Облыстық ардагерлер кеңесінің ғимаратында өңірдің ақын-жазушылары мен зиялы қауымының басын қосқан ҚР Жазушылар Одағының облыстағы өкілдігі өткен жылды қорытындылап, алдағы басым міндеттерді белгілеген келелі кеңесін өткізді. Жиынға ҚР Жазушылар одағы басқарма басшысының орынбасары Жанарбек Әшімжан, Шымкент қаласы әкімінің орынбасары Бахадыр Нарымбетов қатысты.
Жылқы жылы өңірдің зиялы қауымы үшін айтарлықтай нәтижелі болды. Қоғамның түйткілді дүниелерін негізге алған бірқатар ақын-жазушылардың ғылыми еңбектері мен шығармалары жарық көрді. Бірқатары есімдері еленіп, түрлі сый-дәрежелерге ие болды. Әйтсе де, белгіленген меже-міндеттерге қол жеткізіп, оқырманның шынайы бағасына ие болу үшін екіжақты байланысты қамтитын үлкен әдеби ортаны қалыптастыру маңызды болмақ. Осы орайда, ҚР Жазушылар Одағының облыстағы басшысы Бақытжан Алдияр бүгінгі күннің негізгі қажеттіліктеріне тоқталып өтті.
– Оқырман қауымның арасында жергілікті ақын-жазушылардың шығармашылығын өз дәрежесінде насихаттап, дәріптеу үшін, ең алдымен, Одақ жанынан ақылдастар алқасын құрған жөн болатын секілді. Сонымен қатар, жаңа жарық көріп жатқан шығармаларын зиялы қауым өздері орталық кітапханаларға табыстап, оқырмандар кешін жүйелі түрде ұйымдастырарлықтай жағдай жасағанымыз дұрыс. Жас талант иелерінің өлең-жырларын тұрақты түрде жергілікті БАҚ беттерінде жариялап, өсер ұлдың арқасынан қақсақ, Жазушылар Одағына деген көпшіліктің сенімін нықтай түсері анық, – дейді Б.Алдияр.
Сондай-ақ, кеңес барысында белгілі ақын-жазушылар Құлбек Ергөбек, Мархабат Байғұт, Ханбибі Есенқарақызы, Мұхтар Шерім сөз сөйлеп, өз ұсыныс-пікірлерін жеткізді.