Оңтүстік халқы қашанда саяси науқандарда белсенділігік танытады. Биылғы, 26 сәуірдегі ҚР Президентінің кезектен тыс сайлауында да бір кісідей атсалысты. Өңірдегі дауыс беруге құқылы оңтүстікқазақстандық азаматтардың 97,78 пайызы конституциялық құқықтарын іске асырып, өз таңдауларын жасады. 27 сәуірге қараған түні, яғни сағат 23:00-де Шымкенттегі Тәуелсіздік саябағына жастар мен зиялы қауым және қоғамдық ұйымдардың өкілдері 2000 мыңнан астам адам жиналып, сайлаудың алғашқы қорытындысын тыңдады.
Саябаққа жиналған жұртшылық үлкен экраннан ҚР Президенті жанындағы Орталық коммуникациялар қызметінен сайлаудың алдын ала қорытындылары туралы мәліметтерді асыға күтті. Бұл ретте тікелей желіде байланысқа шыққан Демократия институтының директоры Ю.Кучинская сайлау учаскелерінде жүргізілген экзит-полдың нәтижесі бойынша Н.Ә.Назарбаевқа сайлаушылардың 97,5 пайызы дауыс бергенін хабарлады.
Елдің ертеңін жарқын болашаққа жетелеген Ұлт көшбасшысы миллиондаған қазақстандықтар қолдаған Н.Назарбаевтың басым дауысқа ие болғанына көз жеткізді. Еңбек ұжымдарының төрағалары, қоғамдық ұйым өкілдері мен белсенді жастар ел тарихындағы тағы бір маңызды шараға жауакершілікпен қарап, оған белсене атсалысқан оңтүстікқазақстандықтарды ортақ жеңіспен құттықтады. Жиналған қауымға облыстық филармонияның әртістері өнер көрсетіп, мерекелік көңіл күй сыйлады. Жастар патриоттық әндерге флеш-моб ұйымдастырды.
– Сайлау барынша әділ өтті. Жұртшылық демократиялық қағидаттарға сәйкес, жүрек қалаулары бойынша өз таңдауларын жасады. Біз осы сайлау арқылы әлем алдында өзіміздің ұйымшыл екенімізді тағы бір мәрте дәлелдедік. Жалпы, Оңтүстік халқының Н. Назарбаевқа деген сенімі ерекше. Елбасы да сайлау алдындағы өңірлерге жасаған ең алғашқы сапарын Оңтүстіктен бастаған болатын, – деп өз пікірін білдірді осы жиынға қатысқан облыстың Құрметті азаматы Исмат Тұрсынқұлов.
Еске сала кетсек, Оңтүстікте дауыс беруге 1 миллион 255 мыңнан астам адам құқылы болса, облыста 1029 сайлау учаскесі жұмыс істеді. Аймақтағы сайлау барысын бақылау үшін ТМД елдерімен қатар, Шанхай ынтымақтастық ұйымынан 22, Еуропадағы қауіпсіздік және ынтымақтастық ұйымынан 2 байқаушы келді. Шетелдік байқаушылар өз кезегінде өңірдегі саяси науқанның өтуі мен ұйымдастыру деңгейінің жоғары болғандығын атап өтті.