Шымкент келбеті

Шымкентте Қазақстанға танымал UStudy.kz онлайн тестілеу орталығының алғашқы бөлімшесі ашылды. Орталықтың салтанатты ашылу рәсіміне қала əкімі Ғабидолла Әбдірахымов қатысты.

Соңғы технологиямен жабдықталған орталық оқушылардың білімін жетілдіруге бағытталған. Ол Ұлттық бірыңғай тестілеуге дайындалудың ерекше жолы болмақ. Бұл электронды жүйе ата-аналарға, мұғалімдерге республикадағы білім сапасы жөнінде толық есеп алуына жағдай туғызбақ.
– Жас өскіннің білім деңгейін көтеріп, өзін үздіксіз шыңдай түсуі үшін осындай тестілеу орталықтары көптеп ашылуы керек. Біз қаламыздағы мектеп оқушыларының білім сапасын республикада алдыңғы орынға шығаруымыз үшін осындай орталықтар қажет, – деді Ғабидолла
Рахматоллаұлы.
Талапкерлердің білім деңгейін тексеретін орталықта 5-ші және 11-ші сынып аралығындағы оқу бағдарламасы бойынша 11 пәннен 2 тілде 9000-нан астам тест сұрақтары жинақталған. Сонымен қатар, 2 тілде негізгі және қиын тақырыптар мен пәндер бойынша 300-ден астам оқу курстары бар. Тесттер мен оқу курстарын еліміздің жетекші ұстаздары құрастырған.
Аталған орталық мектеп оқушыларын ҰБТ-ға дайындалуға жəне сəтті тапсыруға көмектеседі. Оқушылар мұнда сынақ тапсырып, өзінің қателіктерін көріп, видео сабақтар оқуына болады. Тіпті жазғы мектептерге қатысып, тестілеуден ең жоғарғы балл жинауына мүмкіндік бар.