Қауіпсіздік шаралары күшейтілді

Пятница, 03 Апрель 2020 06:35 Автор  Опубликовано в Қоғам Прочитано 224 раз

WhatsApp Image 2020-04-03 at 11.55.500

WhatsApp Image 2020-04-03 at 11.55.511

Шымкент қаласының әкімі Мұрат Әйтеновтың мәлімдемесі

Құрметті Шымкент қаласының тұрғындары!

Біздің қалада тағы 8 адамнан коронавирус анықталды. Оның барлығы қауіпті індет анықталған үшінші науқастың туыстары мен жақындары. 1 сәуірден бастап барлығы оқшауланған.
Орын алған жайтқа байланысты, біз азаматтарымызды қорғау және инфекцияның ары қарай таралуының алдын алу мақсатында аталған отбасы тұрған Тайманов көшесі мен оған жақын орналасқан Сәрсенбаев және Сүлейменов көшелерін карантинге жаптық. 7 блок-бекет қойылды.
Барлық профилактикалық шаралар тиісті деңгейде жүргізіліп жатыр. Бүгінгі таңда Шымкентте коронавирус инфекциясын жұқтырған тұрғындар саны – 11.
Зерттеулерге сәйкес, қауіпті індет анықталған әрбір жағдай вирусты жаппай жұқтыруға әкеп соғуы мүмкін. Оның соңы неге әкелетінін біз жақсы түсінеміз. Сондықтан оқшаулаудың қатаң түрі ғана қауіпті індет таралуының алдын алады.

Мұндай жағдайда өзін-өзі оқшаулау ғана қала тұрғындарын аман алып қалатындығын тағы да ескертеміз.
Өкініштісі, тұрғындардың көпшілігі қауіп қатерді жеткілікті дәрежеде түсінбеуде, себебі қала көшелерінде қозғалыс әлі де көп.

Туындап отырған қауіптің қатерін жете түсіну үшін әлем елдерінің тыныс-тіршілігіне қарауды сұраймыз. Италия мен Испания мемлекеттерінің азаматтары коронавирус індетін қауіп деп санамағандықтан, тәулігіне көз жұмғандардың саны мың адамға дейін жуықтады. АҚШ-та бір түннің ішінде мыңнан аса адам қайтыс болды.
Осы жағдайларды ескере отырып және карантинге жабылған Қазақстанның өзге де ірі қалаларының, әлем елдерінің тәжірибелерін зерделей келе, біз Шымкентте бұған дейінгі шектеу шараларына қосымша карантин жариялауды жөн деп отырмыз.

Азаматтардың өмірі мен қауіпсіздігін, денсаулығын сақтау мақсатында және Төтенше жағдай жөніндегі мемлекеттік комиссияның келісімімен 2020 жылғы 4 сәуір сағат 21.00-ден карантин аяқталғанға лейінгі кезеңде Шымкент қаласы аумағында карантин жарияланады. Карантин мынандай шектеу шараларын қамтиды:

Біріншіден, карантин кезінде Шымкент қаласы бас санитарының қаулысында көрсетілген мекемелерден бөлек меншік нысанына қарамастан барлық мекемелердің жұмысы тоқтатылады. Ол мекемелердің тізімін әкімдіктің ресми сайты мен әлеуметтік желілерде жариялаймыз. Қоғамдық демалыс орындары, сонымен қатар саябақтар мен балалар алаңшаларына баруға болмайды.

Екіншіден, тұрғындар мен көліктің барлық түріне Шымкент қаласынан шығуға және қалаға кіруіне тыйым салынады. Бұл шектеудің Қаулыда көрсетілген белгілі азаматтар мен көліктерге қатысы жоқ. Олардың да тізімі жарияланады.

Үшіншіден, қала аумағында шағын микроавтобустардың қозғалысына тыйым салынып, олардың бағыттары бойынша автобус қозғалысы қойылады. Қалаішілік қоғамдық көлік қозғалысы таңғы 7.00-ден 19.00-ге дейін ғана жүзеге асады.

Төртіншіден, қала аумағындағы залалсыздандыру шаралары карантин мерзімі аяқталғанға дейін күшейтілетін болады.

Бесіншіден, азаматтардың жүріп-тұруына шектеу қойылады. Бұл тұрғындардың өзін-өзі оқшаулауы үшін жағдай жасауға бағытталып отыр. Мұндай шектеулер медицина қызметкерлеріне, құқық қорғау органдарының өкілдеріне, қала тыныс-тіршілігін қамтамасыз етуші коммуналдық мекеме қызметкерлеріне қолданылмайды.
Қала тұрғындары толықтай шектеу кезінде үйлерінен азық-түлік, дәрі-дәрмек, медициналық көмек, банк және пошта қызметтерін алу үшін ғана шыға алады.

Соңғы күндері әлеуметтік желілерде тарап жатқан түрлі негізсіз ақпараттар таралуының алдын алу мақсатында, қала аумағында коммендаттық сағат әзірше енгізілмегенін ресми түрде мәлімдеймін. Дегенмен төтенше жағдай кезіндегі талаптарды орындауымыз керек. Карантин режимін бұзған азаматтарды құқық қорғау органдарының патрульдік қызметі анықтайтын болады. Себебі өзінің денсаулығына немқұрайлы қараған азаматтардың әрекетінен тұрғындардың басым бөлігі зардап шекпеуі тиіс деп санаймын.

Алтыншыдан, Шымкент қаласының аумағындағы төтенше жағдай және карантин кезінде 55 жастан асқан тұрғындарға аса бір қажеттіліксіз көшеге шықпауды ұсынамыз.

Жетіншіден, карантин кезінде тізім бойынша жұмысы тоқтамаған барлық мекемелер қызметкерін жұмыс орны туралы анықтамамен қамтамасыз етуі шарт.

Сегізіншіден, азық-түлік базарларының жұмыс уақыты 10:00-ден 18:00-ге дейін, қадамдық қашықтықтағы азық-түлік дүкендерінің жұмыс уақыты 10:00-ден 21:00-ге дейін болып қалады.

Тоғызыншыдан, барлық қоғамдық тамақтану орындары жеткізіп беру режиміне көшеді.

Оныншыдан, азаматтардың қала аумағында жеке көлігімен жүруіне тыйым салынады. Бұл талап тізімге кіретін мекеме қызметкерлеріне қолданылмайды және ол азаматтардың қолында жұмыс орны берген анықтама болуы керек. Сондай-ақ, жеке көлікпен үйінің жанында орналасқан азық-түлік пен бірінші кезектегі тауарлар, медициналық құралдар алуға және жедел жағдайларда медицина ұйымдарына көмек алуға баруға болады.

Құрметті қала тұрғындары!

Өз тарапымнан қаланың тыныс-тіршілігі тоқтамауы үшін қала әкімдігі барлық шараларды қабылдайтынына кепілдік беремін.
Осындай қиын сәтте, Шымкентті жан-тәнімен сүйетін әрбір тұрғынға қаламыз біздің көмегімізге зәру екендігін айрықша атап өткім келеді. Қаламызға тигізер көмегіміз – бұл біздің біркісідей ұйып карантин талаптарын бұлжытпай орындауымызда екендігін атап өтемін.

Последнее изменение Пятница, 03 Апрель 2020 06:45
Редакция

Қалалық «Шымкент келбеті» «Панорама Шымкента» газеттері 1990 жылдың 21 шілдесінен бастап шығады. Басылымның құрылтайшысы - Шымкент қаласы әкімдігі. Шығарушы - «Шымкент ақпарат орталығы» ЖШС-і. Директор – Бахтияр Тайжан. Қоғамдық-саяси газет облыс, қаланың тыныс-тіршілігін сипаттап, жаңалықтармен хабардар етеді.