үшін алдын алуға дайындық жұмыстары жүргізілді. Бұл дұрыс шешім болды. Қазір елімізде әлемдегідей үлкен пандемия жоқ. Алайда Шығыс және Батыс Қазақстан өңірлерінде індетпен ауырғандар көбеюде. Әзірге Шымкент жасыл аймақта. Бірақ арқаны кеңге салып, босаңсуға болмайды. Қалада індет басталғалы бергі 24 наурыздан қарашаға дейінгі аралықта 5297 адам тіркеліп, оның 5160-сы жазылып шықты. Өкінішке қарай, 75 адам көз жұмды.
1 тамыздан 17 қарашаға дейін ковид белгілері бар пневмонияның 1086 жағдайы тіркелді. Оның 12-сі – 18 жасқа толмаған балалар. Өткен тәуліктерде коронавируспен ауырғандар тіркелмеген еді. 5 қарашада стационарға бірден 8 науқас түсті. Бұл бізді алаңдатып отыр. Қазір 62 адам ем алып жатыр.
Аурудың алдын алу мақсатында сақтық шараларын күшейттік. Егер екінші кезең болған жағдайда, С жоспары бойынша 5000-нан астам төсек-орын қайта ашылады. 10 600-ға жуық медицина қызметкері оқудан өтті. Бастапқыда өкпені желдету аппаратының саны 310 болса, бүгінде 612-ке жетті. Медицина мамандары адамдарды шоғырландырмау, вирустың белең алуына жол бермеу мақсатында жұмыстар атқаруда. Сондай-ақ, Шымкент қаласындағы коронавирус инфекциясы, эпидемиялогиялық ахуал туралы ресми және сенімді ақпаратты https://covid19shymkent.kz/ сайтынан білуге болатынын ескертеміз.

– Күзгі және қысқы маусымда болжамдалып отырған коронавирустың жаздағы жағдайдан айырмашылығы неде? Оның салдары қандай болуы мүмкін?

–Әлем елдерінде пандемия асқынып барады. Жұқтыру оқиғасы мен өлім-жітім оқиғасы артуда. Көрші Ресейде де ахуал алаңдатарлық. Жағдай көктем-жаз айларындағыдан қиындау. Себебі, алдыңғы толқында науқастарда респираторлық вирусты аурулар болмаған. Ал күзде маусымдық тұмау, жаппай суық тию жағдайды күрделендіріп отыр. Оның үстіне қауіпті вирус мутацияға ұшыраған.

– Жедел жәрдемге жұрт қаншалықты жүгінеді? Оны сұрағаным, тұмауға атүсті қарайтын әдетімізбен бұл екі ауруды шатастырып жүрген жоқпыз ба?

– Бұған дейін жедел жәрдемге жоғары температура, жөтел, тұмаумен түскен шақыртуларда COVID-19 инфекциясы болған жоқ. Ал қазіргі шақыртуларда қауіпті вирус болуы ықтимал. Бүгінде дәрігерлер белгіленген алгоритм бойынша жұмыс істейді. ЖРВИ мен жедел респиаторлық вирустың симптомдарын, науқастың қай аймақтарда болғанын анықтайды. Содан соң диагноз қояды.

–Жазда індетті ауыздықтай алмауға дәрі тапшылығының себеп болғанын жақсы білеміз. Талай сын айтылды. Ақыры бар кінәні «СК-Фармацияның» мойнына іліп, мұндай тапшылық болмайтынына өзімізді сендіргендей едік. Бірақ дерттің «екінші толқынына» дайындық жасап жүргенде дәрі-дәрмек таппай сенделетін жағдай қайталанбай ма?

– Жаз айларында дәрі тапшылығы туындап, дәріханалардың алдында ұзын-сонар кезек болды. Сондай-ақ парацетамолды 20-30 бумадан алғандар көп кездесті. Ақыры бұл жағдай дәрі тапшылығына алып келді. Қазіргі таңда дәріханалар мен емханаларда және ауруханаларда дәрі-дәрмектің екі айға жеткілікті қоры дайындалды. Мұнан бөлек, қалалық әкімдік резервінен дәрі тапшылығын болдырмау мақсатында қаражат қарастырылды. Сондықтан жетіспеушілік болады деп айта алмаймын.

– Аурудың алдыңғы шебінде жүрген әріптестеріңіз туралы бір ауыз айтып өтсеңіз. Оларға үстемеақы төленді ме?

– Басын қатерге тігіп, ауру ошақтарында үй бетін көрмей, адал еңбек етіп жатқан дәрігерлердің еңбегі ерен. Елдің амандығы үшін жанқиярлықпен жұмыс істеген ақ халаттылардың қай-қайсысы да құрметке лайықты. Індетпен күрес кезінде ауру жұқтырған 400-ден аса әріптесіміздің бәріне 2 миллион теңгеден төленді. Ал қайтыс болған 21 дәрігердің туысына 10 миллион теңгеден толық берілді.

– Індеттің екінші кезеңіне әзірлік жөніндегі кеңесте Президент ана мен бала денсаулығын қорғау бойынша ахуалдың нашарлығын сынға алды. Оның ішінде Шымкент те аталды. Ана өлімінің жиілуіне не себеп?

– Иә, Шымкентте жыл басынан бері ана өлімі өткен жылға қарағанда көп тіркелді. Өкінішке қарай, бұл – біз үшін нашар көрсеткіш. Қазір ана өлімінің алдын алу мақсатында жұмыстар жүргізілуде. Қалалық инфекциялық орталықта ковидпен ауырған жүкті әйелдерді қабылдайтын, босандыратын, ота жасайтын мүмкіндік жасалды. Күнделікті акушер-гинекологтарымыз аяғы ауыр аналармен жұмыс істеуде.
Жүктілік кезінде 7 қауіп-қатер бар. Егер бас, іш қатты ауырған кезде, басқа симптомдар болғанда уақыт созбай дәрігерге хабарласқан дұрыс. Алайда әйелдердің өз денсаулығына немқұрайлы қарауы қайғылы жағдайға әкеліп соғуда.

– Кавасаки синдромы туралы көп айтылып жүр. Оған шалдыққан балалар бар ма?

– Қаламызда кавасаки синдромымен тіркелген балалар жоқ. Бірақ мектеп оқушылары арасында коронавирус жұқтырған фактілер болды.

– Аурудың қауіптілігі неде?

– Кавасаки ешқандай жұқпалы ауру емес. Бұл – пандемияға дейін де болған, бірақ өте сирек кездесетін дерт. Көбінесе 1-8 жас аралығындағы балаларда болады. Негізгі симптомдары ұзақ уақыт болатын лихорадка. Синдром дене қызуының 38 градусқа көтерілуінен басталады, сол кезде жөтел пайда болуы мүмкін. Ауруға ұқсас белгілердің бірі – бөртпе, тілдің, еріннің қызаруы, алақанның ісінуі. Сондай-ақ синдром кезінде конъюктивит білініп, лимфа түйіндерінің үлкеюі ықтимал. Балалар кеудесі қысылып, жүрек тұсы, іші ауырып, құсу, жүрек айну, диарея сияқты жайсыздыққа тап болады. Яғни емдемеген жағдайда қауіпті патологиялық ахуалға әкеп соғады.

– Коронавирус жұқтырғандарды жас ерекшеліктері бойынша жіктеп берсеңіз. Ауруды жастар жеңіл өткереді деген рас па?

– Жаз айына дейін коронавирустың бар екеніне көпшілік сене қоймады. Алғашқы карантиндік шектеулер алынған соң, маусымның ортасында стационарларға науқастар толассыз түсе бастады. Ауырғандар арасында созылмалы дерттің салдарынан өлім көрсеткіші артты. Сонда ғана адамдар індеттің қолдан жасалмағанына көз жеткізді. Қауіпті дерттің жас-кәріге қарамайтынын білді. Демек, жастар COVID-19-ды жеңіл өткереді деген ақпаратқа алданудың қажеті жоқ.

– Аурудан қорғанудың қарапайым ғана қағидаларын халық қаншалықты орындап жүр?

– Бастапқыдай емес, адамдарда аурудан қорғану туралы түсінік қалыптасты. Қорғанып, сақтық шараларын сақтау керек екенін жақсы біледі. Ең қарапайым қағида – бетперде тағып, арақашықтықты сақтау. Бірақ көпшілік әлі де медициналық масканы дұрыс қолдануға мән бермейді. Біріншіден, қоғамдық көлік, базар, сауда орталықтарында, дүкендер мен адам бас қосқан орталарда масканы дұрыс тақпайды. Бар дегендей ғана иекке түсіріп алады. Ал мұның ешқандай пайдасы жоқ. Екіншіден, әлеуметтік арақашықтық сақталмайды. Бұл бізге үлкен мәселе туындатып отыр. Күн сайын мониторингтік топтар рейдтерге шығып, мейрамханалар мен тойланаларды тексереді. Той жасағандарға ескерту беріліп, айыппұл салынып жатыр. Қанша түсіндіру жұмыстары жүргізілгенімен, өкінішке қарай сақтық шаралары толық сақталмай келе жатқанын ашық айтуымыз керек.

– Дәрігер ретінде қандай кеңес берер едіңіз?

– Біз коронавируспен ауырып жатқан науқастар туралы ақпаратты күнделікті ашық жариялаймыз. Бірақ көпшіліктің статистикаға алаңдаушылығы төмен. Ашығын айтайын, егер санитарлық талап орындалмаса, әлеуметтік арақашықтық сақталмаса, қоғамдық ортада бетпердесіз жүрсек, той-жиындардан бас тартпасақ, індеттің «екінші толқыны» етек алуы әбден ықтимал. Яғни, вирусқа әлемнің өзі қарсы тұруға қауқарсыз. Оның қарқыны қандай боларын тап басып ешкім айта алмайды. Дәрігерлердің қолынан келері – науқасқа көмек көрсетіп, аурудың алдын алу шараларын жүргізу ғана. Сондықтан ең маңыздысы – санитарлық талаптарды қатаң сақтап, тәртіпке бағынған абзал.

Қауіп қансорғыштан ҒАНА МА?

Среда, 11 Ноябрь 2020 04:06

Дезинсекция

Он жылдан бері Шымкент пәтерлері қандала, бүрге секілді қансорғыштар мен ауру тарататын тарақандардан көз ашпай келеді. Көші-қон артқан сайын зиянкестер үйден-үйге тарап жатыр. Өкініштісі, қансорғыштарды улайтын дәрілерді қолдану, жалпы улау шаралары мүлдем бақыланбайды. Соның салдарынан былтыр қарашада, биыл ақпанда қалада үш бала залалсыздандыратын химиялық заттардың кесірінен көз жұмды. Ал дезинсекторлар зиянкестерді жоямын деп тұрғындардың улану жағдайына соқтырып отырғанын біле ме екен?

Қандаланы емес, балаларды...

Түнгі тыныш ұйқыға не жетсін?! Таң атқанша денені дуылдатып, қышыған жерін қасып, тыныштықтан айырылу – нағыз азап. Содан құтылу үшін жұрт әртүрлі қадамға барады. Біреулер қауіпті препарат сатып алып, оны өз бетінше қолданады. Химиялық уды мөлшерінен көп қосып, үйінің бұрышы мен қуысына молынан сеуіп тастайды. Содан есігін тарс жауып, іс бітті деп жөніне кетеді. Алайда зиянды зат үй ішінде тұрмайды. Асүй мен дәретханадағы ауа тартқыштар, қабырғалардағы саңылаулар арқылы іргелес үйлерге тарайды. Бұл жағдай жылдар бойы жеке үйлердегі күнделікті көрініске айналғаны қашан?! Зиянкестерге арналған удың зардабын жәндіктер емес, адамдар тартып жатыр.
Мәселен, Еңбекші аудандық сотының мәлімдеуінше, қайғылы жағдайдың бірі өткен жылдың қарашасында тіркелді. Дезинфектор улы препаратпен үйді заласыздандырады. Ал баспана иелері денсаулығын қорғап, есікті құлыптап, уақытша көшіп кетеді. Өкініштісі, олар болған жәйтті көршілерінен жасырып, бірде-бір адамға алдын ала ескертпеген. Ал көрші пәтерде бір отбасының 11 айлық және 4 жастағы баласы уыты күшті удан көз жұмды.
Екінші оқыс оқиға биыл ақпан айында қайталанды. Улы препарат кесірінен тағы бір отбасында өсіп келе жатқан 8 айлық нәресте бақилық болды.
Әрине, бұл қайғылы оқиғаларға байланысты тиісті тұлғаға заңдық тұрғыда шара көрілді. Үш баланың өліміне себепкер болған дезинфектор жазаға тартылды. 42 жастағы азамат 5 жылға бас бостандығынан айырылды. Бұған дейін жеке пәтерлерді залалсыздандырып келген оған 3 жылға дейін дезинфекция жұмысымен айналысуға тыйым салынды. Алайда абайсызда кісі өліміне себепкер болған санитарлық қағидаттарды бұзған айыпталушы сотта кінәсін мойындамады.
Ол ол ма, шымкенттік дезинфектордың арнайы рұқсат құжаты да болмаған. Тіпті, кәсіпкер ретінде тіркелмеген. 2018 жылдан бастап көлеңкелі кәсіппен айналысқан. Мұның соңы, міне, балалардың өлімімен аяқталды.

 

дез

 

Қауіпті сала неге қараусыз?

Мамандардың сөзіне сүйенсек, бұл салада бақылау жоқ. Халық өмірі мен денсаулығына залал келетін бағыттар бойынша жұмыс бәсекелестік ортаның құзырында. Меморгандарда оларды бақылап, қадағалайтын құқық жоқ.
Бұрын дезинфекциялау, дезинсекциялау, дератизациялау құралдары мен препараттарын дайындау, өндіру, қайта өңдеу және көтерме саудада өткізу, сондай-ақ, оларды пайдалану айналасындағы жұмыс пен қызмет түрлері лицензияланатын. Бұл талап 2005 жылғы 15 мамырда қолданыстан алынды. Тек 2009 жылы денсаулық сақтау мәселелері бойынша заңнамалық өзгерістерге сәйкес қызметтің кіші түрі ретінде қалыпқа келді. 2014 жылы 16 мамырда «Рұқсаттар және хабарламалар туралы» заң қабылданды. Содан бастап дезинфекциялық қызмет қайтадан лицензияланбайтын болды.
Дезинфекциялық орталықтардың оңды-солды жұмыс істеу себебі де осы қадағалаудың жоқтығынан екені анық. Бұған Үкімет араласпаса болмайды...

Пандемия кеселді асқындырды

Елімізде аталған қызметпен айналысатын жеке ұйымдар саны 400-ге жуықтайды. Әйтсе де, тұрғындар үй-жайларын YouTube-тан көргеніндей залалсыздандыруды жөн санайды.
Мамандар кейбір жеке дезинфекторлардың көбі қауіпсіздік техникасынан бейхабар деп есептейді. Оқу курсынан өтіп жатқан ешкім жоқ. Қарапайым ғана жеке бас тазалығы мен еңбек гигенасы ережелерін, тамақ өнімі, ауа және су айдындарының ластануының алдын алу жолдарын білмейді. Зардап шеккендерге алғашқы көмек те көрсете алмайды. Саладағы ахуал осындай.
Коронавирустың таралуы мәселенің өзектілігін арттырып, айқын көрсетіп берді. Біліктілігі, еңбек өтілінің жоқтығына қарамастан 3 айда елімізде дезинфекциялық құралдар, тері антисептиктерін өндіруші компаниялар қатары артқан.
Бұл көпшіліктің пандемия кезінде үйлердің кіреберісін залалсыздандырумен айналысатын мамандар мен волонтерлерге сенімін жоғалтты. Ендігі өзекті мәселе, дезинсекция және дератизация жұмысының 97 пайызға жуығы жеке сектордың үлесінде.

Удан зардап шеккендер көп

Ресми дерек бойынша, 2018-2020 жылдар аралығында дезинсекция, дератизация құралдарын өз бетінше пайдалану нәтижесінде адамдардың улануының 21 жағдайы тіркелді. Олардың 6-ы қайтыс болды. Қайғылы жағдай Шымкентте ғана емес, Маңғыстау, Атырау, Алматы, Ақтау қалаларында да кездесіп отыр. Кісі өліміне ашық далада ауыл шаруашылығы өсімдіктерін өңдеуге арналған перепараттардың жеке тұрғын үйлерде қолданылуы себеп болған.
– Улы химикаттар тобы 4-ке бөлінеді. Олардың 1, 2-түрлері өте қауіпті, тек ашық далалық жерлерге арналған. 3-топқа арналған уды білікті маман ғана жасауы тиіс. Дезинфекторлар 5 жыл сайын біліктілігін арттыруы, қызмет жасауға рұқсат беретін куәлігі болуы қажет. Маман қолданатын препараттың класын, нұсқаулығын, жарамдылық мерзімін, тіркеуден өткенін міндетті түрде білгені абзал.
Осы орайда тұрғындар залалсыздандыру жұмыстарына бейжай қарамаса, санитарлық ережелерді толық сақтаса дейсің. Химиялық өңдеу жүргізілгенде инструкцияға сай үйде болмауды, үйге кіргенде есік-терезелерді препарат исі кеткенше ашып, бөлмелерді толық жуып-шаю қажеттігін ескертеміз, – дейді Шымкент қаласы санитариялық-эпидемиологиялық бақылау басқармасы Медициналық ұйымдарды және ауруханаішілік инфекцияларды эпидемиялық қадағалау бөлімінің басшысы
Гулнара Нуриева.
1-ден 3-топқа дейінгі препараттардың саудасына рұқсат болмаса да улы химикаттар базарларда оңай сатылып жатыр. Ол аз десеңіз, қалтаңызды қағатын дезинсекторлардың санында шек жоқ. Айналып келгенде, бұл мәселе лицензиялау қажеттігін туындатып отыр. Тәртіп пен шектеу болмаса, көзбояушылықпен ақша табатын арамза кәсіпкерсымақтар көлеңкелі қызметпен табысын еселей беретіні анық. Ал ол – біреу үшін – пайда, біреулер үшін өміріне – найза!

124651641 801778593699608 1441618144802828027 o

Қазақстан халқы Ассамблеясының «Қазақтану» жобасы аясында саз колледжінде түрлі этнос өкілдері арасында «Ұлт үні» керуені байқауына кезекті іріктеу кезеңі өтті.

Екі айналымнан тұратын жобаның алғашқысы Абай, Әл-Фараби, Еңбекші, Қаратау аудандарында өткізілген болатын. Бақ сынаған 82 үміткердің ішінен 20 қатысушы таңдап алынған еді.
«Ұлт үні» керуенінің мақсаты – Әл-Фараби, Абай, Шәмші
Қалдаяқов сынды қазақтың танымал ұлы тұлғаларының шығармаларын насихаттау арқылы этнос өкілдерінің қазақтың тілі мен әдебиетіне, мәдениетіне ықыласын арттыру, әрі еліміздің рухани бірлігін нығайту болып табылады.
Жобаның екінші кезеңінде үздік танылған 20 өнерпаздың өнері тамашаланды.
– Ұлттың байлығы – ана тілі. Тілден артық қандай құндылық, байлық бар?! Этнос өкілдерінің өнеріне тәнті болдық. Айталық, Павел Ким Қ. Шілдебаевтың «Отан ана», Ермұрат Зейіпханның «Көк тудың желбірегені» әнімен жүректі елжіретті. Ольга Рудакова халық әні «Әй-әй бөпемді» көрерменге орындау шеберлігімен жеткізе білді. Нематилло Зкрулаев Ш. Қалдаяқовтың «Бақыт құшағында», түрік этносының өкілі Гүлханым Тұрсынова Р. Таймановтың «Мен қазақ қыздарына қайран қалам» әндерімен көңілімізден шықты, – деді ақын Әбдіхалық Әбдірайым.
Айта кетейік, «Қазақтану» жобасы аясындағы іс-шара Шымкент қаласы әкімінің бірінші орынбасары Шыңғыс Мұқанның бастамасымен, ішкі саясат және жастар істері басқармасы ұйымдастырған болатын. Ал үздік қатысушылар Тәуелсіздік мерекесі қарсаңында марапатталады.

 

«Ақбілек» жазылған үйдің ізі де жоқ

Пятница, 30 Октябрь 2020 03:36

Жүсіпбек Аймауытовтың «Ақбілек» романы Шымкентте жазылғанын біреу білсе, біреу білмейді. Шығармада қазақ халқының күрделі кезеңдері тарихи шындықпен астасып жатыр. Сол дәуірдегі ауыр шақ романда асқан шеберлікпен түйінделеді. Өкініштісі, көп талданып, тарихи шежіреге өзек болған үй сақталмаған. Тіпті мемуарлық мұражайға айналатын баспананың жұрнағы да қалмаған.

700

Жұмыртқа қымбаттады. Себебі неде?

Пятница, 23 Октябрь 2020 04:25

Елімізде құс тұмауынан қырылған құс көбейді. Солтүстік өңірлерде 100 мыңнан астам қаз-үйрек пен тауық өлген. Қанаттылар арасында дендеген індет бизнесті де, бұқараны да алаңдата бастады.

811

ОЙЛЫ БОЛСАҢ, ОЗЫП КӨР

Среда, 14 Октябрь 2020 04:11

Шымкентте «Ойлы болсаң, озып көр» интеллектуалды байқауы өтеді. Іс-шара Елбасының «Рухани жаңғыру» бағдарламасы шеңберінде және «Интеллектуалды ұлт – 2020» жобасы аясында қала әкімі Мұрат Әйтеновтың қолдауымен ұйымдастырылып отыр.

511

Аллея абаттандырылса, айып па?

Среда, 14 Октябрь 2020 03:50

Біраз уақыттан бері әлеуметтік желіде Шымкенттегі Шәмші аллеясы туралы әртүрлі ақпарат кеңінен тарады. Гүлзардағы күрделі жөндеу жұмысы жөнінде қала тұрғындарының пікірі екіге жарылды.

504

Страница 1 из 40