Шымкент келбеті

Қала əкімі Ғабидолла Әбдірахымов шаһардағы балабақшалар мен мектептердегі жөндеу жұмыстарының барысымен танысты.

Әуелі жұмыс сапарында қала әкімі №53 және №54 мектеп ғимараттарының жөндеу жұмыстарына куә болып, Оспанов көшесі бойындағы балабақшаның толық қалпына келтіру жұмысын тексерді. Атқарылған жұмыстың сапасын екшелеп, мердігер мекемелердің өкілдерімен пікірлесті.

Әлеуметтік нысандарды аралау барысында қала әкімі Ғабидолла Әбдірахымов Өтегенов көшесін ұзарту жобасының құрылыс барысымен танысып, «Асар» шағынауданындағы инженерлік-коммуникация жүйелерінің қызметтерін көріп шықты. Осыған орай қаланың солтүстігінде орналасқан шағынауданда жүргізіліп жатқан инженерлік жұмыстарды жеделдетіп аяқтауды тапсырып, жергілікті тұрғындардың тауар тасымалдау және тұрғын үй-коммуналдық шаруашылық жағынан еш қиындық көрмеуі керектігін атап өтті.

Саудаға шығарылған мал және мал өнімдері ветеринарлық-санитарлық талаптарға сәйкес келуі тиіс. Бұл жөнінде қала әкімдігінде қала әкімінің орынбасары Т. Баймұхановтың төр-ағалығымен ауыл шаруашылық өнімдері жәрмеңкесінің қалыптасқан ахуалы бойынша өткен жиында кеңінен талқыланды.

Жиында Т. Баймұханов тиісті сала мамандарына жәрмеңкеде сатылатын ет және ет өнімдері талапқа сай температуралық режимде сақталмайтын болса, сатылымға шығармау қажеттігін қатаң түрде ескертті. Бұл ретте, кәсіпкерлер қауымдастығының төрағасы Х. Камалов өнімдерді талапқа сәйкес сақтау үшін сатушылардың әрбірінде витриналық тоңазытқыш болу қажеттігін, бұл үшін сыйымдылығы 5 тонналық тоңазытқыш рефрижератор көліктің қызметін пайдалану керектігін жеткізді.

Өз кезегінде, қала әкімінің орынбасары Т.Баймұханов ауыл шаруашылығы өнімдерінің зертханалық сараптаудан өтуі, тексеру таразысының орнатылуы, арнайы витриналық тоңазытқыштармен қамтамасыз ету жағдайын ұдайы бақылауда ұстайтынын атап өтті.

«Нұрлы Жол» бағдарламасы аясында құрылысы жүріп жатқан нысандарды бақылау мақсатында «Нұр Отан» партиясы тарапынан бақылау комиссиясы құрылған еді. Әлеуметтік инфрақұрылымды дамытуды көздейтін бақылау комиссиясы жаңа құраммен өз міндетіне кірісіп кетті.

Осы орайда, «Нұр Отан» партиясы облыстық филиалы төрағасының орынбасары Е.Дауылбаев, «Нұр Отан» партиясы Шымкент қалалық филиалының төрағасы Ө.Мелдеханов партия жанынан құрылған комиссияның қатысуымен қаламыздағы бірқатар құрылыс нысандарын аралады. Атап айтқанда, Сайрам елді мекеніндегі М.Мәметова атындағы бұрынғы №66, қазіргі №111, Тассай елді мекеніндегі №91 жалпы орта мектептері құрылыстарын аралады. Құрылысы аяқталуға жақын қалған нысандардың жұмыс сапасы мен қаражаттың игерілуі талқыланып, бақылаушылар тарапынан сын-ескертпелер де айтылды.

Облыстық бюджеттен 482,8 млн теңге бөлінген 300 орынға арналған М.Мәметова атындағы №111 жалпы орта мектептің құрылысы аяқталуға жақын. Дегенмен, ғимарат қабырғасын жауын-шашыннан қорғау үшін арнайы суағар орнату қажет-ақ. Сондай-ақ, ауыз су және көгілдір отын мәселелерін алдағы уақытта шешу қажет. Ал құрылысына 482,4 млн теңге қаржы қарастырылған Тассай елді мекеніндегі 300 орындық №91 жалпы орта мектебінде де ауызсу мәселесі барын Әлеуметтік инфрақұрылымды дамыту комиссиясының мүшесі М. Тамабаев атады.

– Тассай елді мекенінде ауызсу болғанымен №91 орта мектепті қамтамасыз етуге күші жетпейді. Мектепке су жеткізу үшін алдымен білім ошағына керекті ауызсу мөлшерін анықтау керек. Мұның қанша уақытта шешімін табатыны су құбырларының жағдайына байланысты арнайы мамандардың сараптамасынан кейін белгілі болады. Көгілдір отынның жағдайы да осындай. Мектепті газ, сумен қамтамасыз ету қажеттілігі жайлы тиісті мамандарға ескерту жасалды, – дейді М. Тамабаев.
Ал «Нұр Отан» фракциясы мүшелерінен құрылған комиссиясының төрағасы Ғани Ахметбаев бірнеше мектептер туралы бақылау нәтижесін жариялады.

– Сайрам елді мекеніндегі №111 мектепке бөлінген кепілдік қаржыдан басқа қаражат мақсатты жұмсалған. Құрылысы ағымдағы жылдың 1 шілдесінде аяқталады деп күтілуде. Тассай елді мекеніндегі №91 мектепке бөлінген қаржының 73 миллионы қалған, басқасы мақсатты жұмсалған. 1 тамызда пайдалануға беруді жоспарлап отыр. Бақылау барысында анықталған кемшіліктер туралы мердігер құрылыс компанияларының жауапты мамандарына нақты тапсырмалар беріліп, міндеттер жүктелді. Яғни, осы елді мекен оқушылары алдағы оқу жылында заман талабына сай жаңа ғимаратта оқиды деген жоспар бар. Бұдан бөлек, жақында тағы екі нысанның құрылыс жұмыстары басталады. Сырым батыр көшесінде орналасқан №59 мектеп жанынан қосымша ғимарат тұрғызу және «Достық» шағынауданында 1200 орындық жалпы орта мектеп құрылысын жүргізетін мердігерлер анықталды. Қаржы қарастырылған. Қазіргі таңда нақты тапсырма алған мердігерлер қарқынды құрылыс жұмыстарын бастауға дайын отыр, – дейді қалалық мәслихат депутаты Ғ. Ахметбаев.

Ғани Молдабекұлы бастаған бақылау комиссиясы бұдан бөлек «Сәуле» шағынауданындағы, Қайнар бұлақ тұрғын үй алабындағы, Жаңаталап елді мекеніндегі құрылыс нысандарын да жіті бақылайтын болады.
Шымкент қаласында «Нұрлы жол» бағдарламасы аясында 20 нысанның құрылысы қолға алынған. Мұның бәрін дерлік «Нұр Отан» партиясы жанынан құрылған бірнеше комиссия ай сайын бақылап бағамдайды. Әр айда комиссия қорытындысы нақтыланып, пайдалануға берілгенге дейін кем-кетігі сараланады. Аталмыш бақылау арқылы «Нұр Отан» партиясы мемлекетке сапалы қызмет көрсетуде жоғары нәтижеге қол жеткізуді көздейді.

Еліміздегі күш-қуат құрылымдары 5 маусым күні Ақтөбеде орын алған террорлық әрекеттерге қарсы операцияларды соңына дейін жүргізуі тиіс. Бұл туралы Үкіметтің селекторлық режімдегі отырысында ҚР Премьер-Министрі Кәрім Мәсімов мәлімдеді.

– Мемлекет басшысы бұл мәселені өз бақылауында ұстап отыр. Күш-қуат органдары бұл операцияны соңына дейін жүргізуі тиіс. Әкімдіктер, барлық мемлекеттік органдар сәйкесінше шаралар қабылдауы қажет. Ал одан ары қарай қорытынды шығаратын боламыз. Демек, біздің шаруашылығымызда кейбір кемшіліктер бар деген сөз. Біз бұл ретте бірқатар кешенді шаралар қабылдауымыз керек. Мемлекет басшысының тапсырмасына сәйкес бұл мәселені мен өз бақылауыма аламын, – деді К.Мәсімов.

Үкіметтің селекторлық режімдегі отырысында ҚР Денсаулық сақтау және әлеуметтік даму министрі Тамара Дүйсенова Ақтөбедегі қарулы қақтығыста жараланған 9 адамның жағдайы өте ауыр екенінін мәлім етті.

– «Бұл кезеңде 38 адам медициналық көмек алып, 2-еуі қаза тапты. Жеңіл-желпі жараланған 15 адам қабылдау бөлмелерінде қаралып, амбулаториялық емделуге жіберілді. 20 адам ауруханаға жатқызылды. Оның ішінде 14-іне ота жасалды, тағы 3-еуіне қазір операция жасауда. 9 адамның жағдайы өте ауыр»,– деді Т. Дүйсенова.

«Нұр Отан» партиясы Төрағасының Бірінші орынбасары Мұхтар Құл-Мұхаммед те аталған оқиғаға қатысты мәлімдеме жасады.
– Қазақстан мұсылмандары мен бүкіл ислам дүниесі барша айлардың сұлтаны – қасиетті Рамазан айында өтетін оразаға дайындалып жатқанда Ақтөбе қаласында жантүршігерлік лаңкестік оқиға орын алды. Сіздер мен біздің бауырларымыз – бейкүнә жандар жазықсыз құрбан болып, оққа ұшты. «Нұр Отан» партиясы қаза тапқандардың туыстары мен жақындарына қатты қайғырып, көңіл айтады, – деп атап өтті өз мәлімдемесінде Мұхтар Құл-Мұхаммед.

Сондай-ақ, лаңкестік оқиғаға қатысты ҚМДБ-ның төрағасы, Бас мүфти Ержан қажы Малғажыұлы Қазақстан халқына үндеу тастады.
«Осы оқиғаға дін атын жамылған радикалдардың қатысы бар деп айтылуда. Адам жанын түршіктіретін зұлымдыққа дін жолында жүрген мұсылмандарға қатысы бар деп айтуға ауыз бармайды. Ислам діні ешкімді ұстанатын дініне немесе ұлтына бөлместен, жазықсыз қан төгуге ешқашан рұқсат етпейді. Ел мұсылмандарының басын қосып отырған Қазақстан мұсылмандары діни басқармасы орын алған лаңкестік оқиғаны үзілді-кесілді айыптайды», – деді Бас мүфти.

Ақтөбеде орын алған оқиғалардан кейін қалада террорлық қауіптің қызыл деңгейі белгіленді. Айта кетейік, қауіптің шекті деңгейі жасалған терроризм актісі туралы ақпарат, сондай-ақ терроризм актісін (актілерін) қайталап жасау немесе террористік тұрғыдан осал объектілерге бір мезгілде террористік шабуылдар жасау мүмкіндігі туралы расталған ақпарат болған кезде белгіленеді.

Аудан әкімдігінің қызметкерлері аудан аумағында орналасқан коммерциялық нысандардың маңдайша, жарнамалар және тағы басқа көрнекі ақпараттарды «Қазақстан Республикасының Тіл туралы» Заңының 21-бабына сәйкестендіру мақсатында жылдың басынан бері рейдтік іс-шаралар жүйелі түрде жүргізуде.

Ауданға қарасты 358 нысан тексерілді. Оның ішінде «Қазақстан Республикасының Тіл туралы» Заңына сай келмейтін 156 коммерциялық нысан иелеріне ескерту қағаздары беріліп, түсіндірме жұмыстары жүргізілді. Қалалық мәдениет және тілдерді дамыту бөліміне тиісті мәліметтер жолданды. Жұмыстар жалғасын табуда.

Аудан әкімдігі аудан аумағындағы мемлекеттік мекеме ғимараттарының сыртқы кіреберіс бөлігінде Қазақстан Республикасының Мемлекеттік Туын және Мемлекеттік Елтаңбасының дұрыс орналастырылуына байланысты зерделеу шараларын жүргізді.

Зерделеу барысында, атап айтқанда Шәмші Қалдаяқов көшесінде орналасқан Абай аудандық полиция бөлімшесінде, Абай аудандық сотының, «Қазақстан Республикасы Әділет министрлігі Оңтүстік Қазақстан облысының Әділет департаментінің Шымкент қаласы Абай ауданының әділет басқармасы» мемлекеттік мекемесі орналасқан ғимарат ішіндегі Мемлекеттік Ту мен Мемлекеттік Елтаңба талапқа сай орнатылған. 

Алдағы уақытта ауданда орналасқан мемлекеттік мекемелерде Мемлекеттік рәміздердің стандартқа сай болуына зерделеу жұмыстары жүргізіліп, талапқа сәйкес орналастыру бойынша жүргізілген насихаттау жұмыстары жалғасатын болады.

Аудан әкімі аппаратының ұйымдастыруымен Абай аудандық ІІБ полиция бөлімімен бірлесе кәмелетке толмаған жастар арасында құқықбұзушылықтың алдын алу мақсатында аудандағы халық көп шоғырланатын орындар мен көшелерде түнгі рейд жүрді.

Іс-шара тұрақты орындалу барысында аудан аумағындағы жастар көп шоғырланатын орындар тексеріліп, кәмелетке толмаған жас жеткіншектерге беймезгіл уақытта рұқсат етілмеген орындарда жүргені үшін ата-аналарын шақырып, түсіндіру жұмыстары жүргізілді. Бұл іс-шаралық рейдтің мақсаты жастар арасындағы құқық бұзушылықтың алдын ала отырып, келешегі кемел ұрпақ тәрбиелеуге атсалысу.
Орта адамды қалыптастырады, ал ұрпақ тәрбиесінің жемісі бір күнде немесе бір жылда бермейтіні белгілі. Сондықтан жастар тәрбиесінде қоғамның ықпалы аса зор.

Қала әкімі Ғ. Әбдірахымовтың тапсырмасымен Шымкентте заңсыз сауда орындарын жою жұмыстары қолға алынғаны белгілі. Осы мақсатта Әл-Фараби ауданы әкімдігі жанынан құрылған жұмысшы топ рейд өткізді.

Рейд барысында Володарский көшесіндегі 2 дүңгіршек анықталып, алынып тасталды.
Әл-Фараби ауданы әкімдігі бүгінге дейін 23 заңсыз дүңгіршекті жойған. Оның 12-не хаттама толтырылып, 7-не ескерту беріп, 5-не айыппұл салыпты. Сондай-ақ, рейд жұмыстарының нәтижесінде 16 иесіз дүңгіршек анықталып отыр.
– Басты мақсат – заңсыз сауда орындарын болдырмау. Қала тұрғындарына кедергі келтіретін орын қалыптастырмау, қала көркін бұзбау. Жалпы аудан аумағындағы жол бойындағы, жүргінші жолдарындағы заңсыз дүңгіршек толығымен жойылады, – дейді Әл-Фараби ауданы әкімінің орынбасары Серік Нұрманов.
Рейдте жұмысшы топ азаматтарға түсіндірме жұмыстарын жүргізіп, ҚР Әкімшілік кодексі бойынша айыппұл салынатынын ескертті.

Шымкенттіктердің қауіпсіз өмір сүруі үшін қаланың әрбір бұрышына бейнебақылау камералары орнатылған. Олар жол бойындағы, тіпті аулалардағы тәртіпті бақылайды. Ал соның барлығын Шымкент қалалық ішкі істер басқармасының Жедел басқару орталығының қызметкерлері кірпік қақпай, реттеп отырады. Жаяу жүргіншіден бастап, көлік тізгіндеген азаматтардың әрбір қимыл-қозғалысы назардан тыс қалмайды. Осындай қырағылықтың арқасында қаланың кез келген бұрышында қандай да қылмыстық оқиғаның немесе тәртіп бұзушылықтың орын алғанын лезде біліп отырады. Міне, жуырда Жедел басқару орталығының құрылғанына 10 жыл толды. Осы ретте орталықтың жұмысымен танысуды жөн көрдік.

102 желiсiне – шұғыл хабарламалар

Шымкент ҚІІБ-ның Жедел басқару орталығының бастығы Қайрат Әбдіжәлілұлы өзі бастап, қызметкерлерімен таныстырып өтті. Олардың барлығы да арнайы құрылғының алдында тоқтаусыз келіп жатқан хабарламаларды қабылдауда. Ең алдымен Жедел басқару орталығының құрамындағы 102 желісіне келіп түсетін хабарламаларды қабылдайтын топпен таныстырды. Онда 4 қызметкер жұмыс істейді. Арасында екі қыз-келіншек те бар. Құлаққаптарын киген олар телефон тұтқасын көтеріп, қоңырау шалған азаматтардың қандай мәселемен және қай жерден хабарласып тұрғандарын жіті жазып алуда. Жұмыс барысы болған соң, оларға кедергі келтірмедік. Қандай да бір жағдайға ұшыраған кезде 102 шұғыл нөмірін теруді білеміз. Міне, сол кезде біздің қоңырауымызды осындағы қызметкерлер көтеріп, тиісті орындарға хабар береді. Мұнда 75 категория бойынша хабарламалар келіп түседі. Осындағы төрт қызметкердің бірі – Сүлеймен Ахметәлиев көп ретте отбасылық дау-жанжал, қоғамдық тәртіптің бұзылуы, көлікті дұрыс немесе тиісті орынға қоймау секілді көптеген хабарламалардың келіп түсетінін айтады. Әсіресе, түнгі уақытта қоғамдық тәртіпті бұзушылар бойынша жиі хабарлайды. Бірақ, бұрыш-бұрышта бейнекамера барын және орталықтағы қызметкерлердің әр қимылын бақылап отырғанын енді біліп жүрер.

100 монитор орналасқан орталықта жұмыс қызу

Мұнан соң, жедел басқару орталығы қызметкерлері отырған үлкен залға кірдік. Бір қарағанда жоғарғы оқу орындарындағы аудиторияға ұқсайды. Үлкен аумақты алып жатқан орталықта 8 қызметкер отыр. Әрқайсысының алдында бір монитордан. Онда қаланың көшелері мен қиылыстары анық көрінеді. Бәрі құдды алақандағыдай дерсіз. Пульт басында отыратын тәртіп сақшылары камераны айналдырып қарап, көшенің жан-жағын түгел шолып шығады. Тіпті, алыстағы адамдарды жақындатып, олардың бет-бейнесін анық көруге мүмкіндік бар. Оған қоса, қарсы беттегі қабырғаның ортасында алып монитор ілінсе, ал оның айналасын қоршай орналасқан тағы көптеген теледидарларды көруге болады. Қайрат Оспановтың айтуынша, мұнда 100 монитор бар. Қаладағы төрт ауданның аға инспекторларына 102 желісіне келіп түскен хабарламалар жолданады. Аға иснпекторлар өз аудандарындағы учаскелік полицейлерге рация арқылы хабарлап, оқиға орнын және оның сипатын айтады. Абай ауданы қаланың ең үлкен және халқы көп ауданы болғандықтан, мұнда түрлі оқиғалар көптеп орын алады. Осы ауданның аға инспекторы Төлеген Баубековтың қолы рациядан, ал көзі монитордан босар емес. Десек те, жұмыс барысын таныстыру үшін қысқаша әңігемеге тарттық.
– Шымкент қаласының аумағы күннен-күнге кеңейіп, өсіп келеді. Сондықтан, тәртіпті қадағалауға үлкен мән берілуде. Мәселен, маған 102 арнасынан хабарлама келіп түседі. Мен өз кезегімде учаскелік полицейлерге рация көмегімен оқиға туралы хабарлаймын. Онда автоэкипаж бен жедел тергеу тобын жіберемін. Егер ауыр қылмыс болса, басшы құрамға хабар беріледі, – дейді Т. Баубеков.
Аға инспектордың бізбен сөйлесіп бола бергені сол, «Қатын көпір» шағынауданындағы дүкен алдында А. есімді жігітті дүкен иесі мен тағы өзге де азаматтың соққыға жыққаны туралы хабарлама келіп түсті. Т.Баубеков бұл оқиға туралы лезде учаскелік полицейге хабар берді. Сағатқа қарағанымызда бұл оқиға 15 сағат 50 минутта орын алған екен. Яғни, барлық мәлімет компьютерге тіркелген. Күн сайын орын алған мәліметтердің компьютерде 30 күн сақталатыны тағы бар.

қырағы полицей – үшемнiң анасы!

Жедел басқару орталығында қызметкерлер тәуліктік кезекшілікке түседі. Яғни, жұмыс күні таңғы сағат 8-де басталып, келесі күні осы уақытта аяқталады. Мұнда да қыз-келіншектер жұмыс істейді. Олар отбасындағы қым-қуыт тіршіліктің де, жұмыс орнындағы қауырт қызметтің бабын тапқан. Солардың бірі – бейнебақылау инспекторы, аға лейтенант Динара Искакова. Мамандығы заңгер. Осында 2013 жылдан бері қызмет етеді. Жұмысқа жауапкершілікпен қарайтын Динара отбасын құрып, бала сүйген бақытты ана. Оның 3,5 жасқа келген әп-әдемі үшем қыздары бар.
– Біздің жұмысымыз бір қарағанда оңай көрінер. Бірақ монитордан көз алмай, әрбір қимыл-қозғалысты бақылап отыру біз үшін үлкен жауапкершілік. Қаланың қай тұсында не болып жатқанын монитор арқылы көріп отырамыз. Әр кадрды қалт жібермеуге тырысамыз, – дейді күлімдеп.

Нәтиже қандай?

Шымкент қаласында сыртқы бейнебақылау камераларының көмегімен жыл басынан бері 67 қылмыс пен 13 мыңнан астам әкімшілік құқық бұзушылық деректері ашылған. Қоғамдық тәртіп пен қауіпсіздікті қамтамасыз ету үшін 242 сыртқы бейнебақылау камералары орнатылған. Заманауи талаптарға сай бұл камералардың 220-сы 360 градусты қамтып, айналасындағы аумақты да қамтуға мүмкіндігі бар. Жедел басқару орталығының кезекшілері полицейлермен тығыз онлайн байланыста. Орталық қызметкерлерінің қырағы жұмысының арқасында түрлі қылмыстарды, іздеуде жүрген күдіктілерді және басқа да жедел ақпараттарды полицейлерге хабарлап, орын алған қылмыстардың ізін суытпай ашуға септігін тигізуде. Сонымен қатар, қала бойынша, ОҚО ІІД Жергілікті полиция қызметі Жол-патрульдік полиция полкының 17 стационарлық бекеті жұмыс істеуде. Олар да Жедел басқару орталығымен біріктірілген 120 сыртқы бейнебақылау камераларын қадағалап отырады.
Биыл жыл басынан бері бейнекамералардың көмегімен қоғамдық орындарда жасалған 67 қылмыс анықталды. Оның ішінде 37-сі бөтеннің мүлкін ұрлау, 5-уі тонау, 4-уі бұзақылық, ал 3-уі автокөлік ұрлығы және оннан астам басқа да қылмыстардың беті ашылды. Сонымен қатар, 13 мың 600-ден астам әкімшілік құқық бұзушылық тіркеліп отыр. Оның ішінде 548-і бұзақылық, 282-сі қоғамдық орындарда алкогольді ішімдік ішу, 7470-сі жеке және қоғамдық автокөлік жүргізушілері тарапынан жол қозғалысы ережесін бұзу деректері және 5 мыңнан астам басқа да әкімшілік құқық бұзушылықтар.
Шымкент қалалық Жедел басқару орталығы 2006 жылы жұмысын бастаған. 10 жылдан бері қала ішінде тәртіп нығайған. Сондықтан, барша тұрғындарға айтарымыз, қоғамдық орындарда тәртіп бұзбаңыздар. Ешкім көрмейді демеңіздер. Шымкентте аула ішінде де камералар орнатылған. Сіздерді жан-жақтан бейнекамера бақылап тұр!

Шымкент қаласы аумағында қандай да бір жол ережесін бұзсаңыз, енді полиция қызметкерлерімен мәселені өзара «келісіп шешуге» мүмкіндік жоқ. Себебі, шымкенттік жол-көлік полицейлеріне бұдан былай арнайы камерасы бар бейнежетонда жүру міндеттеледі.

Жол-көлік полицейлерін кезекшілік кезінде сандық бейнетіркегіштермен қамтамасыз ету қажеттігі Мемлекет басшысы Нұрсұлтан Назарбаевтың 5 институттық реформаны жүзеге асырудағы «100 нақты қадам» – Ұлт Жоспарында айтылған болатын. Яғни, сіздің жол-көлік полицейімен өрбіген әңгімеңіз бен әрбір әрекетіңіз оның өңіріндегі бейнежетонға жазылады. Камерасы бар бейнежетон тәртіп сақшыларына кезекшілікке шыққанда беріледі. Шешіп алса, тәртіптік жазаға тартылады. Ел аумағында аталмыш жобаны алғашқылардың бірі болып қолға алған Шымкент қаласында мұндай бейнежетондармен учаскелік инспекторлар да қамтамасыз етілетін болады.
– Бейнежетон полицейлердің сыбайлас жемқорлыққа жол бермеуіне әрі қызметін таза, әділ атқаруына, полиция қызметкерлерінің имиджін көтеруге мүмкіндік береді. Сонымен қатар, жол-көлік полициясын келісімге келуге мәжбүрлейтін, пара ұсынғысы келетін жүргізушілерге де сабақ болады әрі оларды тәрбиелейді. Мұндай әрекетке саналы түрде барып отырмыз, – дейді Шымкент қалалық жергілікті полиция қызметінің басшысы Данияр Мейірхан.
Жергілікті полиция қызметкерлері бұл ретте сыйымдылығы 32 гигабайтты құрайтын жетонның бейнежазуы мен дауысы жоғары деңгейде екенін айтады. Кезекшіліктен соң бейнежетондар бөлімге тапсырылады. Ал ондағы жазба ОҚО ІІД-нің оперативтік басқару орталығының базасына жазылып алынып, бірнеше айға сақтауға қойылады. Айта кетейік, Шымкент қаласында орта есеппен күн сайын жол-көлік ережесін бұзған 150 көлік жүргізушісіне хаттама толтырылады.