Шымкент келбеті

Елбасы Н. Назарбаевтың «100 нақты қадам» бағдарламасы жайлы сот саласының мамандары халыққа түсіндіру жұмыстарын жүргізуде. «Су арнасы ресурстары» мекемесінде өткен басқосуды Әл-Фараби ауданы сотының төрағасы Маратәлі Бекназаров жүргізіп отырды. Сот жүйесіне енгізілетін жаңалықтар туралы Әл-Фараби аудандық сотының судьясы Ғани Байарыстан жиналғандарға жіті түсіндірді.

- Бұл бағдарламада сот жүйесінің ашықтығына ерекше мән берілген. Азаматтардың сот төрелігіне қолжетімділігін жеңілдету үшін сот жүйесі инстанцияларын оңтайландыру, судья лауазымына кандидаттарды іріктеу тетіктерін көбейту және біліктілік талаптарын қатайту, «Оқуды және сот тәжірибесі арасындағы өзара байланысты күшейту үшін сот төрелігі институты мемлекеттік басқару академиясының құрылымынан бөлінуі керек»  деген міндеттер қойылған. Судьялардың есеп беру тәртібін күшейту; судьялардың жаңа этикалық кодексін жасау және т.б. мәселелері де Ұлт Жоспары – «100 нақты қадамда» көрсетілген, – дейді Ғани
Доғдырбайұлы.
Сондай-ақ, М. Әуезов атындағы Оңтүстік Қазақстан мемлекеттік университеті  «Саясаттану және халықаралық қатынастар» кафедрасының меңгерушісі, заң ғылымдарының кандидаты С. Мәжінбеков, Ішкі саясат бөлімі басшысының орынбасары А.Сәрсеева жиналғандарға бағдарламаның мән-мағынасын түсіндіріп, негізгі бағыттарына тоқталып өтті.