Шымкент келбеті

Қазақстан халқы Ассамблеясының Президент сайлауын өткізу туралы үндеуін мақта-мата шикізатын өндіретін шымкенттік «South Textiline KZ» ЖШС қызметкерлері де бірауыздан қолдайды. Бұл шешімді кәсіпорын жұмысшылары елдегі тұрақтылықты сақтап қалуға жасалған оң қадам ретінде бағалайды.

– Президент сайлауын биыл өткізу жөніндегі ұсыныс дер кезінде көтерілген бастама болды, – дейді мекеменің автокөлік бөлімінің меңгерушісі Бақберген Абдуманапов. - Ел экономикасының тұрақты өсуіне біз де өз деңгейінде үлес қосып жатырмыз. Осы тұрақтылықты ұстап қалу үшін Қазақстан Президентін сайлап алуымыз керек деп есептеймін.
«South Textiline KZ» ЖШС-гі 2004 жылы ҚР Президенті Н.Назарбаевтың қатысуымен лентасы қиылып, алғашқы өнімдерін нарыққа ұсына бастаған еді. Бүгінде аталмыш мекемеде 500-ге таяу жергілікті тұрғын еңбек етуде. Қызметке қажетті станоктар Белгиядан, ал шикізат өңірдің бірқатар аудандарынан жеткізіледі. Яғни, нарыққа жол тартқан өндіріс материалдары толықтай отандық өнім ретінде ұсынылады. Мұнда дайын болған өнімдер бүгінде ел аумағынан өзге, Балтық жағалауы және Беларусь елдерінен үлкен сұранысқа ие болуда.