ОҚО мамандандырылған ауданаралық соттары ғимаратының мәжіліс залында «Жаңа электронды технологияларды қолдану мәселелері» тақырыбында кездесу өтті. Оған БАҚ өкілдері, үкіметтік емес ұйымдарының басшылары, облыстық соттың алқа төрағалары, Соттармен өзара iс-қимыл жөнiндегi кеңес мүшелерi, облыс соттарының БАҚ-пен өзара iс-қимыл жөнiндегi үйлестiрушi-судьялары мен мамандары, ОҚО бойынша Соттар әкiмшiсiнiң басшылары қатысты.
Кездесуді Оңтүстiк Қазақстан облыстық сотының төрағасы Нұрсерік Шәрiпов ашты. Ол өз сөзінде Жоғарғы Сот төрағасының өкiмiмен Соттардың бұқаралық ақпарат құралдарымен өзара iс-қимыл тұжырымдамасы қабылданғанын және мамыр айынан бастап оны iске асыруға Жоғарғы Сот жанындағы Соттардың қызметiн қамтамасыз ету департаментiнiң тиiстi құрылымдық бөлiмдерi мен облыстық соттардың төрағалары кiрiскенін айтып өтті.
– Тұжырымдамада «Сот және құқық тақырыбына маманданған журналистер қызметін көпшілікке насихаттау мақсатында өз материалдарын сот төрелігін жүзеге асыру бойынша соттар қызметі туралы кәсіби және обьективті ақпарат берген БАҚ өкілдерін ынталандыру бойынша іс-шараларды ұйымдастыру жоспарланып, бұл жұмысқа БАҚ-пен медиалық сипаттағы үкіметтік емес ұйымдардың өкілдері тартылатын болады. Тұжырымжаманы іске асыру аясында журналистердің кәсіби бірлестіктерімен, сондай-ақ, үкіметтік емес ұйымдармен бірлесіп, сот жүйесінің ақпараттық ашықтығын жақсарту мәселелері бойынша бірлескен іс-шаралар өткізілетін болады» деп көрсетілген. Осыған байланысты, бүгін «Жаңа электронды технологияларды қолдану мәселелері» тақырыбында БАҚ және ҮЕҰ басшыларымен кездесу ұйымдастырып отырмыз. Сонымен қатар, сәуір айында «Оңтүстік Қазақстан облысы соттарының қызметін үздік көрсеткен журналистік жұмыстарға конкурс туралы» ережені өзіміздің облыстық соттың сайтында және «Оңтүстік Қазақстан» газеті арқылы жарияладық, – деді Н.Шәріпов.
Мұнан соң, сот жүйесiне енгiзiлген жаңа электронды сервистердiң түрлерiмен таныстыруға арналған бейнероликтер көрсетiлдi. ОҚО бойынша соттар әкiмшiсi басшысының орынбасары Н.Оразғалиева «Сот жүйесiндегi жаңа технологиялар» тақырыбында баяндама жасап, «Сот кабинеті» электрондық іс жүргізу сервисінің сотқа жүгінушілермен өзара іс-қимыл негізінде сот ісін жүргізуді жеңілдетуге, сот жүйесінің ашықтығын, қолжетімділігінқамтамасыз етуге жол ашқанын мәлімдеді. Сондай-ақ, «ОҚО Азаматтық Альянсы» заңды тұлғалардың қауымдастық нысанындағы бiрлестiгiнiң президентi, облыстық мәслихаттың депутаты Ш.Жамалбекұлы соңғы жылдары сот жүйесінің ашық әрі қолжетімді бола бастағанын айтты. Ал Қазақстан Журналистер одағы ОҚО филиалының төрайымы
А.Қапбарова сот жүйесiндегi жаңа электронды технологиялардың азаматтар үшiн қолайлы екенiн атап өттi.
Айта кетейік, сот жүйесiнде бiрқатар нақты жұмыстар iске асырылған. Мәселен, өткен жылы ОҚО соттары бойынша 33 сот залы аудио және бейнетiркеу жүйесiмен жарақтандырылған болса, биыл олардың саны 2 есеге артып, 66 сот залы АБТ құралдарымен жабдықталды.
