Шымкент қалалық орталықтандырылған балалар кітапханасы жүйесінің (ОБКЖ) бөлімшелерінде ел Тәуелсіздігінің 25 жылдығына орай бірнеше мәдени іс-шаралар өтті. Бұл ретте 15 шағынаудандағы №7 кітапхана бөлімшесі №24 мектеп-лицейдің қазақ тілі мен әдебиеті пәнінің мұғалімі Гүлнар Аксикова және 8 «а» сынып оқушылары бірлесіп, «Егемен елім – тірегім!» атты кеш ұйымдастырды.
Шара аясында «Бас бақытым – тәуелсіздік» атты кітап көрмесі ұсынылды. Көрмеге тәуелсіз Қазақстанның бүгінгі жетістіктері және жарқын болашағы туралы деректер мен құнды кітаптар қойылып, библиографиялық шолу жасалды.
Тәуелсіздік үшін ерлікпен қаза тапқан боздақтардың есімдерін бір сәт үнсіздікпен еске алумен ашылған іс-шарада оқушылар тәуелсіздік тақырыбындағы өлеңдері мен шығармаларын оқып, тәуелсіз Қазақстанның 25 жылдық тарихына тоқталды. Іс-шара барысында оқушылар тәуелсіздіктің елімізге оңай келмегенін, осы ауыр да азапты жолда қаншама біртуар қайсар азаматтар мерт болғанын, олардың соңғы тұяғы әйгілі Желтоқсан оқиғасының құрбандары
Л. Асанова, Қ. Рысқұлбеков, С. Мұхамеджанова екенін айтып өтті. Интерактивті тақтада әртүрлі терең ойға жетелер слайдтар көрсетілді.
«Егемен елім – тірегім!» іс-шарасы тәуелсіздігіміз тұғырлы, еліміз еңселі болғай деген көпшілік тілегімен аяқталды.
Айнұр Құрмашова,
ОБКЖ №7 кітапхана
бөлімшесінің кітапханашысы
