Альянс фотолары 1

Пандемия мен оның салдарынан туындаған карантин ел өміріне елеулі өзгерістер алып келді. Күнделікті тіршілік ағымы бұзылып, материалдық құндылықтың емес, адами қасиеттің маңызы арта түсті. Қиын жағдайда адамдар бір-біріне көмек қолын созып, қоғам белсенділерінің қатары артты. Сол қоғамның белсенді мүшелерінің қатарында үкіметтік емес ұйымдар да бар. Түрлі қоғамдық бірлестіктер мен бастауыш ұйымдар Шымкентте Азаматтық Альянстың аясына біріккен. Коронавирус індетімен күрес кезінде Альянстың жұмысы қалай өрбігені туралы Азаматтық Альянс заңды тұлғалар бірлестігінің президенті Жұмағали Білісбековтен сұрап-білген едік.

 

Альянс фотолары 3

 

Халық пен билік арасындағы алтын көпір

– Жұмағали Дәулетбекұлы, елдегі карантин күн тәртібінен түспей тұр. Ендеше, әңгімені тікелей тақырыптан бастап, пандемия кезінде атқарған жұмыстарыңыз туралы өзіңізден білсек...
– Мемлекет басшысының Жарлығымен елде төтенше жағдай жарияланып, карантин енгізілген соң біздің де жұмысымыз бұрынғыдай қарқынмен болмаса да тоқтап қалған жоқ. Президенттің бастамаларына барынша қолдау көрсетіп, жүзеге асыруға тырыстық. Себебі, үкіметтік емес ұйымдар – әрдайым халықпен бірге. Біз өзіміз халық арасынан шықтық, қарапайым тұрғындармен қоян-қолтық жұмыс істейміз.
Ең алдымен, індеттен қорғану және карантин талаптарын сақтау шараларын көпшілікке түсіндіру жұмыстарына атсалыстық. Азаматтық Альянсқа мүше үкіметтік емес ұйымдардың белсенділері, еріктілер әлеуметтік желі, бұқаралық ақпарат құралдары арқылы тұрғындарға түсіндірдік.
Карантин салдарынан көптеген адам жұмыссыз қалғаны жасырын емес. Осы тұста қолдан келгенше моральды тұрғыдан қолдау көрсетуге тырыстық. Бұл тұста жергілікті атқарушы билікке көмектестік деп айта аламын. Былайша айтқанда, билік- халық- кәсіпкерлер арасындағы алтын көпір болып жүрген жайымыз бар.
Елбасының бастамасымен құрылған «Біргеміз» қоры халықтың әлеуметтік әлсіз санатындағы тұрғындарға қаржылай көмек көрсеткенін өздеріңіз де білесіздер. Біздің Альянстың 4 өкілі Nur Otan партиясының Шымкент қалалық филиалымен бірге «Біргеміз» қорының қамқоршылық кеңесінің құрамына мүше болып кіріп, мұқтаж отбасыларға көмек көрсетуге белсене атсалыстық. 50 мың теңге қаржылай көмек пен азық-түлік себеттерін үйді-үйге еріктілермен бірге тараттық. Бетперделер үлестірдік.

 

Альянс фотолары 6Альянс фотолары 9

 

Азаматтық Альянс – алдыңғы қатарда

– Әлеуметтік қолдаудан бөлек өз тараптарыңыздан көрсетілген көмек туралы айтып өтсеңіз?

– Жалпы, айта кетейін, Азаматтық Альянсқа бюджеттен тікелей қаржы бөлінбейді. Бізге мүше ұйымдар түрлі гранттар, конкурстарға қатысып, соның аясында бөлінген қаржымен жұмыс істейді. Дегенмен, қаржы бөлінбейді деп, ешқашан қол қусырып отырған емеспіз. Жоғарыда айтып өткендей, болмағанда моральдық қолдау көрсетіп, түсіндіру жұмыстарымен айналысамыз. Ал карантин кезінде өз қаржымызға мұқтаж жандарға көмек көрсеттік.
Атап айтар болсам, елімізге белгілі «Сана-Сезім» қоғамдық бірлестігі пандемия кезінде шекаралық аймақтарда қалып қойған шетелдік азаматтарға көмек көрсетті. Төтенше жағдай жарияланып, барлық жолдар жабылған соң елдеріне қайта алмай қалған Тәжікстанның 12, Молдованың 72 азаматына азық-түлік жеткізіп берді. Олар біздің елде жұмыс істеп жүрген, карантин жарияланған соң қиын жағдайда қалғандар болатын. Сонымен қатар өзге елдерден көшіп келіп, Қазақстан азаматтығын алып үлгермеген тұлғалардың құжаттарын рәсімдеуге көмектесуде, тегін заңгерлік көмек беруде. Өздеріңіз білесіздер, көшіп келгендер тұрмақ ел азаматтарының құжаттарын рәсімдеу кейде қиынға соғып жататыны бар.
Азаматтық Альянстың негізін қалаушылардың бірі Клара Әліпова 7 отбасыға 60 мың теңгенің көмегін көрсетті. Альянстың атқарушылық қызметіндегі 4 адам болып біз де І топ мүгедектері, төсек тартып қалған науқастары бар 70 жанұяға азық-түлік жеткізсек, Чернобыль апаты ардагерлерінің одағы да өздерінің жағдайы шылқып тұрмағанына қарамастан, жағдайы мүшкіл 23 отбасыға қол ұшын созды.
Былтырғы Арыстағы апат кезіндегідей, биыл да Мақтааралдағы су басудан зардап шеккен отбасыларға көмектен Альянс мүшелері шет қалмадық. Қолдан келгенше қаржы жинап, мұқтаж отбасылардың тікелей өздеріне тапсырдық. «ASAA» жастар қоғамдық бірлестігі, ACCESS түлектері 100 отбасыға азық-түлік, 50 балаға арналған жиынтық жеткізді.
«Шымкент қалалық мүгедектер қоғамы» қоғамдық бірлестігі Мақтараалдағы эвакуация кезінде арнайы көліктерімен мүгедектерді тасымалдады.
Қазіргі сәтте бизнестің өз жағдайы да оңып тұрмағаны белгілі. Дегенмен, қайырымдылыққа үлес қосатын кәсіпкер азаматтарымыз баршылық екенін айта кетейін. Атын атамауды сұраған бір кәсіпкер 1 500 000 мың теңгеге демеушілік жасап, Азаматтық Альянстың мүшелері мен ерікті жастар 140 азық-түлік себетін әзірледік. 46 адамнан тұратын еріктілер тобы ол көмекті тек Шымкентте ғана емес, Леңгір қаласындағы мұқтаж отбасыларға жеткізіп берді. Тағы бір бизнесмен азамат 500 үйге азық-түлік жеткізіп берді.
Шымкент қаласының «Әйелдер кеңесі» қоғамдық қоры Ұлы Отан соғысының 50 ардагеріне, «Рақмет, саған, Анашым!» орталығына көмек көрсетті.
Карантин кезінде 12 адам жұмысқа орналастырылды. Қашықтан сабақ оқуға көмек болсын деп, әлеуметтік әлсіз саналатын 7 отбасының балаларына планшет сыйладық. Осынау жұмыстың барлығына бізге еріктілер көмектесуде. Ал жалпы айтсақ, үкіметтік емес ұйымдарының барлығы да, біздің өзіміз де еріктілерміз.

 

Альянс фотолары 8

 

Карантиннен кейін

– Қалай десек те пандемиядан кейін де өмір жалғасатыны белгілі. Осы тұста алдағы жоспарларыңыз бар ма?

– Неге болмасын? Дәл қазіргі таңдағы мақсатымыз – карантиннен кейінгі өмірге дайындықты пысықтау. Ең алдымен, жоғарыда айтып өткенімдей, төтенше жағдай салдарынан жұмыссыз қалған немесе шаруасы тоқтап қалған азаматтарды қолдау керек. Қоғамдық ұйымдар ретінде сол қоғамымыздың мүшелеріне әлеуметтік-психологиялық көмек көрсетеміз. Азаматтардың жұмыс табуына сеп болу барысында қоғамның әлсіз мүшелері – мүгедектер де назардан тыс қалмайды. Мүмкіндігі шектеулі азаматтардың бұған дейін жұмыс табуына атсалысып келгеніміз көпшілікке белгілі. Бұл бағыттағы жұмыс бұрынғы қарқынмен жалғаса береді.
Тағы бір маңызды тұс – қоғам белсенділетін тәрбиелеу. Осы көктемдегі бүкіл әлемге, оның ішінде Қазақстанға төнген қиын жағдай қоғам болып, бір тұтас жұмылудың маңыздығын көрсетіп берді. Ал сол қоғам әрқайсымыздан – қоғамның белсенді мүшелерінен құралады. Ендеше, қоғам белсенділерінің сапалы жұмысынан біздің азаматтық қоғам да нығая түспек!

– Әңгімеңізге рақмет.

Жолдар 1

Карантин құрылысқа қолбайлау емес. Шымкентте үй соғумен бірге жол жөндеу жұмыстары да тоқтаусыз жалғасуда. Мегаполистің бұл саладағы тынымсыз тіршілігінің тынысын білу үшін Шымкент қалалық жолаушылар көлігі және автомобиль жолдары басқармасының мамандарына хабарласқан болатынбыз.

ЖОЛДАР, ЖОЛДАР...

Шымкентте жол саласын дамыту мақсатында 256 нысанның жөндеу-құрылыс жұмыстарына бюджеттен жалпы сомасы 26,9 млрд теңге қаралған. Оның ішінде республикалық бюджеттен – 4,8 млрд, ал жергілікті бюджеттен – 9,8 млрд теңге бөлінді.Жөнделуге тиісті 256 нысанға жалпы ұзындығы 418 шақырым жол, 7 көпір, 2 жолайырық, 1 оң жақ өткел мен 1 жерасты өткелі жатады. Нәтижесінде биыл 240 нысан пайдалануға беріледі деп күтілуде. Арасында 6 көпір мен 1 жерасты өткелі бар.
Қазіргі таңда 94 нысанда құрылыс-монтаж жұмыстары жалғасуда. Олар – 44,5 шақырым жол, 2 көпір, 2 жолайырық пен бір жерасты өткелі. Ал көктемде 1 көпір мен жерүсті өткелі ашылып, ел игілігіне берілгені көпшілікке белгілі.
– Құрылысы жүріп жатқан 15 нысанның ішінде Қонаев даңғылының жалғасы, Ақтас, Достық, Көкбұлақ, Нұртас, Қайнарбұлақ, Самал-1 шағынаудандарындағы жолдар мен Әл-Фараби көшесінің, Н.Назарбаев даңғылының жалғасы, әуежайға баратын жол, Бадам өзеніндегі автокөлік көпірі, Рысқұлов-Қонаев даңғылдарының қиылысындағы жолайырық бар. Бұл жолдардың көбісі әлеуметтік маңызды нысандарға апарады. Мысалы, Достық шағынауданындағы жол – мамандандырылған ХКО-ға, Көкбұлақтағы жол – көлік-логистика орталығына, Нұртастағы жол – балабақшаға, ал Қайнарбұлақтағы жол 1200 орынды мектепке бағыт алады, – дейді қалалық жолаушылар көлігі және автомобиль жолдары басқармасы басшысының орынбасары Абай Тұрханов.

ҚАЙТА ҚҰРУ МЕН ҚҰРЫЛЫС

Жол саласындағы жұмыстар негізінен қайта құру мен жөндеу болып бөлінеді. Биыл шаһарда 10 нысан – 13 шақырым жол, 3 көпір, 1 оң жақ өткел қайта құрылады деп жоспарланған. Бұлардың қатарында А-2 автожолы мен Темірлан тасжолының қиылысындағы көлік өткелдері, А-2 автокөлік жолының бұрынғы қоқыс полигонынан Ынтымақ шағынауданына дейінгі бөлігін жөндеу, Жібек жолы, Төреқұлов, Адырбеков, Бадам өзеніндегі автокөлік көпірлері мен Сайрам су өзеніндегі Леңгір бағытындағы көпірді қайта құру жұмыстары бар. Бұған қоса 50 шақырым жол мен 2 көпір толық жөнделіп, 308 шақырым жол орташа жөндеуден өтеді.
– Биыл жалпы, 223 нысан пайдалануға берілсе, 2 нысан 2021 жылға өтпелі. Осы мамыр айының соңына дейін 136 нысан, ал маусым-тамыз айларында 75 нысан ашылады деп күтілуде. Күзде тағы 5 нысан пайдалануға берілмек. Ал Республика даңғылы мен Рысқұлов көшесін орташа жөндеуден өткізу 2021 жылға өтпелі, – деді Абай Әбдіманапұлы.
Басқарма мамандары тек жолдар мен көпірлерді жөндеп қана қоймай, тұрғындарға қызмет көрсетілуін бақылайды. Мысалы, қалаға қарасты 4 аудандағы жалпы ұзындығы 90 шақырым жолды қамтып, жол сызықтарын, жол қозғалысын реттеуді күтіп-ұстауды басқарма мамандары атқарады.
– Айта кету керек, бұл шаруаларға жергілікті тұрғындар көптеп тартылуда. Әсіресе, жұмыссыз азаматтарды еңбекпен қамту басты назарда тұр, – дейді басқарма өкілдері. Мысалы, «Жұмыспен қамтудың жол картасы» бағдарламасы аясында биыл 3198 адам жұмылдырылмақ. Оның ішінде 1621 адам жұмыспен қамту орталығы арқылы жұмыссыз азаматтардың қатарынан алынады.

ҚОНАЕВ ДАҢҒЫЛЫ

Құрылыс барысында қалалық маңызы бар көшелерді дамыту да қолға алынған. Қазіргі таңда магистральді жолдардың 94 шақырымында құрылыс жүруде. Оның ішінде Қонаев даңғылының жалғасы мен айналма жолды қайта құру іске асырылмақ.
Басқарма мамандары мұндай ірі жобалар қаладан шығатын барлық бағытты қамтып отырғанын айтады. Мысалы, Ташкент, Түркістан және Алматы бағыттарына шығатын жолдар желісінің құрылысы қарқынды жүріп жатыр. Көлік ағынын өткізу қабілеті жоғары, заманауи талаптарға сәйкес бұл автокөлік жолдары 2023 жылға дейін пайдалануға берілмек.
– Қонаев даңғылын жалғайтын құрылыстың ұзындығы 21 шақырым болмақ. 2019-2023 жылдар аралығында атқарылатын бұл құрылыс 8 кезеңнен тұрады. Осы орайда жол құрылысы белдеуіне түсіп отырған 475 нысан мемлекет мұқтажына алынады, – деді басқарма басшысының орынбасары.
Қонаев даңғылы – мегаполистегі күре жолдардың бірі. Оның жылдар бойы Түркістан көшесіне тіреліп, тұйықталып қалған бөлігінде былтырдан бері құрылыс жалғасуда. Бұл жұмыстар қала әкімдігінің назарында екенін жуырда қала басшысы Мұрат Әйтеновтың құрылыс басына арнайы барып, танысуынан аңғаруға болады. Әкім даңғылдың Ескі қалашық арқылы өтетін бөлігінің құрылыс барысын байқады. Жауапты мамандар қала басшысына мұндағы күре жол өтетін жерге орналасқан үйлердің дені сүріліп, топырағы алынғанын баяндады. Қазір тас төсеу жұмыстары жалғасуда. Жалпы, құрылыс бекітілген кесте бойынша жүруде.
– Қонаев даңғылын ұзарту жобасының бірінші учаскесі 580 метр ұзындықты қамтиды. Қазір мұндағы кәріз жүйесі мен электр бағаналары, газ жүйесі алынуда. Мұнан бөлек, бұл жердің топырағы құрылысқа жарамсыз. Сондықтан топырағы тазартылып, тас төселуде, – деді қалалық жолаушылар көлігі және автомобиль жолдары басқармасының автомобиль жолдары бөлімінің басшысы Қайрат Баймендиев.

ІШКІ ОРАМДАР ДА – НАЗАРДА

Ірі көшелер ғана емес, шағынаудандар мен елдімекендердегі көшелер де жаңарады. 2020 жылы осы көшелерді күрделі және орташа жөндеу, шағал тас төсеу жұмыстарына 16,5 млрд теңге бөлініпті. Жалпы ұзындығы 50 шақырым болатын 69 көше күрделі жөнделеді. Ал 207 көшеде (290 шақырым) орташа жөндеу жұмыстары атқарылады. Тағы 90 шақырым жолға шағал тас төселмек.
Жалпы, Шымкент қаласындағы автокөлік жолдарының жалпы ұзындығы 2 980 шақырымды құрайды. Оның ішінде 1758 шақырымға асфальт төселсе, 1107 шақырым тас жол бар. Ал 111 шақырымы – топырақ жол. Жолдардың 56,5 пайызы немесе 1 682 шақырым жолдың жағдайы жақсы және қанағаттанарлық деп саналса, 43,5 пайызының (1 295 шақырым) жағдайы сын көтермейді. Оның ішінде 1219 шақырым шағал және топырақ жол, ал 873 шақырымы – шалғай елдімекендерге тиесілі жол болып тұр.

 

Сұрапыл соғыстың оты өшіп, Ұлы Жеңістің туы желбірегеніне, міне, 75 жыл толды. Бүгінгі ұрпақ үшін ол дүбірлі мереке болғанымен, бұл жеңістің өтеуі тым ауыр болғанын ұмытпауымыз керек. Миллиондаған майдангер фашистік Германиямен соғыста Отан үшін, бейбіт болашақ үшін жан беріп, жан алысты.

Қан майданда от кешіп, мұз жастанған жауынгерлермен бірге тылдағы халық та күндіз-түні ауыр еңбектің азабын тартты. «Екінші майдан» атанған тылдағы еңбектің есебі алғы шептегі ерліктен кем түспей, өтеуі жеңіспен қайтты.

145

Ұлы Отан соғысы жылдарында тылда да еңбек етіп, майданда да ерлік көрсеткен ардагерлеріміз аз емес. Солардың бірі – Қолатай Мыңқожаұлы.

1897 жылы сол кездегі Шымкент облысы, Алғабас ауданы, Шалдар ауылында туған Қолатай қария екінші дүниежүзілік соғыс басталғанда 44 жаста болатын. "Бұл кезде ол совхоз шаруашылығында еңбек етіп жүрген екен", – дейді ардагердің ұлы Жарас Қолатайұлы.

– Әкем 20-жылдары колхоздастыру жұмысына араласып, еңбегі еленген соң совхоздың фермасын басқарады. Соғыс басталғанда 18-30 жастағы жігіттер алдыңғы лекпен майданға аттанғаны белгілі. Әкем сияқты орта жастағы кісілер алдымен тыл тіршілігі ақсап қалмас үшін, елде қалып, еңбек етеді, – дейді ардагердің ортаншы ұлы.


Дегенмен, соғысқа тағы тың күш қажет болғанда 46 жастағы Қолатай Мыңқожаұлы да жұбайы мен тұңғыш қызын соңында қалдырып, 1943 жылдың 10 қазан күні майданға аттанады. Сол жылдың қысында Беларусь шебіндегі жағдай қиын болатын. Бірер ай дайындықтан соң Қолатай-жауынгер Беларусь майданындағы 45-гвардия, артиллерия полкының құрамында алғы шепке түседі.


Минометшілер ротасында жаумен айқасқан жерлесіміз қылшылдаған жастармен қатар майдан даласында ерен ерліктің үлгісін көрсете білді. Сондай бір ұрыс қызған қыстың аязды күндерінде ефрейтор Қолатай фашистің 6 бірдей ДОТ-ының күлін көкке ұшырған. Ал ДОТ – негізінен таспен қаланып, жан-жағы нық бекітілген, ішінде онға жуық адам ұзақ уақыт ұрыс жүргізуге арналған қарулы нүкте. Әдетте шабуылға шыққандардың жолын бөгеп, ұзақ уақыт бас көтертпейтін ДОТ соғыс кезінде Қызыл армия жауынгерлеріне жақсы таныс болатын. Сондықтан, майданда әсіресе ДОТ-тардың көзін жойған сарбаздардың ерлігі ерекше еленетін болған.


– Әкемнің айтуынша, ол кезде майдан шебі Калининград түбінде болатын. Күннен күнге шегініп бара жатқан жау өліспей беріспеуде. Жолындағы әр қыратты бекініске айналдырып алған. Бір күні Домелькайм деген елдімекенді фашистерден азат ету керек болады. Деревняға мықтап бекінген немістер біздің шабуылға барынша тойтарыс беруде. Әдеттегідей, алдымен ауыр артиллерия біраз төпеп алып, соңынан жаяу әскер аттанады. Алайда, тас-қамалға жасырынған жау оқ боратып, біздің жауынгерлерге бас көтертпепті. Содан командирлер минометшілерді аттандырады. Жауып тұрған оқтың астымен алғы шепке шыққандардың арасында әкеміз де бар екен. Содан қаруластарымен бірге шалт қимылдап, өзінің минометімен 6 ДОТ-тың тас-талқанын шығарады. Дәл көздеп, жасырын оқ боратып жатқан фашистердің желкесін қиған. Сол батылдығы үшін ұрыс аяқталғанда полк басшыларынан мадақтау естіген, - дейді Жарас ақсақал.


Жауынгерлердің ерлігі елеусіз қалған жоқ. Жеңіс қуанышы жарияланып, кескілескен шайқастарда көзге түскендер әскери марапаттарға ілінеді. Сөйтіп 1945 жылдың 10 маусымы күні КСРО Жоғарғы Кеңесі Президуымының бұйрығымен Қолатай Мыңқожаұлы «Ерлігі үшін» медалімен марапатталады.


Бұл марапат гвардия ефрейторына майдан даласында жетті. Соғыстың соңына дейін қатысып, фашистік Германияны ойсырата ұтқан совет армиясының жауынгері Қолатай бұл кезде Жапон жерінде болатын. Алып материктің екінші басындағы майданға жіберілген жерлесіміз ол соғыста да аянып қалмады. 1945 жылдың күзінде жеңіспен елге оралған соғыс Қолатай Мыңқожаұлының кеудесіне «Жапонияны жеңгені үшін» медалі тағылды.


Соғыс ардагері елге оралған соң майданға дейінгі кәсібін жалғастырады. Ферма басқарып, ұзақ жылдар шаруашылық тіршілігіне үлесін қосқан. Жұбайы екеуі 12 ұл-қыз сүйеді. Балаларын тәрбиелеп, ел қатарына қосқан ақсақал абыроймен зейнетке шығады. 1985 жылы 88 жасында дүние салған қарт жауынгердің ұл-қызынан тараған 21 немересі мен 62 шөбересі, 17 шөпшегі батыр аталарының ерлігін қастер тұтып келеді.

SHYMKENT: Қала құрылысы қарқынды

Среда, 29 Апрель 2020 00:15

5d42ae8516194

Төтенше жағдайға байланысты карантин жарияланғанына қарамастан, шымкентте қала шаруашылығы тоқтап тұрған жоқ. Мегаполистегі жұмыс жалғасуда. Сондай саланың бірі – құрылыс саласы

ҚАСБЕТТЕР ЖАҢАРУДА

Оған қала көшелерін аралап шықсаңыз, көз жеткізесіз. Әсіресе, Шымкенттің орталық көшелерінің бірі – Республика даңғылының бойы анағұрлым өзгеріп қалды. Тіпті, карантиннен кейін көшеге шыққан тұрғындар танымай да қалуы мүмкін. Даңғыл бойындағы көпқабатты үйлердің қасбеті жөнделіп, барлығы бір келбетке еніп қалған.


Көпқабатты тұрғын үйлердің қасбетін жаңартып, қажет болса жөндеу жұмыстары ақпан айының соңында басталды. Бұл – Шымкенттің 2020 жылы ТМД-ның мәдени астанасы атануына орайластырылған ауқымды шараның бір бөлігі болатын. Өкінішке қарай, әлемді жайлаған коронавирус пандемиясы мәдени-көпшілік іс-шараларды былай қойғанда, күнделікті өмірімізге өзгеріс алып келді. Салтанатты жиындар мен қоғамдық іс-шаралар тоқтады.


Өтенбаев Ғалымжан 1

Дегенмен, бірқатар жұмыспен бірге осы тұрғын үйлерді жөндеу жұмыстары да карантин кезінде аяқсыз қалмады. Қалалық құрылыс басқармасының бақылауымен басталған жоба межесіне жетті, деп мәлімдеді басқарма мамандары.


 – Өздеріңізге белгілі, Шымкенттің ТМД елдерінің мәдени астанасы атануына орай жыл басынан қаламызда ілкімді істер мен ауқымды жобалар қолға алынған, – дейді Шымкент қалалық құрылыс басқармасы басшысының орынбасары Ғалымжан Өтенбаев. Соның аясында биылғы ақпан айында қала әкімі Мұрат Әйтенов шымкенттік ірі кәсіпкерлермен кездесті. Басқосуда мәдени астана жылы аясында атқарылар жұмыстар туралы ұсыныстар талқыланғанда қаламыздың кәсіпкерлері өздері бастама көтеріп, орталық көшелердегі үйлердің қасбеттерін жаңартуға ұсыныс жасады.

 

Үйлер 1Үйлер 7

 

МЕЦЕНАТТАР ТАРТУЫ

Осылайша құрылыс басқармасының мамандары жөнделуі қажет 71 үйдің тізімін жасайды. «Бұл үйлер негізінен 1960-1980 жылдары салынған, содан бері көбісі жөнделмеген», – дейді мамандар. Үйлердің жағдайы зерделеніп, қасбеттерін ретке келтіру жобасы 2 кезеңмен жүзеге асырылмақ болып бекітіледі.


Жөнделетін үйлердің дизайнын қалалық сәулет және қала құрылысы басқармасының мамандары жасап, бекіткен соң барлық жұмыс сол біркелкі эскизге сай атқарылады. Ең бастысы – құрылыс материалдары мен жұмысшылардың еңбекақысы секілді мердігер мекемелердің барлық шығынын кәсіпкерлер көтерген. Бұл жұмыстарға бюджеттің бір тиыны да жұмсалған жоқ.


Жобаның бірінші кезегінде қаланың орталық көшелері – Республика және Тәуке хан даңғылдары бойындағы үйлердің қасбеттері ретке келтірілді. Бүгінде мұндағы 43 үйдегі жөндеу жұмысы толық аяқталған. Оның ішінде Абай ауданы бойынша - 17 үй, Әл-Фараби ауданы бойынша - 24 үй бар. Жалпы ауданы 42 000 шаршы метр қасбетті жөндеуге 250-ден астам жұмысшы жұмылдырылды.


Жалпы, жөндеу жұмыстарына жергілікті «Отау-Строй», «А.Р.Т-Құрылыс», «Корпорация Ақ Ордасы», «Қаз Медео Гранд», «Kanfar Building» «Шымкентстрой», «Югстройсервис-Н», «Dala-Сonstruction», «Бекстройсервис», «Лидер-НК», «Дани Нан», «Автогаз Трэйд» сынды 12 компания демеушілік көрсетті.


Барлық үйлердің сырты заман талабына сай мәрмар тастармен қапталып, шатырлары жөнделіп, сырты сырланып, балкондары біркелкі үлгіге келтірілген. Ал құрылыс басқармасының мамандары жөндеу жұмыстарына мониторинг жүргізіп отырды.
Енді екінші кезекте Темірлан тасжолы, Бейбітшілік және Жібек жолы көшелерінің бойында орналасқан көпқабатты 30 үйдің қасбеті жөнделеді деп күтілуде.

БАСПАНА – БАСТЫ НАЗАРДА

Жалпы, басқарма жұмысы карантинге қарамастан жалғасып жатқанын жоғарыда айттық. Ғалымжан Әмірбекұлы мекеме қызметкерлерінің 30 пайызға жуығы қашықтан жұмыс істеп, қалғаны күнделікті тәртіппен еңбек үрдісін жалғастырып жатқанын жеткізді. Атап айтқанда биыл Шымкентте барлық қаржы көздері есебінен көп қабатты 252 үй салынуда. Ол үйлердегі 13 636 пәтердің жалпы ауданы 1 053,1 мың шаршы метрді құрайды. Сонымен қатар, мемлекеттік инвестициялар есебінен 49,3 млрд теңгеге көпқабатты 126 үйдің құрылысы жоспарланған.


– Оның ішінде арендалық – 12, кредиттік 114 үйде жалпы саны 7489 пәтер бар. Ал биыл 6213 пәтерлі 107 үй пайдалануға беріледі. Сонымен қатар, нарықтан арендалық 696 пәтерді сатып алуға 8 млрд теңге бөлінеді. Республикалық бюджеттен – 5,4 млрд теңге, жергілікті бюджеттен 2,6 млрд теңге қаралмақ, – деді басқарма басшысының орынбасары.


Жалпы, жыл қорытындысымен баспана кезегінде тұрған азаматтар кредиттік - 5765, арендалық 1144 пәтермен қамтамасыз етіледі деп күтілуде.


Айта кетейік, жуырда шаһардағы үйлердің құрылысын аралаған қала әкімі Мұрат Әйтенов Шымкентте құрылыс қарқыны бәсеңдемейтінін, төтенше жағдай жұмысқа қолбайлау болмауы керек екенін мәлімдеген. Қала аумағында карантин жариялануына байланысты шеттен келіп істейтін қызметкерлердің бірқатары жұмысына қатынай алмай қалды. Осыған орай қазіргі таңда жергілікті азаматтар жұмысқа шақырылуда. Оған қоса қалалық жұмыспен қамту орталығына шаһар аумағындағы құрылыстарға қажет бетоншы, қыш қалаушы, сылақшы және дәнекерлеуші секілді мамандармен қамтамасыз ету мақсатында 443 маманға сұраныс берілген.


– Барлық мүмкіндікті қарастыра отырып, жұмысты жүйелеген жөн. Осындай сәтте өзге өңірлерден келіп, үйінде бос жатқан қолынан іс келетін мамандарды көптеп еңбекке тарту жағын қарастырған дұрыс. Дегенмен, азаматтардың қауіпсіздігі басты назарда болуы тиіс, – деді Мұрат Әйтенов.

 

0101

 

ШАҺАР ЖАУҺАРЫ – «SHYMKENT CITY»

Мегаполистегі жаңа шағынаудандағы құрылысты аралаған Мұрат Дүйсенбекұлы жауапты мамандарға үй құрылсына қажет материалдарды тасымалдайтын көліктерге қалада жүруге кедергі болмау керегін атап өтті. Оған қоса құрылыс заттарын сататын көтерме қоймаларға да мүмкіндік жасалғанына тоқталды.


Жалпы, биыл тамыз айында «Shymkent City» қалашығында 1048 пәтерлі 16 үй мен 2 инженерлік инфрақұрылым нысаны пайдалануға берілмек. Арасында француз сәулеті стиліндегі 16 қабатты үйлер де бар. Тұрғын үй кешені аумағында заманауи спорт алаңдары, автотұрақ бар. Қала әкімінің тапсырмасына сәйкес, бұл үйлердің төртеуі Қала күніне орай тапсырылмақ.


«Shymkent City» қалашығындағы құрылысты «Отау Строй» компаниясы жүргізуде. Бас инженер Абжат Акимовтың айтуынша, 360 пәтерлі үйдің негізгі жұмысы аяқталған. Қазір ішкі жөндеу және қасбеттерін қаптау жұмыстары атқарылуда.


Сонымен қатар 1200 орынды жаңа мектептің құрылысы аяқталған. Енді сол маңнан балабақша салынады. Қажетті инженерлік-инфрақұрылым тартылған, өз алдына модульді жылыту қазандығы бар. Бұған қоса қалашықта биыл жалпы ұзындығы 13,8 шақырымды құрайтын 7 көшенің құрылысы аяқталады деп күтілуде.


Айта кетсек, «Shymkent City» шағынауданының жалпы ауданы - 427 га, 12 орамға бөлінген. Соның ішінде, 24,5 га құрайтын І орамда мемлекет қаржысы есебінен жалпы құны 27 млрд теңгеге 43 нысанның құрылысы жоспарланған. Оның 39-ы – көп қабатты үйлер. Бүгінгі таңда қалашықта 25 нысан пайдалануға берілген, 23 үйдегі 1290 пәтерге баспана иелері қоныстанған.

Пейілге қарай пейіш бар

Среда, 22 Апрель 2020 02:03

Кәсіподақ 2

Еліміздегі төтенше жағдай кезінде көпшілік арасынан шыққан жомарт жандар індетпен күрестің алғы шебінде жүрген қызметкерлерге қолғабыс жасауда. Шымкенттегі осындай қайырымдылық акциясынан кәсіподақ мүшелері де қалыс қалмады. Жуырда Шымкент қаласының кәсіподақтар орталығының өкілдері «Біз біргеміз!» акциясын өткізді.

– Кәсіподақ мүшелері «Senim» денсаулық сақтау жүйесі жұмыскерлерінің салалық кәсіптік одағының қалалық филиалымен бірге ауқымды акция өткіздік. Оның аясында осындай қиын шақта күндіз-түні еңбек етіп жатқан медицина қызметкерлеріне қолдау көрсетіп, Шымкентте кіреберіске қойылған блок-бекеттердегі мамандарға ыстық тағам және сусын жеткізілді, – дейді «Шымкент қаласы және Түркістан облысының кәсіподақтар орталығы» аумақтық кәсіподақтар бірлестігінің төрағасы Берік Бекжанов.
Кәсіподақ қызметкерлері қаладағы мейрамханалардың біріне тапсырыс беріп, 12 блок-постағы 160 қызметкерге екі күн бойы түскі және кешкі ас-ауқат жеткізіп берген. Кәсіподақ ұйымы, сонымен қатар, мегаполистегі 3 медицина мекемесіне қаржылай қолдау көрсетті.
– Атап айтқанда Шымкент қалалық №2 көпсалалы ауруханасының ұжымына – 200 000 теңге, ЖИТС-тің алдын алу және оған қарсы күрес жөніндегі орталыққа – 300 000 теңге, ал қалалық жедел жәрдем станциясына 200 000 теңгенің сертификаты табысталды. Бұл қаржыны медицина мекемелері коронавирусқа қарсы күресте бетперде мен санитарлық-тазалық құралдарын алуға жаратады, – деді кәсіподақтар бірлестігінің төрағасы.
Бұдан бөлек «Senim» салалық кәсіподағының қалалық филиалына қарасты 34 мекемеде еңбек ететін 130 медицина қызметкеріне 5000 теңгелік купон берілді. Бұл купондарға «Метро» сауда үйінен азық-түлік алуға болады.
– Бұл қайырымдылық шараларына кәсіподақтар бірлестігі қорының қаржысы жұмсалды. Ол қаражат, ең алдымен, білім беру, денсаулық сақтау, банк ұйымдары сияқты түрлі салалық кәсіподақ ұйымдары мүшелерінің жарнасынан жиналған. Бұған қоса «Senim» кәсіподағы мен кәсіподақтың бірқатар мүшесі қайырымдылық акциясына қолдау көрсетіп, өз тараптарынан да қаржы қосты. Осылайша, «Көп түкірсе, көл болатынына» тағы да көз жеткіздік, – дейді Берік Айдарбекұлы.

 

Берік Бекжанов 3


Еліміздің басқа да қалалары секілді Шымкентте де жарияланған карантинге байланысты кәсіподақ бірлестігі де қашықтан жұмыс істеу тәртібіне көшкен. «Қазір жұмысқа 2-3 маман ғана келіп жүрміз, қалғандары күн талабымен онлайн жұмыс істеуде», – деді бірлестік төрағасы. Соған қарамастан төтенше жағдай басталғалы бері медицина мамандарына ғана емес, халықтың әлеуметтік әлсіз топтарына да қолдау көрсетіп, көмектерін аянып қалмауда.
– Кәсіподақ ұйымдарының бірлестігі қандай кезде де көпшілікпен бірге екенімізді білдіргіміз келеді. Жуырда Шымкент қаласында – 50, Түркістан қаласында 50 отбасына азық-түлік жеткізіп бердік. Оған қоса үшінші мегаполисте – 2000, облыс орталығында 1000 бетперде тараттық. Бұлардан бөлек жүзеге асырып жүрген қайырымдылық акцияларымыз жеткілікті. Ең бастысы - игі шаралар көпшілікке үлгі болып, мұқтаж жандарға қол ұшын созатындар көбейсе! – деген Берік
Айдарбекұлы қайырымдылық көрсетудің негізінде иісі мұсылманға тән «Оң қолың берген садақаны сол қолың білмесін» деген ұстаным жатқанына баса назар аударды.
Айта кету керек, коронавирус пандемиясы кезінде кәсіподақ ұйымдарына қарасты ғимараттар вирус жұқтырған науқастарды емдеуге арналған госпиталь ретінде ұсынылған. Ол ғимараттардың қатарында Қызылордадағы «Жаңақорған», Алматыдағы «Көктем» шипажайлары мен Нұр-Сұлтан қаласындағы тарихи «Турист» қонақ үйі де бар.

Карантиндегі қала

Среда, 08 Апрель 2020 05:46

56678

Шымкентте 4 сәуір күні сағат 21:00-ден бастап карантин режимі енгізіліп, тұрғындар мен көліктің барлық түріне Шымкент қаласынан шығуға және қалаға кіруіне тыйым салынды.

Қазіргі таңда қалаға кіретін жолдарда 18 блок-бекет орналасқан. Онда полиция департаментінің қызметкерлері мен дәрігерлер, ҚР Қарулы күштерінің сарбаздары мен прокуратура өкілдері жұмыс істеп тұр.
– Блок-бекеттердің әрқайсысы бейнебақылау камералары және дрондармен қамтылған. Солардың нәтижесінде тәртіп бұзбақ болғандар анықталды. Мысалы, карантин жарияланғаннан кейін 2 күн ішінде бекеттерде төтенше жағдай режимін бұзудың 3 жағдайы тіркелді. Ол азаматтар тәртіп сақшыларының нұсқауына бағынбай, блок-бекеттен заңсыз өтпек болған. Осы фактілер бойынша ҚР әкімшілік-құқық бұзушылық кодексінің 476-бабымен әкімшілік хаттама толтырылды. Ол бапта ескерту, 10 АЕК көлемінде айыппұл немесе 15 тәулікке дейін әкімшілік қамауға алу шарасы қарастырылған, - деп мәлімдеді Шымкент қалалық полиция департаментінің өкілі Ержан
Пайызбеков.
5 сәуірден бастап қаланың орталық даңғылдарында, ірі көшелердің қиылыстарында 19 полиция бекеті жұмыс істеуде. Онда инспекторлар әр автокөліктегі жүргізуші мен жолаушының жеке құжаттарын, қалада жүру себептері мен жол жүруге рұқсат қағаздарын тексереді.
– Азаматтардың қала аумағында себепсіз жүргені анықталса, алдымен ескертіледі. Егер оған құлақ аспаса, айыппұл салынады. Себебі, карантин кезінде адамдар мен автокөліктердің қозғалысы шектелуі тиіс. Айта кетейік, қала тұрғындарының кейбірі қолдан жасалған анықтамаларды пайдаланбақ болған. Ал заңды анықтамада қызметкердің ЖСН-і мен аты-жөні, мекенжайы, жұмыс орнының заңды мекенжайы мен БСН-і, мекеме басшысының немесе кадр бөлімінің ұялы телефоны немесе жұмыс телефоны көрсетіліп, мөр басылуы тиіс. Полицейлер сол телефонға қоңырау шалып, бұл азаматтың сол жерде жұмыс істейтінін анықтайды, - дейді Ержан Пайызбеков.
Жалпы, бүгінге дейін полицейлер карантин тәртібін бұзуға қатысты 609 әкімшілік хаттама толтырған. Соттың шешімімен 22 азамат әкімшілік қамауға алынып, 4 азаматқа айыппұл салынды.

 

Блок-посттар 5


Шымкентте карантин жарияланғаннан бері 18 блок-бекеттен ұзын-саны 1518 автокөлік пен 2958 азамат тексеріліп, қаладан шықты. Ал 1444 көлік қала аумағына кірген, ондағы 2486 адам біртіндеп тексерілді. «Одан бөлек, қаулы бойынша транзиттік көліктер де қала арқылы өте алады. Кешегі күнге дейін 2010 жүк көлігі, ондағы 3520 адам тексеріліп, қала аумағы арқылы өткен. Ал жалпы саны 8117 көлік тексеріліп, бірақ, рұқсаты жоқ болғандықтан, блок-бекеттерден өткізілмеді», деп хабарлады тәртіп сақшылары.
– Қалалық денсаулық сақтау басқармасы тарапынан блок-бекеттің жұмысын қамтамасыз ету мақсатында 18 жедел медициналық жәрдем бригадасы, бастапқы медициналық санитарлық көмек ұйымдарынан орта буында 45 медициналық қызметкер жұмылдырылған. Шаһар аумағындағы барлық емханалардағы фельдшерлер мен дәрігерлер, медбикелер жұмыс істеуде, - деп мәлімдеді қалалық денсаулық сақтау басқармасының баспасөз хатшысы Лаура Нахыпқызы.
Блок-бекеттердегі медициналық пункттердегі мамандар жалпы 52 сымсыз термометрмен, обаға қарсы 71 костюм жиынтығымен жабдықталған. Әр бригада тәулік бойы кезекшілікте тұрып, жұмыс істеуде.
– Блок-постта 24 сағат бойы жұмыс істеп, қазір үйге қайтып келген бетім осы, - деді біз қоңырау шалған фельджер Нұрдәулет Тұрғанбек. – Бір бекетте №11 емханадан мен және дәрігер бар. Оған қоса қалалық жедел жәрдемнің 3 адамдық бригадасы да кезекшілікте тұрады. Қалада қосымша шектеу шаралары енгізілгенге дейін Шымкентке кірген-шыққан адамдардың дене қызуын өлшеп, мәліметтерді жазып алып жүрдік. Ал 31 наурыздан бастап арнайы ережеде көрсетілген адамдар ғана кіреді.
Нұрдәулеттің айтуынша, қосымша шектеу шаралары енгізілген түні блок-посттарға адамдар көп жиналып қалғанымен, бүгінгі таңда күнделікті хабарландырулардың нәтижесінде қалаға кіріп-шыққысы келгендер саны азайған. Жас маман кезекшілік кезінде денсаулығы нашарлап кеткен нәрестелер мен ересектерге сол жердегі жедел жәрдем бригадасы көмектесіп, қажет болған жағдайда ауруханаға жеткізілетін айтты. Ал жуырда жүкті келіншектің толғағы келіп, полиция қызметкерлерінің алып жүруімен перзентханаға жеткізілді.

 

АСП онлайн 2

Сәуір айынан бастап қазақстандықтар атаулы әлеуметтік көмекті мемлекеттік органдарға бармай-ақ рәсімдей алады. Бұл – елдегі төтенше жағдайға байланысты. ҚР Еңбек және халықты әлеуметтік қорғау министрлігінің өкілдері осылай деп хабарлады.

– Әлеуметтік көмекті қайта тағайындау үшін мемлекеттік органдардың ақпараттық базалары арқылы сол азаматтардың деректері тексеріледі. Атап айтқанда тұрғылықты жері бойынша тіркеу, жылжымайтын мүліктің бар-жоғы, кірістер және т.б. салыстырылады. Егер отбасы құрамы өзгермеген жағдайда, АӘК тағайындауға өтініш қолда бар деректер негізінде қалыптастырылатын болады. Бұл үшін халықты жұмыспен қамту орталықтарының қызметкерлері І тоқсанда АӘК алған азаматтар үшін өз бетінше өтініш жасайды және АӘК тағайындау өлшемдеріне сәйкестігін тексереді, - деп мәлімдеді Шымкент қалалық жұмыспен қамту орталығының баспасөз қызметінің мамандары.
Орталық өкілдерінің мәліметінше, АӘК тағайындауға қажет барлық ақпарат, сондай-ақ, хабарламалар электронды пошта немесе мессенджерлер арқылы жіберіледі.
Ал 2020 жылдың І тоқсанында атаулы әлеуметтік көмек алмаған азаматтарға АӘК тағайындау үшін egov.kz порталы арқылы өтініш жіберу қажет. Әрі қарай жұмыспен қамту орталықтарының қызметкерлері құжаттарды мемлекеттік органдардың мәліметтер базасында тексеріп, өтініштің нәтижесін электронды пошта немесе мессенджерлер арқылы хабарлайды.
Бұл ретте елдегі төтенше жағдайға байланысты учаскелік комиссиялар көшпелі тексерулер жүргізбейді. Мамандар барлық қажет құжаттарды азаматтардан электронды пошта немесе мессенджерлер арқылы сұратады.
Айта кетейік, коронавирус таралуының алдын алу мақсатында Шымкент қаласы әкімдігінің халықты жұмыспен қамту орталығы 26 наурыздан бастап қашықтықта жұмыс жүргізу тәсіліне көшкен. Соған орай азаматтарды жеке қабылдау, орталық қызметкерлерімен қолма-қол қандайда бір құжаттарды қабылдау тоқтатылды. Қала тұрғындары жұмыспен қамту, әлеуметтік көмек және кәсіптік оқыту мәселелерімен аудандары бойынша өздерінің арыз-шағымдарын, сауалдарын +77023842118 WhatsApp нөміріне жолдай алады.
Одан бөлек азаматтардың өз аудандары бойынша белгіленген байланыс нөмірлеріне хабарласып, жауапты мамандарға мәселелері бойынша сұрақтарын қоя алады.

Абай ауданы бойынша:
Жұмыспен қамту – 87028188009, АӘК – 87751567636;

Еңбекші ауданы бойынша:
Жұмыспен қамту – 87776028841, АӘК – 87029628816;

Әл-Фараби ауданы бойынша:
Жұмыспен қамту – 87761764040, АӘК – 87756518689;

Қаратау ауданы бойынша:
Жұмыспен қамту – 87752141188, 8702 662 34 70, 8775 409 36 16, 8778 535 24 95, АӘК – 87085666244.

Жұмыспен қамту орталығы онлайн режимдегі жұмысқа көшкелі 1800-ден астам адамға АӘК бойынша қызмет көрсеткен. Қашықта жұмыс жүргізу енгізілгелі бергі 26-30 наурыз күндері аралығында 49 құжат қабылданып, 133 хабарлама электронды түрде таратылды. Бұған қоса 1663 ақпарат телефон арқылы берілген.
Сонымен қоса, елдегі қалыптасқан жағдайға орай жұмыспен қамту орталығының қызметкерлері ерікті ретінде де қолдан келген көмектерін аямауда. Атап айтқанда демалыс күндері орталықтың 40-тан астам қызметкері «Гауһар» тігін фабрикасы мен №5 колледжге барып, бетперде тігуге көмектесті.

1212

Шымкентте бүгінгі қалыптасып отырған эпидемиологиялық жағдайға байланысты қосымша шектеу шаралары қолға алынғаны белгілі. Коронавирус індетін алдын алу бойынша қалаға кіретін жолдарда 13 бекет жұмыс істеуде. Онда полицейлер тәртіпті қадағаласа, медицина қызметкерлері жолаушылар мен жүргізушілердің дене қызуын өлшеп, мәліметтерді жазып алуда.

Күні кеше мегаполистегі «Кәусар» шайханалар желісінің өкілдері осы бекеттердегі қызметкерлерге ыстық ас-ауқат таратты. Дәмхана басшылығы 5 бекеттегі мамандарға 130 кісілік палау жеткізіп берді.
– Халықтың қауіпсіздігі үшін блок-постта қызмет етушілерді қолдау мақсатында «Кәусар» ұжымы қамқорлық ақциясын ұйымдастырдық. Тәулік бойы бекетте тұратын мамандарға шайхана атынан тағам және сусындар берілді. Кешенді ас құрамында ыстық палаумен қоса нан, сусын және салаттары да бар, - дейді «Кәусар» шайханалар желісінің маркетинг қызметкері Райхан Ахымбаева.
Осылайша кәсіпкерлер елдегі төтенше жағдай кезінде қайырымды іске ұйытқы болып, қиындықтан шығуға үлестерін қосуда.

Страница 1 из 15