Елдің жайы инфрақұрылымынан білінеді
Қалаға қосылған 7 елді мекендегі құрылыс аймақтарын ауыз сумен қамту бойынша жұмыстар аяқталып, жалпы 3724 абоненттің ауыз суға қолы жеткен.
Ал аудан аумағына жаңадан қосылған «Исфиджаб» тұрғын алабын сапалы ауыз сумен қамту мақсатында қаржы бөлініп, құрылыс жұмыстары жүргізілді. Жоба құны –
3,0 млрд теңге. Биыл Жастар көшесі мен «Қазығұрт» станциясы аумағындағы 102 абонентті және Оңтүстік жаңа құрылыстағы 989 абонентті сапалы ауыз сумен қамту мақсатында жобалық-сметалық құжат әзірлеу жоспарланған.
Аудан әкімі Досбол Есілбектің айтуынша, өткен жылы халық шоғырланған аумақтар толық ауыз сумен қамтылған. Ал, жаңа құрылыс аумақтарын 2024-2025 жылдары ауыз сумен толық қамту жоспарланған.
2022 жылы аудан аумағындағы 9 елді мекенде 2013 абонентке сапалы электр желісі тартылған еді. 2023 жылы Исфиджаб, Достық (1356 абонент) елді мекендерінде «DIAS Проект» ЖШС мердігер мекемесі тарапынан ЖСҚ әзірленіп, сараптаманың оң қорытындысы алынып, кезекті бюджетті нақтылау сессиясына ұсынылмақ. Одан бөлек, «Оңтүстік Жарық Транзит» мекемесі тарапынан 9 трансформатор ауыстырылып, 16,7 шақырым желі жаңартылды. Биыл Қарабастау Жаңақұрылысында (120 абонент) сәулет-жоспарлау тапсырмасын әзірлеу және 19 трансформатор мен 33,4 шақырым желіні жаңарту жоспарлануда.
Ауданда табиғи газ жүйесімен қамту көрсеткіші 90,7%-ды құрайды. 2023 жылы Оңтүстік, Қарабастау, Жұлдыз, Жалын, Қаратөбе жаңақұрылыс аймағындағы 3739 абонентке мердігер мекеме жобалау-сметалық құжаттарын әзірлеп, сараптаманың оң қорытындысы алынды.
Жұлдыз, Жалын, Қарабастау, Қаратөбе тұрғын алабы және Еламан, Еңлікгүл көшелеріне газ кіргізу үшін 2024 жылға бюджеттік өтінім ұсынылады. Жалпы, аудан бойынша 2025 жылдың қорытындысымен жаңақұрылыс аймақтарындағы 5992 абонентті табиғи газбен қамтып, қамту көрсеткішін 100%-ға жеткізу жоспарланған.
Ауданда кәріз жүйесімен қамтылу жағдайы 41%-ды құрайды. Аудан аумағында «Ұлағат» шағынауданында (2248 абонент, «Алем Строй 1»ЖШС), кәріз жүйесінің құрылысы аяқталып, қазылған жерлер қалпына келтірілуде.
Жұлдыз тұрғын алабындағы көпқабатты 27 үйді (175 пәтер) кәріз жүйесімен қамту мақсатында құрылыс жұмыстары жүргізілді. Базарқақпа тұрғын алабындағы Достық көшесінің бойындағы көпқабатты тұрғын үйлерге (270 абонент) кәріз жүйесін жүргізу үшін «Шабыт-21» ЖШС тарапынан жобалық-сметалық құжаттар әзірленуде.
Ауданда ұзындығы 732,91 шақырымды құрайтын 728 көше мен өткел бар. 2023 жылы ұзындығы 45,5 шақырымды құрайтын 73 көше орташа жөндеуден өтті. 2024 жылға ұзындығы 56 шақырым 78 көшені жөндеу жоспарлануда. Қазіргі таңда сметалық құжаттамалар әзірленіп, сараптама қарауында жатыр. Сонымен қатар, 12 көшеге шағал тас төсеу және аудан аумағында бірінші қажетті көшелерге аяқ жол салу жоспарланған. Қазіргі таңда мемлекеттік сатып алу іс-шарасы жүргізілуде.
Қазіргі таңда аудан аумағында жарықтандырылған көше саны – 117. 2021 жылы 18 көше жарықтандырылса, ал мемлекеттік-жекешелік әріптестік бағдарламасы аясында 2022 жылы әлеуметтік нысандарға жақын орналасқан 22 көше жарықтандырылды. 2023 жылы 28 көшеге жарықшамдар орнатылды. Биыл 200 көшені жарықтандыру жоспарлануда.
Қазіргі таңда техникалық шарт алу бойынша жұмыстар жүргізілуде. Сонымен, биыл жалпы 317 көше жарықтандырылмақ.
Көктем айы жауынды-шашынды болып тұр. Ауданның су тасқынына дайындығы қалай? Күз, көктем мезгілдерінде жауын-шашыннан болатын тасқынның алдын алу мақсатында зерделеу жұмыстары жүргізіліп, 57 мекенжай анықталған. 2022 жылы су алу қауіпі жоғары 21 мекенжайға, өткен жылы 19 мекенжайға ирригациялық арықтар жүргізілді.
Ал, биыл 8 мекенжайға ирригациялық арықтар орнату жоспарлануда. Қазіргі таңда мемлекеттік сатып алу іс-шарасы атқарылуда.
«Қазығұрт» мәдениет үйі қала меншігіне өтеді
– Аудан аумағында атқарылып жатқан жұмыстарға қысқа тоқталып өтетін болсам, «Жайлы мектеп» жобасымен Ұлағат шағынауданына және Қарабастау жаңа құрылысы учаскесіне 1200 орынды мектептің құрылысы жүруде. Биыл күзде пайдалануға беріледі деп күтілуде. Базарқақпа тұрғын алабындағы «Қаратөбе» мәдениет үйінің ғимараты ескі, апатты болуына байланысты 2022 жылы «Диас Проект» ЖШС жобалық-сметалық құжаттамасын әзірледі. Мемлекеттік сатып алу конкурсы жүргізіліп, мердігер мекеме ретінде «СИГРОСТ» ЖШС анықталды. Қазіргі таңда ескі ғимаратты бұзу жұмыстары жүргізілуде. Заманауи үлгідегі мәдениет нысаны салынатын болады, – деді Досбол Күздікбайұлы.
Аудан бойынша 283 көпқабатты үй 132 аулаға біріктірілген. 2021 жылдан бастап абаттандыру жұмыстары «Халық қатысатын бюджет» жобасы аясында іске асырылуда. 2023 жылы 29 балалар ойын алаңшасын құру жоспарланған болатын. 27 балалар ойын алаңшасы орнатылып, 2 шарт бұзылды.
– Бұл дегеніміз тұрғындар өз ұсыныстарын жасау арқылы жергілікті бюджеттің қалыптасуына қатысады. Жоба аясында 2024 жылы 44 көпқабатты үйдің ауласын абаттандыру және жеке секторда 11 мекенжайда кешенді балалар ойын алаңшасын орнату жоспарлануда, – деді аудан әкімі.
Қалған абаттандыруды қажет ететін 39 ауланы көркейту 2025 жылға жоспарланып отыр екен. Олар: «11», «12», «Цементшілер», Көксай-2 шағын аудандары мен Қаратөбе, Жұлдыз тұрғын алаптары.
2022 жылы 107 спорт алаңшасы салынды. Тұран ауданының ашылуына байланысты Еңбекші ауданы аумағынан Әл-Фараби ауданына 58 ашық спорт алаңшалары тапсырылды. Қазіргі таңда аудан аумағында 49 ашық спорт алаңшалары орналасқан. Былтыр 7 спорт алаңшасы пайдалануға тапсырылды.
Биыл 8 ашық спорт алаңшасын орнату жоспарлануда. Аудан әкімінің айтуынша биыл 5 гүлзар салу жоспарланғанын жеткізді. Қазіргі таңда мемлекеттік сатып алу іс-шарасын өткізуге құжаттамалар дайындалып жатыр.
– Өздеріңізге белгілі, Маятас, Тоғыс, Жыланбұзған тұрғын алаптар Бадам өзені жағалауына жақын үйлерге келер қауіптің алдын алу бойынша 2021-2025 жылдарға арналған су тасқыны іс-шараларының жол картасы әзірленген болатын. 2022 жылы мердігер тарапынан жобалық-сметалық құжаттамасы әзірленді. 2023 жылы қаржы қаралып, Бадам өзені жағалауын бекіту бойынша мердігер мекеме «TOLAGAI-2050» ЖШС анықталды. Қазіргі таңда 2,6 шақырым аралыққа құрылыс жұмыстары жүргізілуде. Мердігер мекеме «Толағай-2050» ЖШС-ның демеушілігімен Маятас тұрғын алабында Бадам өзені арқылы өтетін жаяу жүргіншілерге арналған аспалы көпірдің эскиздік сызбасы әзірленіп, көпірге қайта құру бойынша құрылыс жұмыстары жүргізілді. Қазіргі таңда қолданысқа берілді, – деді аудан әкімі.
Аудан әкімі жақсы жаңалықпен бөлісті. Айтуынша, Тоғыс тұрғын алабында ұзақ жылдар бойы шешімін таппай, жекеменшікте қалған «Қазығұрт» мәдениет үйі қала меншігіне өтпек.
– Шымкент қаласының әкімі Ғабит Сыздықбеков мәдениет үйін мемлекет меншігіне қайтару бойынша меншік иесімен келіссөз жүргізген болатын. Екіжақты келіссөз нәтижелі аяқталып, «Қазығұрт» өндірістік кооперативі мәдениет үйін мемлекет меншігіне қайтарды. Бүгінде қаулысы әзірленіп, «Шымкент қаласының мәдениет үйі» КММ-ға өткізу жұмыстары жүргізілуде. «Қазығұрт» мәдениет үйі – Еңбекші ауданындағы халық игілігіне қызмет етіп отырған нысанның бірі. Бұл жаңалық тоғыстықтарды қуантып отыр, – деді Досбол Есілбек.
Жансая СЫДЫҚБАЙ
