Қалаға шалғай орналасқан шағынаудандар мен елді мекендерге қатынайтын автобус бағыттарының саны артып келеді. Осы себепті, жауапты басқармада қозғалысты оңтайландыруда қосымша бағыт қосу жұмыстары қолға алынған. Қазір кейіннен қосылған 590 автобустың қозғалыс сызбасын халыққа тиімді ету мақсатында арнайы жұмыстар жүргізіліп отыр.
– Жаңа бағыттарға қатысты тұрғындардың арыз-шағымдары да ескеріліп отыр. Мәселен, әлеуметтік желіде тұрғындар №150-ші автобус жұмысына көңілдері толмай, шағым түсірген. Мәселенің мән-жайын анықтап, жүргізушіге қатаң ескерту берілді. Автобустардың бағыттарына Шымкент қаласы бойынша көліктік бақылау инспекциясы бақылау жүргізуде, - деді Шымкент қалалық жолаушылар көлігі және автомобиль жолдары басқармасының бөлім басшысы Наурыз Сүгіралиев.
Айта кетейік, үшінші мегаполисте 78 бағытта жолаушылар тасымалдайтын 800-ге жуық автобус бар.
Ақбөпе ЕРГЕШ