Шымкентте биылдың өзінде 20 тұрғын үйге қайтарымды қаржы есебінен күрделі жөндеу жұмыстары жүргізіледі деп жоспарланған. Жуық арада 15 тұрғын үйдің жөндеу жұмыстары қаржылық-экономикалық негіздеменің қорытындысына сәйкес жергілікті бюджеттен қаржы қаралған соң басталады.
Күрделі жөндеу жұмыстары кезінде көппәтерлі тұрғын үйлердің шатыры ауыстырылып, жертөлесі, кіреберіс, кәріз құбырлары толықтай жаңартылады. Жөндеуден өтетін көпқабатты тұрғын үйлер Әл-Фараби алаңында, Республика даңғылы, Асқаров, Дулати, Жангелдин, Иляев көшелерінде және Отырар, Спорт және Шығыс шағынаудандарында орналасқан.
Қайтарымды қаржы негізінде жүргізілетін жөндеу жұмыстары аталған тұрғын үйлердің тұрғындарының 70 пайызының келісімі негізінде жүзеге асырылады. Яғни, жөндеу жұмыстарына кеткен шығындарды тұрғындарға бірнеше жылдарға бөліп төлеу жеңілдігі қарастырылған. Сонымен қатар меншік иелері жөндеу жұмыстарын жүргізетін мердігер мекемені өздері таңдау арқылы ұсынады. Жөндеу жұмыстарын қадағалауды «Тұрғын үй Шымкент» ЖШС-і жүзеге асырады.
Айта кетсек, жауапты мекеме қазіргі таңда 10-нан аса тұрғын үйге техникалық зерделеу жұмыстарын жүргізуде. Тиісті мақұлдау шаралары қабылданған жағдайда, бірқатар көппәтерлі тұрғын үйлер де жөндеуден өтуі мүмкін. Жалпы, қалада өткен жылы 60 көпқабатты тұрғын үйге күрделі және ағымдағы жөндеу жұмыстар жүргізілген болатын.
