Шымкентте темір-бетон бұйымдарын өндіретін «Оңтүстік Құрылыс Сервис» ЖШС кеңейту және жаңғырту жобаларын жүзеге асыруда.
2011 жылы құрылған кәсіпорын жылына 20 000 текше метр темір-бетон бұйымдарын, 60 000 шаршы метр қабырға панелін өндіреді. Зауыт дайын өнімді отандық нарыққа шығаруда.
Кәсіпорын басшыларының айтуынша, «Оңтүстік Құрылыс Сервис» ЖШС «ҚДБ-Лизинг» компаниясымен жасалған келісімшарт негізінде зауытты жаңғыртуды қолға алған. Барлық жаңа жабдықтарды іске қосу-жөндеу жұмыстары сәтті жүзеге асқан.
Атап айтқанда, бүгінде 3 жаңа жеке цех, яғни палубасыз қалыптау желісі (плиталар, рилегтер, баспалдақ сатылары, жол жиектерін өндіру), ұсақ бөлшектелген бетон бұйымдары цехы (қабырға блоктары, тротуар плиталары), қабырға панельдерінің желісі (жоғары сұранысқа ие жаңа технологиялық полистирол бетон өнімдерін өндіру) іске қосылды.
Мекеме қазіргі таңда 110 адамды жұмыспен қамтып отыр.
