Оңтүстікте өсірілген 18 тонна алманың алғашқы топтамасы Атыраудағы «Сарайшық» базарына 20 қаңтарда саудаға шығарылды, деп хабарлайды Атырау облыстық өңірлік коммуникациялар қызметі.Жеткізушілер қалалық әкімдікпен келісімшартқа отырып, жемістерге нарық құнынан төмен баға бекіткен. «DALA-FRUIT» компаниясының басшылығы тұрғындардың отандық ауыл шаруашылығы өнімдеріне деген сұранысы мен қызығушылығын арттыру мақсатында қалалық әкімдікке өтініш білдірді. Қазір Атырауға бірінші сұрыпты алманың үш түрі әкелінді, олар базар нарығынан 15-20 пайызға арзанға сатылады», – дейді қалалық кәсіпкерлік және туризм бөлімінің басшысы Руслан Дәулетов.
Коммуналдық базарда оңтүстіктен келген алмалардың бір келісі 230 теңгеден сатылуда. Негізі алманың орташа бағасы – 400 теңге. Сатылымның алғашқы күнінен бастап тұрғындардың отандық өнімге деген сұранысы жоғары екені байқалды. Жарты күннің ішінде бір тоннаға жуық алма сатылған. Алдағы уақытта компания өкілдері алманы Атырауда да өсіруге ниетті. Облыстық әкімдік хабарлағандай, кәсіпкерлерге мемлекеттік қолдау шаралары көрсетіледі.
