Шымкент келбеті

Мемлекеттік қызметкерлер үшін жұмыс барысында смартфон мен планшет қолданбау туралы енгізілген өзгеріс күшіне енді. Нақтырақ айтқанда, мемлекеттік орган қызметкерлері жұмыс уақытында фото-бейне камералары бар және интернет желісіне қосылатын гаджеттерді пайдалана алмайды. Бұдан былай мемлекеттік қызметкерлерге интернетке қосылмайтын қарапайым қалта телефонын ұстауға ғана рұқсат етілген.

Айта кетейік, бұл тыйымның жергілікті полиция қызметкерлері мен журналистерге қатысы жоқ. ҚР Президент Әкімшілігі Басшысының орынбасары Марат Бекетаевтың айтуынша, жергілікті полицияға «WhatsApp» арқылы хабарламалар алуға мүмкіндік беріледі. Осы ретте ІІМ Әкімшілік полиция комитетінің төрағасы Игорь Лепеха мұндай шешімнің ҚР Премьер-Министрінің Кеңсесімен келісілгенін мәлімдеген. Сондай-ақ, жуырда Орталық Комуникациялар қызметінде өткен брифингте ҚР Премьер-министрінің орынбасары Дариға Назарбаева журналистерге смартфон пайдалануға тыйым салынбағанын ерекше атап өтті. Бұл бұйрық мемлекеттік аппараттар мен мемлекеттік қызметкерлерге бағытталғанын және әкімдіктер тарапынан журналистерге смартфон пайдалануға тыйым салу бұйрыққа сәйкес келмейтінін баса айтты.
Мұндай өзгерістің енгізілуіне жоғары лауазымды тұлғалардың қолы қойылған бірқатар маңызды құжаттардың «WhatsApp» және «Facebook» желілері арқылы жұртшылыққа тарап кетуі себеп болды. Осы ретте, қызметтік ақпараттарға, мемлекеттік құпияларға қолжетімділігі бар қызметкерлерге смартфон пайдалануға тыйым салынған.