42 мың тұрғын спорттық іс-шараларға қатысты
Шымкент қаласының 2021-2025 жылдарға арналған даму жоспары бойынша спорт саласының көрсеткіштері 4 бағытты қамтиды. Атап айтқанда, бірінші бағыт – дене шынықтыру және спортпен айналысатын азаматтардың санын жалпы халықтың 50 пайызына дейін жеткізу. Сондай-ақ халықты 1000 адамға арналған спорттық инфрақұрылыммен қамтамасыз ету, дене шынықтыру және спортпен айналысуға қарсы көрсетілімдері жоқ мүмкіндігі шектеулі адамдар және жастардың (14-18 жас) спортпен қамту үлесін арттыруда жоспарлар жасалған.
Басқарма басшысының мәліметінше, қазіргі уақытта қала аумағында спортпен айналысуға қарсы көрсетілімі жоқ 15 644 мүгедектігі бар азамат бар. Оның ішінде, 2036 адам дене шынықтырумен айналысады. Биыл бұл көрсеткіш 234 адамға (13 пайыз) көбейді.
Жастардың спортпен қамтылу жағдайы – 45 940 адам. Оның ішінде, 151 жалпы білім беру мекемесінде – 33 107, 24 орта арнаулы білім беру мекемесінде – 5 728, 7 жоғары білім беру мекемесінде – 7105 жас спортқа тартылған.
Шымкент – саламаттылыққа бет түзеген шаһар. Соңғы алты айда қалада бірқатар бұқаралық-спорттық іс-шаралар өткізілді. «Наурыз Шымкенттен басталады» мерекесіне орай «Great qazaq games» ұлттық ойындарға еліміздің өңірлерінен және шетелден 1000-нан аса спортшы қатысты. «Шымкент жастар лигасы» бәсекесінде 151 мектептен 500-ден астам команда жасақталып, 6 мыңға жуық бала спортпен қамтылды.
Алдағы қыркүйек айында 5000-нан астам қала тұрғыны өтініш берген «Шымкент марафон» спорттық іс-шарасы өтеді. Сондай-ақ, есепті кезеңде қала жасөспірімдері арасында футболдан чемпионат, мемлекеттік қызметкерлер, медицина, бұқаралық ақпарат құралдары, құқық қорғау қызметкерлері арасында спартакиада ұйымдастырылды. Жалпы осы іс-шараларға 42 000 қала тұрғыны тартылған. Жыл қорытындысы бойынша бұл көрсеткішті жалпы 47 000 адамға жеткізу көзделіп отыр.
– Жалпы айтқанда қалада фитнес орталықтарда, саябақтарда, дендрологиялық саябақта, демалыс аймақтарында спортпен шұғылданушылардың қатары артуда. Басқа өңірлерде жоқ «Шымкент жастар лигасы» оқушылардың, ұстаздардың құлшынысын оятты. Жастарға серпін берді. Жан басына қаржыландыру бағдарламасы да жасөспірімдердің бос уақытын тиімді өткізіп, саламатты өмір салтын ұстануына өте керекті жобаның бірі. Биыл мемлекеттік спорттық тапсырыс арқылы спорттың 20 түрі бойынша 16 790 бала қамтылса, 2024 жылы 23 000 баланы (22 пайыз) спорттық секциямен қамтамасыз ету жоспарланып отыр, – дейді басқарма басшысы.
Спорттық тапсырысты жан басына қаржыландыру бағдарламасы аясында 338 жаттықтырушы және 200-ге жуық басқа да қызметкерлер жұмыспен қамтылған. Қазіргі таңда Абай ауданында – 46, Әл-Фараби ауданында – 42, Еңбекші ауданында – 26, Қаратау ауданында – 58, Тұран ауданында – 41 спорт секциясы жұмыс істейді.
Орталық стадион жаңғыртудан өтеді
Бұқаралық спорттың жағдайы мен дамуы спорттық инфрақұрылымға тікелей байланысты. 2023 жылдың I тоқсанында шаһарда үстел теннисі кешені, жаңа ипподром құрылысы (демеуші есебінен), Металлург стадионы, №20 спорт мектебі спорт ғимаратының құрылысы аяқталып, пайдалануға берілді. Жыл соңына дейін №12 спорт мектебінің қосымша корпусы, Sport Life футбол орталығының құрылысы аяқталады.
Сондай-ақ, алдағы уақытта 6 спорт нысаны құрылысын жүргізу жоспарлануда. Тұран шағынауданында «Теннис орталығы», жаңа ипподромға қосымша атқоралар құрылысы, қалалық № 15 спорт мектебінің спорт кешені, Тассай, Тұран және Нұршуақ шағынаудандарында жеке кәсіпкерлер есебінен спорт нысаны салынады.
Бұдан бөлек, қазіргі уақытта тағы 5 әлеуетті спорт нысанының техникалық экономикалық негіздемесі жасалуда. Олар – № 1, №4, № 16 спорт мектептерінің қосымша корпусы, Қажымұқан атындағы орталық стадионды реконстукциялау, Шымкент сити шағынауданында көпфунционалды «Шымкент арена» спорт кешенінің құрылысы.
Шаһарда көптен бері Қажымұқан атындағы Орталық стадионды реконструкциялау мәселесі көтеріліп келеді. Жергілікті «Ордабасы» футбол командасының ҚР Премьер-Лига, ел кубогы бәсекесіндегі ойындарда стадионға жанкүйерлер сыймай қалып жатыр. Басқарма басшысы бұл мәселенің таяу арада шешімін табатынын айтады.
– Бір айта кетерлігі, бүгінде футболға жанкүйерлік ету мәдениеті қалыптасып келеді. Бұрын ойынға тек ер азаматтар келетін. Қазір қала тұрғындары отбасымен келуді дәстүрге айналдырды. Бұл – қуантарлық жағдай. Қазіргі кезде футболдан ел чемпионатын қабылдау үшін бірқатар талаптар енгізіліп жатыр. Бірінші талап – футбол алаңы жылытылатын болу керек. Және де стадион жартылай жабық болуы тиіс. Жарнама беретін тақтайшаларды электронды форматқа ауыстыру сынды бірқатар талаптар енгізілуде. Енді Қажымұқан атындағы Орталық стадион жаңғыртудан өтеді. Ел чемпионаты аяқталғаннан кейін құрылыс жұмыстары басталады. Қазір жобалық-сметалық құжаттамасы жасалуда, – дейді басқарма басшысы.
Басты мақсат – олимпиадаға 15 жолдама алу
Жарты жылдың қорытындысы бойынша қала спортшылары ҚР чемпионаттарынан 445 алтын, 362 күміс, 415 қола медаль жеңіп алды. Азия чемпионаттарында 61 алтын, 45 күміс, 35 қола, әлем чемпионаттарында 6 алтын, 5 күміс, 7 қола жүлдеге ие болды.
Бокстан Махмұд Сабырхан, байдарка және каноэде есуден жастар арасында Руфина Искакова әлем чемпионы атанса, каратэден Софья Берульцева, Қайсар Алпысбай Азия чемпионатында топ жарды.
ҚР 6-шы Жазғы Спартакиадасында да жерлестеріміз жоғары орында келеді. Қазіргі таңда шаһар спортшылары 62 алтын, 55 күміс, 47 қола медальмен Алматы қаласынан кейін жалпыкомандалық есепте 2-ші орында тұр.
Сонымен қатар, есепті кезеңде 1 еңбек сіңірген спорт шебері, 14 халықаралық дәрежедегі спорт шебері, 67 ҚР спорт шебері, 190 спорт шеберіне үміткер спортшылар дайындалды.
Қыркүйек айында Қытайдың Ханчжоу қаласында Жазғы Азия ойындары өтеді. Қала спортшылары жауапты сынға тыңғылықты дайындалуда. Басқарма басшысының айтуынша, Жазғы Азия ойындарына шаһардан 50-ден астам спортшы үміткер болып отыр.
Биыл 2024 жылғы Олимпиада ойындарына жолдама берер жарыстар басталады. Бұл сында әлемдік додаларда мойыдалған бокстан Махмұд Сабырхан (57 келі), грек-рим күресінен Мейіржан Шермаханбет (67 келі), әйелдер боксынан Жайна Шекербекова сынды саңлақтарымыздан үміт күтеміз. Жалпы Олимпиадаға 15-ке жуық жолдама жеңіп алу мақсаты тұр.
