Шымкентте мүлікті заңдастыру жұмыстары жалғасуда. Осыған орай, қалаға қарасты үш аудан әкімдіктерінде құрылған комиссия мүшелері құжаттарды қабылдап, түсіндіру жұмыстарын жүргізуде.
Бірінші қыркүйектен бастап Елбасы Н. Назарбаевтың тапсырмасы бойынша елімізде мүлікті жария ету науқаны басталғаны белгілі. Айта кетейік, заңнамада мүлік жөнінде ұсынылатын мәліметтердің толықтығы мен анықтығы үшін азаматтардың жауапкершілігіне басымдық берілген. Жария етілген мүлікті рәсімдеу қызметіне қатысты барлық шығынды жария етуші төлейді.
Шымкенттегі үш аудан әкімдіктерінде де бұл жұмыстар қызу қолға алынған. Мәселен, Еңбекші ауданы бойынша 18 өтініш келіп түскен. Оның 11-і қаралуда, ал 5 құжат кері қайтарылды. 18 миллион теңгенің екі құжаты жария етілді. 223 келушіге құжаттарының толық болмауына байланысты түсіндіру жұмыстары жүргізілген. Еңбекші ауданы әкімінің орынбасары
Д.Амангелдиевтің айтуынша, Сайрам және Төлеби аудандарынан қалаға қосылған елдімекеннің 800-ден астам тұрғынына мүлікті заңдастырудың жолдары түсіндірілген.
Абай ауданы әкімі аппараты жанынан құрылған мүлікті жария етуді өткізу жөніндегі комиссиясына науқан басталғалы бері 81 075 000 теңгені құрайтын 10 өтініш қаралып, жылжымайтын мүлікті жария ету бойынша шешім шығарылды. Комиссия хатшысы С.Маралбаеваның айтуынша, жалпы, 399 келушіге мүлікті жария ету бойынша ақпараттар беріліпті. Бүгінгі таңда 323 490 000 теңгені құрайтын 43 өтініш қабылданған. Комиссия 34 өтінішті қарап, оның 23-і бойынша жария етуден бас тартты. Қазіргі уақытта комиссия 9 өтінішті қарауда.
Ал, Әл-Фараби ауданы бойынша бүгінгі күнге дейін бірде-бір жылжымайтын мүлік заңдастырылмаған. 350 келушіге түсіндіру жұмыстары жүргізілген. 17 өтініш қабылданып, оның 10-ы комиссия қарауында. Әл-Фараби ауданы әкімдігі жанынан құрылған комиссияның хатшысы Д.Шындалиевтің айтуынша, бірде бір мүліктің заңдастырылмау себебі- әртүрлі, әсіресе, қаланың бас жоспарына сай келмейтін жылжымайтын мүлік саны басым екен.
