Спикер брифинг барысында министрлік тарапынан шетелдік туристер үшін туроператорлардың шығындарына субсидия берілетінін мәлімдеді. Ол сырттан келген әр турист үшін 15 мың теңге болмақ.
– Ал жергілікті атқарушы орган туристік нысандар мен жол бойындағы қызмет көрсету нысандар құрылысы шығынының 10 пайызы, туристік автобустарды сатып алу бағасының 25 пайызы өтеліп, санитарлық-гигиеналық торапты күтіп-ұстауға ай сайын
83 300 теңге төлеу қаралған. Сонымен қоса «Кazakh tourism» ҰК» АҚ тарапынан балалардың әуе билетін 100 пайыз субсидияланады. Яғни, 17 жасқа дейінгі балалар Қазақстан ішінде тегін ұша алады. Аталған жоба ел ішінде демалысқа аттанған балалардың әуе билетін тегін алуына мүмкіндік береді. Ол үшін турпакет ішкі туризмде лицензиясы бар туроператордан сатып алынуы тиіс, – деді басқарма басшысы.
Ерлан Қыдыров бұл қолдаулардың туризм саласының дамуында көрсетілетін үлкен көмек екенін айтып, басқарма тарапынан қолданыстағы заңнамаға сәйкес мемлекеттік қолдау шараларын алуға мүмкіндігі бар азаматтарға ықпал жасалатынын айтты.
Оған қоса Сайрам тұрғын алабындағы сакралды нысандардың туристік тартымдылығын арттыру ісі де қолға алынады. Шымкентте үлкен туристік орын құру мақсатында «Ескі қалашық» тарихи-мәдени кешені «Қазақстанның туристендіру картасының» ТОП-50 нысанының тізіміне енгізілген. Бүгінде жобаның мастер-жоспары әзірленіп, оны жүзеге асыру бойынша жұмыс тобы құрылған. Алдағы уақытта аталған бағыттар бойынша жұмыстар жалғасын таппақ.
Сонымен қоса жолаушылар көлігі және автомобиль жолдары басқармасымен бірігіп, осы туристік нысандарға апаратын жолдарды ретке келтіру ісі жүзеге асырылуда. Атап айтқанда, Ибрагим ата, Қарашаш ана, Абдул-Әзиз баб, Мірәлі баб, Қожа Салық сынды тарихи-мәдени және сакралды орындарға апаратын жолдарды бағыттайтын жолсілтегіштер орнатылмақ. Жалпы, мамыр айының соңына дейін қазақ, орыс және ағылшын тілдерінде 40-қа жуық жолсілтегіш орнатылады деп жоспарлануда.
