Ерболат НҰРМАХАНОВ, Шымкент қалалық мәслихатының депутаты:
– Елбасымыз Нұрсұлтан Назарбаевтың «Болашаққа бағдар: рухани жаңғыру» атты мақаласын оқып шықтым. Басынан аяғына дейін оқыған адамның санасын сілкіп, рухын қайрап, жігерлендіреді. «Мен еліміз мықты, әрі жауапкершілігі жоғары Біртұтас Ұлт болу үшін болашаққа қалай қадам басатынымыз және бұқаралық сананы қалай өзгертетініміз туралы көзқарастарымды ортаға салуды жөн көрдім» деген Мемлекет басшысы ұлттық сананы жаңғыртудың негізін атап өткен.
Расында да, әрнәрсеге байланысты сауатты пікір білдіріп, өзіндік көзқарасыңды танытудың бірден-бір жолы – білімділік, жан-жақтылық. Біздің елдің азаматтары, жастары қоғамда орын алып жатқан жаңалықтарды тереңнен зерттеп, зерделеп, әлемдік деңгейде ойлауды меңгергені абзал. Солай бола тұра, ұлттық құндылықты сақтап, елдің біртұтастығын қадірлеп, туған жерге деген жанашырлығын жоғалтпауы тиіс. Президентіміздің: «Әлем бізді қара алтынмен немесе сыртқы саясаттағы ірі бастамаларымызбен ғана емес, мәдени жетістіктерімізбен де тануы керек» деген сөзі өте ұтымды айтылған және бұл бізге үлкен жауапкершілік жүктейді.