23 наурызда қазақстандық танымал әнші Ресейдің НТВ арнасының «Орталық телеарна» бағдарламасына қатысып, Игорь Крутойдың әуені, Лара Фабианның сөзіне жазылған «Мадемуазель Хайд» туындысын бірінші рет орындады.
Орындады деген жәй сөз, дүйім елді осы классикалық туындымен толқытты да тебірентті. Ал 22-23 наурыз күндері Кремль сарайында жеке концертін берді. Қос концерті де аншлагпен өтті. Мәскеуге Димаштың жанкүйерлері әлемнің төрт бұрышынан, 56 елден келді. Шымкенттен де 50-ге жуық көрермен арнайы барды.
Мәскеудегі дебюттік концертінде Димашты қолдау үшін Қазақстанның Ресейдегі төтенше және өкілетті елшісі Иманғали Тасмағамбетов, Ресей премьер министрінің жұбайы Светлана Медведева, әнші Анита Цой, өз отандастарымыздың қатарында танымал өнер адамдарынан Ұлықпан Жолдасов қатысты.
Димаштың өзі концерті туралы берген шағын сұхбатында: «Тыңдармандарымның риясыз ықыласынан кейін өзімді Майкл Джексон сияқты сезіндім» - деп жауап берген. Бұған дейін Лондондағы жеке концерті де сәтті өткенін орындаушының жанкүйерлері жақсы біледі. Ал The World’s Best – «Әлемнің ең үздігі» байқауында мәреге аз қалған сәтте мәлімдеме жасап, өз орнын жастарға босатып бергені де сүйсінерлік жағдай.
Қай жерде, мейлі, қай елде де Димаш – сол Димаш. Өзінің қарапайым қазақи қалпынан танбай, ұдайы ана тілінде, қазақтың тілінде үн қатады. Әнін жанды дауыста жаныңды жеп айтады. Сол үшін біз Димашпен қалай мақтансақ та жарасады.
