Алдағы он жылдықта еліміздегі мектеп бітіруші түлектер 500 мыңға жуықтайды. Ал білім ошағының табалдырығын аттайтын бүлдіршіндердің көрсеткіші тиісінше бірнеше есеге өспек. Бұл болжамды ҚР Білім және ғылым министрлігінің жанынан құрылған Қаржы орталығының өкілдері келтіріп отыр. Яғни, студенттердің жатын орны мен оқушы орындарының тапшылығы жыл санап артады деген сөз. Бұл ретте «білімге құштар осыншама жастың мәселесі қалай шешіледі?» деген сауал алдыңнан кесе-көлденең шыға келетіні рас.

 DSC8627

8 жылға - 152 миллиард теңге

Жыл сайын жаңа оқу жылы басталғаннан студент үшін жанды ауыртар мәселе – жатақхана «жыры» басталады. Ал бүгінгі студенттің басты мақсаты сапалы білім алу болса, ата-ана баласының білімді, білікті азамат атануын қалайды. «Қалауын тапса, қар жанар» деген бар. Ендігі кезекте аталған олқылықтың орнын толтыру үшін арнайы орталық құрылып, жаңа әлеуметтік нысандарды салуды бастап кетті.

Аталған орталықтың өкілдері үшінші мегаполиске де табан тіреп, 11-12 қыркүйек күндері «Атамекен» Ұлттық кәсіпкерлік палатасы, «Даму» кәсіпкерлікті дамыту қоры, «Shymkent» әлеуметтік-кәсіпкерлік корпорациясының алаңдарында «Road Show» форматындағы ақпараттық түсіндіру жұмыстарын жүргізді.

Онда ҚР Білім және ғылым министрлігінің «Қаржы орталығы» АҚ президенті Асқар Ибраимов, Студенттердің жатақханаларға операторлық ету бойынша департаментінің директоры Біржан Алимжанов, Білім беруді мемлекеттік қаржыландыру жүйесін дамыту департаментінің сарапшысы Балжан Әлбиева білім беру ұйымдарының мамандары мен мүдделі кәсіпкерлерге студенттер жатақханалары мен жеке меншік мектептер құрылысы кезінде мемлекеттік тапсырысты орналастыру механизмі бойынша кеңестер беріп, екінші тараптың сұрақтарына жауап берді.

– Жатақхана мәселесі шынында да өзекті. Зерттеп зерделей келе елімізде 90 мың жастың жатақханаға мұқтаж екенін анықталды. Негізгі сұраныс ірі қалалар мен мегаполистерде тіркеліп отыр. Алматы, Нұр-Сұлтан, Шымкент қалаларында республика бойынша ең көп студенттер шоғырланған. Елордада жатақханаға зәру 17 мың студент бар болса, Алматы қаласында бұл көрсеткіш 31 мыңға тең.

Ал үшінші мегаполисте білімгерлерге 8400 жатын орын қажет. Бұл – әртүрлі жоғарғы оқу орындары мен колледждерді қоса алғандағы көрсеткіш, – дейді «Қаржы орталығы» АҚ Студенттердің жатақханаларға операторлық ету бойынша департаментінің директоры Біржан Алимжанов.

Біржан Нұржанұлының айтуынша, кәсіпкерлерге осы мәселені шешу арқылы өз бизнесін жүргізуге мемлекет тарапынан мүмкіндік қарастырылып отыр. Ол үшін қомақты қаржы бөлінеді. Жалпы 2022 жылға дейін 75 мың орын жатақхана салу үшін мемлекет тарапынан 152 млрд. теңге қарастырылып отыр.

– Жеке кәсіпкер, үлкен құрылыс компаниялары, оқу орындары өз қаражаты есебінен жатақхана құрылысын жүзеге асырады немесе қайта жабдықтау арқылы іске қосады. Студенттер орналасқаннан кейін жаңадан салынған жатақханадағы әрбір орынға мемлекет тарапынан жыл сайын 122 АЕК, ал қайта қалпына келтіру жұмысына 47 АЕК көлемінде қаржы белгіленеді. Кәсіпкерге осылай мемлекеттік тапсырыс аясында 8 жыл көлемінде ай сайын қаржы аударылып отырылады.

Айта кететін жағдай, студенттердің жазғы демалыс кезіндегі аралық уақыт есептелмейді. Яғни, 9 ай бойы тиісінше қаражат кәсіпкерге келісім бойынша төленеді. Оған жалдау ақысын қосыңыз. Тапсырыс беруші ҚР Білім және ғылым министрлігі болса, «Қаржы орталығы» АҚ операторлық жасайды. Жатақхана пайдалануға берілгеннен бастап 20 жыл мақсатты түрде шектеу қойылады. Ол дегеніңіз, кәсіпкер мемлекеттік тапсырысты орындап болған соң да ұзақ мерзімде өз кәсібін одан әрі дөңгелетуі тиіс, – деді Б.Алимжанов.

Биыл орталықтың бастамасымен 60 жоба келісім-шарт негізінде жүзеге асырылуда. Оның ішінде 47-інде жеке кәсіпкерлер өтініш білдірген. Шымкентте жалпы 600 орындық 2 жатақахана ашылса, 241 орындық тағы бір студенттер үйінің құрылысы бітуге жақын. Қосымша екі нысан жыл соңына дейін пайдалануға берілмек.

Жеке мектептің жағдайы қалай?!

Қазақстан Республикасы Тұңғыш Президентінің студент жастардың өмір сүру жағдайын жақсарту жөніндегі Үшінші әлеуметтік бастамасын іске асыру және оқушы орындарының тапшылығын азайту мәселесі әлі де өзекті. Бүгінде елімізде 200 мыңға жуық оқушы орын тапшылығын сезінуде.

Шымкентте де бұл мәселені шешу жолында біраз жұмыстар атқарылып келеді. Қазіргі таңда шаһардағы 19 мектеп үш аусымда білім береді. Жаңа оқу жылында мектеп табалдырығын аттаған балақайлардың саны да жыл санап артып отыр. Шешім біреу – жеке меншік мектептер санын арттыру. Осылай білім сапасы мен үш ауысымды мектептердің мәселесін шешуге болатыны нақтыланған.

– Мемлекет басшысы 2023 жылдың соңына дейін үш аусымды оқытуды және жергілікті жерлердегі оқу орындарының тапшылығын жоюды тапсырған болатын. Бұл бүгінге дейін мемлекет есебінен құрылыс салу арқылы шешім тапқан. Алайда құрылыс қарқыны демографиялық және көші-қон процестерімен қатар жүріп жатқан жоқ. Осы мәселені ретке келтірудің бір жолы – мемлекеттік тапсырыс аясында жеке сектордан мектеп салу болып отыр. Мұның барлығы заңды түрде қарастырылған.

Жан басына шаққандағы қаржыландыруды енгізгенге дейін бізде 121 мектеп болса, қазір 25 білім ошағы аталған жоба арқылы қосылып отыр. Оның ішінде Шымкентте 3 мектепті атап өткен болар едім.Жалпы оқу жылының соңына дейін 23 жеке мектеп ашылады деп күтілуде. Оның 6-ы Шымкенттен бой көтермек.

Инвесторлар мектепті өз қаржысы есебінен салып, мемлекетпен келісім-шартқа отырады. 96 АЕК мектепке кеткен шығынды өтеу бойынша төленеді. Егер біз орташа норматив көлемі жайлы айтсақ, ол бір оқушыға орта есеппен жылына 224 мың теңге төленеді, – дейді Балжан Шойынқарақызы.

Екі күндік іс-шаралар нәтижесінде аталған орталыққа 10-нан аса кәсіпкер мен компания қызығушылық танытқан. Деседе жер телімдерін бөлу, қолданыстағы ғимараттарды қайта жабдықтауға байланысты әлі де бірқатар сұрақтар мен мәселелердің бар екенін сала мамандары жасырмады.

Міне, 2023 жылға қарай еліміздегі оқу орындарының тапшылығы мен студенттер жатақханасының мәселесін азайтуға бағытталған жоба өз нәтижесін бере бастады.

Дәрігерлер үн қосты

Среда, 11 Сентябрь 2019 05:40

Үшінші мегаполистегі дәрігерлер Мемлекет басшысы Қасым-Жомарт Тоқаевтың халыққа жолдаған алғашқы Жолдауын талқылап, пікірлерін ортаға салды.

DSC 2375

Қаладағы жедел медициналық көмек көрсету станциясында өткен жиынға Шымкент қаласы әкімінің бірінші орынбасары Қайрат Нұртай мен Шымкент қаласы мәслихатының хатшысы Ғани Ташқараев, «Нұр Отан» партиясы Шымкент қалалық филиалы төрағасының бірінші орынбасары Бахадыр Нарымбетов бастаған ақпараттық-насихаттау тобы мен халық қалаулылары қатысты.

Жиынды Шымкент қаласы әкімінің бірінші орынбасары Қайрат Ырзақұлұлы ашып, жүргізіп отырды. Ол өз сөзінде халықпен тиімді кері байланыс орнату басты назарда екенін айрықша атап өтіп, Жолдаудағы тапсырмалар бойынша өңірде атқарылатын жұмыстарға тоқталды.

Алқалы жиында сөз алған мемлекет және қоғам қайраткері Шалатай Мырзахметов Жолдауға қатысты баяндама жасап, маңызды құжатта айтылған негізгі мәселелерді жан-жақты талдап берді. Ол білім сапасын арттыра отырып мұғалімдердің жалақысын келер жылдан бастап 25 пайызға көтерілетіні, жердің шетелдіктерге сатылмайтыны, қазақ тілінің ұлтаралық қатынас тіліне айналатын кезеңі жеткені туралы кеңінен айтып өтті.

«Нұр Отан» партиясы Шымкент қалалық филиалы төрағасының бірінші орынбасары Бахадыр Нарымбетов жастарды Жолдауды қолдай отырып, елдің ынтымағы мен бірлігін сақтауға шақырды. Зейнетақы қорындағы қаражаттың бір бөлігін тиімді жұмсау үшін баспана алуға болатынын тілге тиек еткен партия өкілі мемлекеттен бөлінетін әлеуметтік көмектерді нағыз мұқтаждарға үлестіру керегін атап өтті.

Бахадыр Мәдәліұлы өз сөзінде ел ішін ала тайдай бүлдіретін оқиғаларға жол берілмеу керегін де баса айтып өтті.
Кездесу соңында Қайрат Ырзақұлұлы Мемлекет басшысының Жолдауын әр мекеме мен бөлім қызметкерлері арасында талқылап, ақпараттандыру жұмыстарын жалғастыруды тапсырды.

Елбасы Н.Назарбаевтың осынау қанатты сөзі болашағымыздың байламды бітімі іспетті. Елдің ертеңгі іргесі берік болуы үшін жастар сапалы білім алып, білікті мамандар қатарын толықтыруы қажет.

білім

Сондықтан, елімізде білім саласына ерекше назар аударылып отыр. Мемлекет басшысы Қасым-Жомарт Тоқаевтың «Сындарлы қоғамдық диалог – Қазақстанның тұрақтылығы мен өркендеуінің негізі» атты Қазақстан халқына арнаған Жолдауында көтерген маңызды 5 бағытының бірі – білімнің салтанат құруы.

Осы орайда биылғы оқу жылының соңына дейін қалада 5 жекеменшік мектеп ашылып, жаңа жатақхана пайдалануға беріледі. Бұл туралы Шымкент қаласы білім басқармасы басшысының міндетін атқарушы Айгүл Текебаева қалалық әкімдіктің ақпараттық-коммуникациялық орталығында өткен баспасөз мәслихатында мәлімдеді. Жолдау аясында білім саласында атқарылған және жоспарланған жұмыстарды сөз еткен Айгүл Қалыбайқызы шаһардағы білім беру мекемелерінің бүгінгі жағдайын баяндады.

Қаланың бас ұстазының сөзінше, 2019-2020 оқу жылында Шымкент қаласындағы 701 білім беру мекемесінде 305 мыңнан астам бала білім алуда. Оның ішінде 501 мектепке дейінгі мекемеде 76 339 бүлдіршін қамтылған.

– Бүгінгі таңда басқармаға қарасты мектептердің 127-і типтік, 7 мектеп ыңғайластырылған ғимараттарда орналасқан. Білім саласына 2019 жылға 77 987 821,0 мың теңге бөлініп, алдыңғы жылмен салыстырғанда көлемі 35%-ға артып отыр. Қаладағы балабақшамен қамтуды қажет ететін 3-6 жасар 73 031 баланың 95,2%-ы мектепке дейінгі тәрбиемен қамтылған, - дейді А.Текебаева.

Жаңа оқу жылынан бастап үшінші мегаполистегі білім ошақтарында жан басына қаржыландыру жүйесі енгізілуде. Бұл әр мектептің жеке бюджеті болады деген сөз. Мектеп басшылары барлық қажеттіліктерін сол қаржыдан алып, мұғалімдерге берілетін үстемақыларын өздері тағайындай алады. Осылайша мегаполистегі үш ауысымды мектептер мәселесі шешіледі деп күтілуде.

– Қазіргі таңда 11 жекеменшік мектепке 5454 оқушы мемлекеттік тапсырыс арқылы орналастырылды. Жан басына қаржыландыру жүйесін енгізу нәтижесінде өткен жылы 2400 орынға арналған 4 жекеменшік мектеп ашылды. Жаңа оқу жылында 1500 орынды «Жас дарын», «Абай Құнанбаев» жекеменшік мектептері жұмысын бастаса, жыл соңына дейін 1000 орынды 5 жекеменшік мектеп пайдалануға беріледі деп жоспарлануда. Осылайша жекеменшік мектептер есебінен үш ауысымда оқытатын 3 мектептің мәселесін шешу жоспарланған, - деді Айгүл Қалыбайқызы.

Үшінші мегаполистегі білім саласына жауапты маман педагогтердің біліктілігі, ағымдағы және күрделі жөндеу жұмыстары, мектептердің қысқа дайындығы, оқулықпен қамтамасыз ету мәселесі жоспарға сәйкес орындалып жатқанын айтты. Жағымды жаңалықтардың бірі – жаңа оқу жылынан бастап «Оқушылар» сарайында IT орталық, ал №1, 7, 23, 65, 80 мектептерде IT-сыныптар ашылды.

Шымкент қаласы әкімдігінің халықты жұмыспен қамту орталығы «Nur Otan» партиясымен бірлесіп «Бос жұмыс орындарының» жәрмеңкесін ұйымдастырды. Онда екі қолға бір күрек іздеген жандарға 1600-ға жуық бос жұмыс орындары ұсынылды.

377

Шаңырақтың берекесін молайтып, мерекесін келтіретін қамқор ене мен ибалы келіндер жаһанданудың жұтына жұтылып бара ма, қалай?! Отбасылық жанжал мен дау-дамайдан көз ашпадық деп ағынан жарылған бір топ келіннің сырын тыңдамаққа дағдарыс орталығына бас сұғып қайттық.

372

Соңғы жылдары елімізде ақпараттық және коммуникациялық технологиялар экономиканың барлық салаларында қарқынды дамуда. Көрсетілетін мемлекеттік қызметтер сапасын, цифрландыру және жобалық басқаруды арттыру мәселелері мемлекеттік басқару саласындағы басым бағыттардың біріне айналды. Осы орайда, өткен жылы үшінші мегаполис әкімдігі сандық технологияларды нарықтық стандарттарға сәйкес дамыту мақсатында жаңа басқарма құрған болатын. Жуырда Шымкент қаласының цифрландыру басқармасының басшысы Айнұр Юсуповамен сұқбаттасудың сәті түсіп, мегаполисті цифрландыру бойынша атқарылып жатқан жұмыстар туралы ақпарға қанық болдық.

329

«QORGAU» жобасы басталды

Среда, 07 Август 2019 05:28

Үшінші мегаполисте азаматтардың құқығын қорғауды қамтамасыз етуге арналған «Qorgau» жобасы басталды. Жаңа жобаның алдағы жұмысы туралы «Отырар» медиахолдингінде өткен баспасөз жиынында жобаның аймақтық үйлестірушілері мәлімдеді.

209

«Qorgau» – халық көмекшісі. Ол 200-ден астам өзекті тақырыпты қамтиды. Оның аясында тұрғындар тегін заңгерлік көмек алып, өздерінің құқықтық сауаттылықтарын арттыра алады.
Жобаны аймақтық бөлімшелерін ашуды азаматтық сектордан, үкіметтік емес ұйымдарының жетекшілері қолға алған. Жанболат
Жамантаев пен Сабира Байзақова миллионды қаладағы аталған жобаның үйлестірушілері.

– Бұл халықтың құқықтық сауаттылығын арттыра отырып, оларға тегін заңгерлік көмек көрсету болып табылады. Әр өңірге бекітілген заңгерлер алдағы 4 ай бойы тұрғындарға кеңес береді. Жұмыс күні ішінде кез келген жас заңгердің көмегіне жүгіне алады. Бізде басына күн туғанда ғана заңгерді іздейтіндер көп. Ендігі жерде мәселелерін тыңдауға дайынбыз, -дейді өңірлік жетекшілер.
Бұл «Qorgau» ауқымды жобасы ҚР Ақпарат және қоғамдық даму министрлігімен бірлесе отырып, «Азаматтық бастамалар орталығы» КЕАҚ-ның қолдауымен «Бірінғай Call-орталық құру арқылы Құқыққорғаушы кешенді жобаның іске асырылу» гранты шеңберінде жүзеге асырылуда.

– 2019 жылдың 1 тамызынан бастап елдің барлық қала-ауданында 210 заңгерлік кеңес беру бөлімі ашылады. Шымкент қаласындағы бөлім жастар ресурстық орталықтарында орналасады. Қазір тиісті орындар дайындалған. Жоба шеңберінде заң факультетінің студенттеріне тәжірибеден өту мүмкіндіктері де қарастырылған. Жоба аясында түрлі әлеуметтік маңызы бар іс-шаралар ұйымдастыру жоспарланған, – дейді жастар ресурстық орталығының басышысы Нұрдәулет Тәңірберген.

Бүгінде елімізде кәсіп бастап, өзінің бағытын тауып, табысты болғысы келетін жандарға қолдау көп. Мемлекеттік бағдарламалардың тиімді тұстары жазылып, ел арасында кең насихатталып та жүр. Содан болар, қаламызда бизнеске икемділігін байқағысы келетіндердің қатары едәуір артқан. «Атамекен» Ұлттық кәсіпкерлер палатасының бизнес-тренері әрі психолог Гүлжан Вероцкая ісін жаңадан бастаған кәсіпкерлер туралы пікірімен бөлісті.

207

Шынайтуында соңғы уақытта кәсіпкерліктің қыр-сырын үйретіп, пайдаға оңай кенелуді ұрандатып жүргендер жаңбырдан кейінгі саңырауқұлақтай қаптап барады. Десек те, кәсіпкер болуды көздейтіндердің көптігі көңіл қуантады. Бұл жақын болашақта ел экономикасына үлкен өзгерістер алып келетін серпіліс деген сөз. Тәжірибелі бизнес тренер мұндай құбылысты қалыпты жағдайға балап, саннан сапа артып, бәсекелестіктен нақты нәтижеге қол жеткізуге болатынын тілге тиек етті.
– Кәсіпкер – ең алдымен тәуекелшіл адам. Үнемі ізденіс арқылы өзгеруді көздейтін жан. Өз ісін бастап, кәсібін дөңгелетуді мақсат тұтқан. Дегенмен, заман ағымына ілесе отырып, бүгінгі сұранысты қажет ететін, нарықты қамтыған кәсіпкерлер аса көп емес. Оған маңдай тер, үлкен қажыр-қайратпен жетуге болады. Ал біздің орталыққа келген азаматтардың кейбірі «алма піс, аузыма түс» деп оңай жолмен кәсіпкер атанып кетуді көздейді, - дейді Г.Вероцкая.


Сегіз ай бойы өзінің іс бастап, кәсіпорын ашуға мүмкіндігі бар екенін көрсетіп, қолынан тірлік келетінін дәлелдеуге тырысқан психолог бір кездері бизнеске бет бұрғанын айтты. Ал қазір өзі кәсіби тренер атанғалы болашақ әріптестерінің әр қадамына асқан ұқыптылықпен қарайды. Үнемі өзін-өзі жетілдіруге кеңес береді. «Сонда ғана адамның тасы өрге домалайды», дейді бизнес өкілі.


Білім мен өзіңізге деген сенім көптеген кедергіні жеңіп, діттеген мақсатқа жетуге жол ашады. Осыдан 5 жыл бұрын автобус алаңын ашамын деген ой болды. Несие рәсімдеген «Даму» және мен, екінші дәрежелі банк арасындағы үш жақты келісіммен құжаттарым 8 ай дегенде дайын болып, алға қойған мақсаттыма бір табан жақындадым. Осы уақыт аралығында лицензия мен қарамағыма жұмысшылар қабылдадым. 15 млн теңге несиеге қол жеткізіп, автобус сатып алдым. Бұл кезде балам төрт айлық еді. Біраз осы саланың нанын жедім. Кейін бұл істі тоқтатып, жаныма жақын салаға ауысып, тұлғалық даму орталығын аштым, – деді бизнес-коуч.


Жыл басынан бері 100-ге жуық адамға кәсіп бастаудың алғашқы әліппесін үйреткен ол психология мен бизнестің қоғамда өзектілігі жоғалмағанын айтты.
– Мен маркетинг бойынша Игорь Ман, тұлғалық дамудан Ицхак Пинтосевич, ал психология тұрғысынан Михаил Пелехатый сынды ресейлік мамандардан дәріс алдым. «Бизнес жоспарлау», «Бизнес психологиясы» бойынша үш жылдан астам уақыт өзім де дәріс оқимын. Қосымша «ReFrame» тұлғалық-дамыту орталығында да осы аталған бағыттар бойынша кеңес беремін. Бизнестегі әйелдер, табысты адамдар туралы көп семинарлар ұйымдастыра келе жаңадан кәсіп бастағандардың қателіктерін үшке бөліп қарастырамын. Олар – білімнің аздығы, жалқаулық, қырсықтық. Нарықты зерттеуді үйреніп, бизнес жоспарлай алатын адамдар пайданың тек үшінші жылдан бастап қана алуға болатынын түсінеді, – деді маман.


Гүлжан Вероцкаяның айтуынша, іскерлік және инвестициялық ахуалды жақсартуға, тұрақтылықты нығайтуға, инвесторлардың бизнес жүргізуіне қолайлы жағдай жасауға бағытталған Шымкент қаласының Кәсіпкерлер палатасының жұмысы жүйелі. Онда келіп кәсіп бастаушылардың қатары күн санап артып келеді. Шымкентті мемлекеттің үшінші қаласына, кәсіпкерлік, сауда орталығына, тұрғындарға жайлы әрі қонақтарға ең қызықты заманауи мегаполиске айналдыру міндеті тұрғанын ескерсек, бұл жұмыстар әлі де жандана бермек.

Страница 1 из 22