Қаланың бас дәрігері орталықты аралау кезінде ем алып жатқан балалардың ата-аналарымен кездесіп, жағдайларын сұрады. Басқарма басшысымен кездесу кезінде емделушілер мәселелерін ортаға салды. Пациенттерден түскен өтініштер бойынша басқарма басшысы медициналық көмек көрсету үшін жұмыс жүргізетінін жеткізді.
Айта кетейік, биыл аталған орталықта ағымдағы жөндеу жұмыстары жүргізілген. Нақтырақ айтқанда, орталықтағы қабылдау бөлімі мен дәліздердің едені жаңартылып, емделушілер үшін қолайлы жағдай жасалды. Сондай-ақ басқарма басшысы оңалту орталығында жөндеу жұмыстарын жүргізу бойынша салаға жауаптыларға бірқатар тапсырмалар беріп, ұсыныс енгізуді тапсырды.
«Мейірім» оңалту орталығы 130 төсек орынға арналған емдеу мекемесі. Мұнда 3 және 18 жас аралығындағы соматикалық және неврологиялық аурумен есепте тұратын балалар оңалтудан өтеді. Бұл үшін орталықта физиотерапия, массаж, емдік дене шынықтыру бөлімі, парафин кабинеті, электр тогымен ұйықтау, монтессори, сенсорлы бөлмелер жұмыс істейді. Жыл сайын орталықта 2400 бала медициналық оңалту емін алады.
