Шымкентте «Біз тең құқықтар мен мүмкіндіктер үшін» және «Жауапты әкелік» тақырыбында ақпараттық семинар өтті.Жиында гендерлік теңдік мәселесі талқыланды.
– Қазіргі уақытта әйелдер әлем халқының жартысын құрайды және көп мемлекеттер оларға ерлермен тең құқықтар беруге бағытталған заңдар қабылдайды. Алайда, көп елдерде әйелдерге қатысты зорлық-зомбылықтың деңгейі әлі де жоғары. Мұндай әлеуметтік-мәдени стереотиптерді жою үшін қоғамда шұғыл шаралар қабылдау қажет, - деді Шымкент қаласы және Түркістан облыстық әйелдер кеңесінің төрайымы Баян Жандосова.
Ал Арыс қаласының Ардагерлер кеңесінің төрағасы Жолдасбек Тұрманбетов «отбасындағы әке мен ананың абыройы балаға берген тәрбиемен өлшенбек» деген ой айтты. «Отбасында әке би болып, ана соған бағынған үйдің ұлдары батыл, ержүрек, қыздары әдепті, инабатты, ал керісінше анасы би болып, ері оған бағынған отбасының ұлдары ынжық, қыздары көкбет болып өседі.
Бұл күн сайын көзіміз көріп жүрген өмір шындығы. Әкені сыйламаған ұл мен қыз ананы да сыйламайды», - деді Ж.Тұрманбетов.
Ақпараттық семинардан жастар гендерлік теңдік тұжырымдамасы жаңалық болмаса да, ерлердің рөлін қайта қарау және ерлерді гендерлік теңдігі бар қоғамға тартумен байланыстыру қажет екендігін ұғынып қайтты.