Қала тұрғындарынан соңғы екі күн ішінде 15-ке жуық хабарлама түскен. Оның бәрі ауласына кіріп кеткен жаңбыр суын тазарту туралы айтқан.
Жауапты мамандар Республика даңғылы бойындағы «Колос» тоннелінде, Арғынбеков пен Өтегенов көшелерінің қиылысында, Желтоқсан көшесінде және Көксай-3, Нұртас, Тұран шағынаудандарында аулаға кірген суды сорып, Назарбаев даңғылындағы айналма жолдың қасындағы сайда жиналған жауын суының жолын қосымша бітеу жұмысын жүргізді.
Жаңбырдың салдарын жоюға ТЖД-нің 61 қызметкері мен 17 техникасы және 9 дана мотопомпа жұмылдырылып, шамамен 336 текше метр су шығарылды. Тұран шағынауданындағы Жаңақұрылыс көшесінің бойындағы тұрғын үйді су алып кету қаупінің алдын алу мақсатында құмдалған 300 дана қап қойылды. Қазіргі танда жеке үйлерді су басу қаупі жоқ, дейді Шымкент қаласы ТЖД мамандары.
