Шымкентте пауэрлифтингтен ерлер және әйелдер арасында ҚР ашық біріншілігі болып өтті. Шараға еліміздің барлық өңірлерінен 350-ге жуық спортшы қатысты.
Аталмыш сайыс Данияда өтетін әлем біріншілігінің іріктеу турниріне және Үндістанда байрағы желбірейтін Азия біріншілігіне қатысатын спортшыларды іріктеп алуға лайықты мүмкіндік беруде.
– Жарысқа келген спортшылардың дайындығы өте жоғары екені байқалады, – дейді турнирдің бас төрешісі Ұлықбек Эрметов. – Жыл сайын республикалық жарыстың ауқымы кеңейіп, тартымдылығы арта түскені қуантады. Нақ осындай байрақты бәсекенің Шымкент қаласында өтіп жатқанына қуаныштымын.
Осы біріншіліктің нәтижесі бойынша халықаралық додаларда пауэрлифтингтен ұлттық құрама сапында ел намысын қорғайтын спортшылардың есімі анықталатын болады.