Естеріңізге сала кетейік, жылу беру маусымын ерте бастау туралы шешім ауа райының қолайсыздығына және тұрғындардың өтінішіне байланысты қабылданған. Оған қаладағы жеке орналасқан 23 жылу қазандығы мен орталықтандырылған жылу жүйесіндегі 17 сорғы стансасы толық дайын болды. Өткен жылы жылу желілерінің тозу деңгейін төмендету мақсатында 13,2 шақырым жылу желісін жөндеуге жергілікті және республикалық бюджеттен 5,4 млрд теңге бөлінген. Тұрғындар жеке сервистік мекемелермен келісім-шартқа отырып, үйдің ішкі жылу жүйесіндегі тозығы жеткен құбырларды ауыстырып, жөндеу жұмыстарын жүргізді.
Мамандар 2023-2024 жылыту маусымы аяқталуға таяса да, тұтынушылар тұтынған жылу үшін төлем жасауға асықпайтынын алға тартып отыр. «Қуатжылуорталық-3» мемлекеттік кәсіпорнының мәліметінше, бүгінгі таңда жеке тұлғалардың қарызы 965 миллион теңгеден асып кеткен.
Тұтынушылар көрсетілген қызмет үшін төлемді уақтылы жүргізгені абзал. Себебі, ұйымдар бұл қаржыны инфрақұрылымын жақсартуға немесе қызметкерлердің жалақысын көтеруге бағыттар еді. Алайда, уақтылы төлем жүргізілмеуіне байланысты мамандар жылыту маусымының қарызын өндірумен айналысып отыр.
