Еркін форматтағы жүздесуде жасөспірімдер спортшыларға сұрақтарын қойып, олардың бала армандары мен мақсаттары жайлы мол мағлұмат алды. Жиынды №2 Оқушылар сарайының әдіскері Рақымжан Ембергенов үйлестіріп отырды.
– Спорт – үлкен еңбек пен жауапкершілікті талап етеді. Бала күнімнен спортқа жаным жақын болды. Бойымдағы мүмкіндікті теріс әрекеттерге құртпай, спортқа бағыттап, еліміздің даңқын асыруға үлес қоса алғаныма қуанамын. Байрақты бәсекелерде биіктен көріну үшін әрбір спортшыға мінез керек. Мінез – үлкен мақсатқа жетелейтін басты қасиет. Әрі қарай еткен тынымсыз еңбегің мен төккен терің биік белестерді бағындыруға жол ашады. Сондықтан әрқашан алға қойған мақсаттарыңа жеткенше ешқашан мойымай, кедергілерді еңсеретін ыждаһат қажет. Қазіргі замануи құрал-жабдықтармен жасақталған №2 Оқушылар сарайының мүмкіндігі орасан. Жас спортшылар осы мүмкіндікті пайдаланып, биік белестерді бағындыра бергей, – деді халықаралық дәрежедегі спорт шебері Ғалымжан Қанаев.
Қазақтың намысын қорғап, елдің даңқын шығарған спортшылар оқушылардың сұрақтарына жауап беріп, жас спортшыларды жігерлендірді. Жиын барысында оқушылар ел мақтаныштарына арнап жыр шумақтары оқып, патриоттық әндер шырқалды.
«ШК»-ақпарат