Қаламыздағы әдет-ғұрып және салт-дәстүр орталығында облыстық жасөспірімдер кітапханасының ұйымдастыруымен Наурыз мерекесіне орай «Ұлттық салт-дәстүр нәрімен сусындаған – Бесік жыры» атты келіндер байқауы өтті.
Мерекелік байқау «Ақ босаға» әнімен ашылып, «Шашу» және «Көркем» әжелер тобы мүшелерінің ақ батасымен бастау алды.
Сайысқа қатысушылар 5 кезең бойынша сынға түсті. Атап айтсақ, «Сымбат-көркі сынымен!» – өзін-өзі таныстыру, «Сәбиімді әлдилеймін әндете» – бесік жырын орындау, «Ана көрген тон пішер» – қолөнер, «Салт-дәстүр асыл қазынам» – сұрақ-жауап, «Өнерлі өрге жүзер» – өз өнері, «Даналар мұрағаты» – мақал-мәтел жарысы тақырыбында бақ сынаған келіндер біліктілігі мен өз өнерлерін көрсетті.
Ұлттық салт-дәстүрімізді ұлықтаған сайыста келіндер аянып қалған жоқ. Олар барлық кезеңде белсенділігімен көзге түсіп, үздік шығуға тырысты. Келіндердің өнеріне әжелер қауымы ой-пікірлерін айтып, бағасын беріп отырды. Байқау қорытындысы бойынша бас жүлдені
ОҚМУ-дың 3 курс студенті Әсем Нұралиева иеленді. Бірінші орынға Б.Момышұлы атындағы №44 жалпы орта мектеп оқытушысы Жанар Оралбаева лайық деп танылса, екінші орынды банк қызметкері Динара Наханова, ал үшінші орынды Жұлдыз Қалмұрзаева жеңіп алды.
