Мәскеуден қуанышты хабар жетті. Фристаил-акробатикадан Ресей астанасында өткен әлем Кубогі бәсекесінде Жанбота Алдабергенова күміс жүлдегер атанды.
Дүниежүзінің ең таңдаулылары қатысқан сайыста шымкенттік спортшы 75,91 балл жинап, екінші орынға жайғасты. Бірінші орын ресейлік Алина Гридневаның (77.43 ұпай) қанжығасында кетті.
Жуырда Минскте өткен Еуропа Кубогі кезеңінде жерлесіміз чемпион атанған болатын. Қарсыз өлкенің қаршадай қызы былтыр Сочиде өткен Олимпиада ойындарында 6-ы орынды иеленген. 20 жасар Жанботаның ендігі мақсаты – 2018 жылғы қысқы Олимпиада ойындарына жолдама алу.
