Алтыншы шақырылған Шымкент қалалық мәслихатының депутаты болып сайланған Нұрлан Бекназаров тағы да әріптестерінің сеніміне ие болды. Мәслихаттың алғашқы сессиясында депутаттар Нұрлан Құдиярұлын бірауыздан мәслихаттың хатшысы етіп сайлады.
Бұған дейін де IV және V шақырылымның мәслихат хатшысы болған азаматтың еңбегін көпшілік біледі. Сондай-ақ ол Шымкент қалалық мәслихатының II, III, IV, V шақырылымының депутаты болып төрт рет сайланған.
Н. Бекназаров 1964 жылы туған. Білімі жоғары, «Нұр Отан» партиясының мүшесі. Қаламыздың әлеуметтік-экономикалық дамуына елеулі үлес қосқаны үшін ҚР Президентінің 2015 жылғы 3 желтоқсандағы №124 Жарлығымен «Құрмет» орденімен марапатталған. Сонымен бірге, «Қазақстанның Құрметті мәслихат депутаты» наградасының да иегері.
Нұрлан Құдиярұлы халық қалаулысы ретінде Шымкент қаласының әлеуметтік-экономикалық дамуына белсене атсалысып, қоғамдық-саяси жұмыстардың үнемі басы-қасында жүретін мемлекетшіл азамат.
Өкілетті биліктің дамуына, депутат пен халықтың үйлесімді жұмыс атқаруына үлес қосып, халыққа қалтқысыз қызмет атқарып келе жатқан азаматқа сәттілік тілейміз!
