Шымкент келбеті

Оңтүстік Қазақстан облысының әкімі Жансейіт Түймебаев Сарыағаш ауданы, Абай ауылындағы мектептердегі орын алған келеңсіз жағдайға байланысты жауапты тұлғаларға шара көрді.

Осыған байланысты арнайы жиын өткізген әкім аталған оқиға дер кезінде назарға алынып, тиісті жұмыстар атқарылмағандықтан бұқаралық ақпарат пен қоғам арасында резонанс тудырғанын айтып, осы мәселеге қатысты жауапты азаматтарға шара көрілетінін жеткізді.

Нақты айтқанда осы мәселе бойынша тергеу амалдарының объективті және жан-жақты жүргізілуінің қамтамасыз ету үшін, тергеу амалдарының аяқталғанына дейін осы оқиғаға қатысты барлық лауазымды тұлғалар мен жауапты қызметкерлер өз қызметтерінен уақытша шеттетілді.

Атап айтсақ, Қазақстан Республикасының заңдылықтарына сәйкес облыс әкімінің орынбасары Ұ.Сәдібековке қатаң ескерту берілді. Ал Сарыағаш аудандық жергілікті полиция қызметі басшысы О.Бердалы мен Сарыағаш ауданы, Абай ауылдық жергілікті полиция бөлімшесінің басшысы Ә.Ибрагимов, ювеналды полиция бөлімшесінің №73 және №74 жалпы орта мектептеріне жауапты полиция инспекторы Қ.Сәриевтер қызметтерінен босатылды.

– Сонымен қатар аудандағы жағдайды дер кезінде назарға алып, тиісті шара қабылдамаған аудан әкімі Қ. Әбдуәлиевке қатаң сөгіс жариялаймын. Бұдан бөлек сол салаға жауапты аудан әкімінің орынбасары Қ. Қыстаубаевқа шара көруді және Сарыағаш аудандық білім бөлімінің басшысы Б.Майрихов пен №73, №74 жалпы орта мектеп директорларын тергеу амалдары аяқталғанша жұмыстан шеттетуін тапсырамын. Бұл оқиға аудандағы білім беру саласында бірқатар проблемалардың бар екенін көрсетіп берді. Қазіргі таңда менің тапсырмаммен жұмыс тобы құрылып, аудандағы жағдай мұқият тексеріледі, – деді Жансейіт Түймебаев.

Сондай-ақ, өңір басшысы облыстық білім басқармасының басшысы И.Сағындықовқа сөгіс түрінде шара көрілетінін атап өтті. Аймақ басшысы, бұған қоса аталған мәселе бойынша эксперттік комиссиямен ауданда және облыста екі рет медициналық тексерулер жүргізіліп, оның қорытындысы бойынша баланың зорланғаны расталмағанын мәлім етті.

Жиын барысында өңір басшысы еліміздің бала жөніндегі уәкілі Зағипа Балиеваның облысымызға арнайы келгенін мәлімдеді. ҚР Парламенті Мәжілісінің депутаты Зағипа Балиева 14 наурыз күні «жоғары сынып оқушылары тарапынан зорлық көрді» делінген баланың жай-күйімен танысты. Облыстық ішкі істер департаментінде өңіріміздің журналистерімен кездесіп, оқиғаға қатысты пікірін білдірді. Бұған кейін еліміздің бала жөніндегі уәкілі 1 сынып оқушысын Астана қаласындағы арнайы мамандардың қатысуымен кешенді сот-медициналық сараптамасына өткізу үшін алып кетті. Алдағы уақытта бұл мәселе қатаң бақылауға алынып, өңірдегі барлық білім ұяларында алдын алу жұмыстары жүргізілетін болады.

Оңтүстікте 16 жаңа су қоймасы салынатын болды. Бұл туралы облыс әкімі Жансейіт Түймебаевтың  төрағалығымен өткен кезекті мәжілісте айтылды.

Жиында облыстық төтенше жағдайлар департаментінің бастығы Нұрболат Дербісов пен облыстық ауыл шаруашылығы басқармасы басшысының орынбасары Тұрғанбек Оспанов Оңтүстікте жаңадан жобалық сыйымдылығы 320,5 млн. шаршы текше метрді құрайтын 16 сақтау орнын салуға болатынын айтты. Аталған нысандар іске қосылғанда облыста 17 мың га суармалы жер жаңадан айналымға қосылады екен. 

Облыс әкімі жаңадан салуға болатын 16 су қоймасының 3 млн халқы бар өңір үшін тым аз екенін айтып, жалпы жұмысты сынға алды. Бұл ретте, аймақ басшысы көршілес Жамбыл облысында 141 су қоймасының бар екенін алға тартты. Сондықтан әкімдікке қосымша 40-50 жоба дайындауды тапсырды. 

Айта кету керек, облыс аумағында 43 су қоймасы орналасқан.

Оңтүстік Қазақстан облысының әкімі Жансейіт Түймебаевтың төрағалығымен өңір активі Елбасы Нұрсұлтан Назарбаевтың «Болашаққа бағдар: рухани жаңғыру» атты мақаласын талқылады. Жиынға облыстық мәслихат депутаттары, аудан, қала әкімдері, облыстық басқармалар, аумақтық департамент, құзырлы орган басшылары және облыс ардагерлері, зиялы қауым мен БАҚ өкілдері, жалпы саны 250-ге жуық адам қатысты.

Өңір басшысы Президенттің бағдарламалық мақаласы соңғы күндерде ел өміріндегі қоғамдық-саяси маңызы зор оқиғаның бірі болғанын ерекше атап өтті. Онда Елбасы экономикалық және саяси жетістіктерімізді дамыту жолында рухани қорымызды барынша байытатын көп салалы жаңа бағдарламасын ұсынып отырғанына тоқталды. 

– Ел Президенті қоғамның рухани жаңғыруына халықтың дәстүрі мен ұлттық мәдениеті негіз болуы тиіс екенін айтты. Мұндай бағытты ұстану кешегі күн мен бүгінді, бүгін мен ертеңді жалғастырады. Сондықтан біздің міндетіміз Мемлекет басшысының тапсырмасын орындай отырып, мақалада көрсетілген жобаларға басты назар аудару, – деп атап өтті Жансейіт Қансейітұлы.

Мақсат айқын, бағытымыз белгілі, ол – әлемдегі ең озық отыз елдің қатарына қосылу екенін айтқан аймақ басшысы мақаладағы «Таяу жылдардағы міндеттер» деген екінші бөлімінде Елбасымыз бәрімізге, әрбір қазақстандыққа нақты міндеттер жүктегенін атап өтті.

Сондай-ақ, жиында ҚР Президенті Н. Назарбаевтың «Болашаққа бағдар: рухани жаңғыру» бағдарламалық мақаласы бойынша Халықаралық «Алаш» сыйлығының лауреаты, жазушы М. Байғұт, М. Әуезов атындағы Оңтүстік Қазақстан мемлекеттік университеті филология факультетінің деканы, профессор Б. Тілеубердиев, Шымкент қаласы, Ыбырай Алтынсарин атындағы №65 мектеп-гимназияның директоры Қ. Кәдірбаева, облыстық «Южный Казахстан» газеті бас редакторының орынбасары К. Исмаилов өз пікірлерін білдірді.

Елбасымыздың мақаласында атап көрсетілген мәселелерді негізге ала отырып, облыс әкімі сала мамандарына мақаланы насихаттау бойынша ағымдағы жылдың соңына дейін облыстық және аудан, қалалық деңгейде іс-шаралар ұйымдастырып, желілік кесте әзірлеуді тапсырды.

Сонымен қатар, аймақ басшысы бұқаралық ақпарат құралдарында жан-жақты түсіндіру жұмыстарын жүргізуді, жаңа тәсілдерді пайдалана отырып, әлеуметтік желілерде жұмысты күшейтуді айтты. Актив отырысын қорытындылаған облыс әкімі Елбасымыздың бұл мақаласын насихаттау, түсіндіру, жүзеге асыру – мемлекеттік органдарға ғана емес, жалпы қоғамға жүктелген міндет екенін жеткізді.

Жиында күн тәртібіндегі екінші мәселе – Елбасының «Қазақстанның Үшінші жаңғыруы: жаһандық бәсекеге қабілеттілік» атты Жолдауының облыста жүзеге асырылу барысы бойынша облыс әкімі орынбасарларының баяндамалары тыңдалды.

Іскерлік климатты қалыптастыруда оңтүстікқазақстандық кәсіпкерлердің белсенділігі жоғары. Яғни, ел аумағында үздік үштікке енеді. Шымкент қаласына келген Қазақстанның кәсіпкерлер құқығын қорғау бойынша өкілі Болат Палымбетов осындай баға берді. Облыс әкімі Жансейіт Түймебаевтың қатысуымен өткен кеңейтілген жиында кәсіпкерлік саласындағы өзге де өзекті мәселелер талқыланып, алдағы жоба-жоспарлар қаралды.

Жиында өңірдің іскерлік климатын қалыптастыру, көлеңкелі экономика мен сыбайлас жемқорлыққа қарсы күрес, салық төлеу, жер телімдерінің берілуі сияқты өзекті мәселелер жөнінде сөз қозғалды. Республика бойынша «Атамекен» кәсіпкерлер палатасына шағын, орта және ірі бизнеске қатысты түскен арыз-шағымдардың басым бөлігі де осы мәселелер жөнінде тіркеледі. Өңір басшысы аймақта кәсіпкерлікке қажетті жер телімдеріне деген тапшылық туындап отырғанын жеткізді. 

– Оңтүстік Қазақстан облысында бос жатқан бірде-бір жер телімі жоқ. Облыс орталығындағы барлық коммерциялық жерлердің сатылып кеткенін жасыруға болмас. Сондықтан біз құрылысы ұзақ жылдар бойы тоқтап тұрған жер телімдерін анықтап, қадағалауымыз қажет. Бұл ретте аудан-қалалардағы барлық жер телімдері тексеруден өтіп, олардың тиімділігін арттыру жолдарын ойластырған абзал, – деді Жансейіт Қансейітұлы. 

Сондай-ақ, инвестор тартудағы көшкі-қон заңнамаларының бірқатар заңдылықтары мен мемлекеттік тапсырысты бөлу кезінде туындайтын құжатбастылық мәселелері де жиында тағы бір екшеленді.

Облыс әкімі Жансейіт Түймебаевтың төрағалығымен селекторлық жиын өтті. Онда әлеуметтік маңызы бар азық-түлік тауарлары бағаларының өсуіне жол бермеу жөніндегі шаралар және Үкімет отырысында қаралатын мәселелер жайы талқыланды.

Аталған мәселе аясында облыстық Кәсіпкерлік, индустриалды-инновациялық даму және туризм басқарма басшысының орынбасары Ілияс Оспанов басқарма тарапынан бүгінгі таңда бағаны тұрақтандыру жұмыстары атқарылып жатқанын баяндады. 

Облыстық статистика департаментінің мәліметіне сәйкес, облыста ағымдағы жылдың басынан бүгінгі күнге дейін 6 түрлі азық-түлік тауары – қырыққабат, картоп, пияз, қой еті, тұздалмаған сары май және мәйекті қатты ірімшіктің құны қымбаттағаны байқалған. Бұл ретте басшы орынбасары мұның себебін бірқатар азық-түлік тауарларының көршілес Қырғызстан мен Өзбекстан, Ресей, Беларуссия елдерінен және еліміздің өзге де облыстарынан тасымалданып жатқанынан деп түсіндірді.

Осы орайда аймақ басшысы егін егіп, мал бордақылауға арналған жер телімі бола тұра, аталған жұмыстармен айналыспай жүрген өңіріміздегі бос жатқан жерлердің картасын әзірлеуді тапсырды. Соның аясында қажетті шара қабылдап, бағаны тұрақтандыруға болатынын жеткізген әкім тұрақтандыру қорын жергілікті азық-түлік тауарларымен толықтырып, аймақты қажетті өніммен толықтай қамтамасыз ету керектігін айтты.

Облыс әкімдігінде өңір басшысы Жансейіт Түймебаев мәдениет саласы және зиялы қауым өкілдерімен кездесті. Жиынға облысымыздың белгілі ақын-жазушылары мен ғалым, археологтары, суретшілер мен қолөнер шеберлері, композиторлар және мәдениет саласының қызметкерлері қатысты.

Жиында облыстық мәдениет басқармасының басшысы Нұрболат Ахметжанов салада жыл басынан бергі 9 айда атқарылған жұмыстарды баяндады. Басқарма басшысының мәліметінше, өңіріміздегі 423 кітапханадағы кітаптар саны 74 мыңнан астам жаңа кітаптармен толықтырылып, жалпы қор 7 млн 185 мың данаға жеткен. Электрондық кітап қоры 17355 дананы құрап отыр.

Кездесу барысында облысымыздағы ақын-жазушылар мен профессор-ғалымдар және археологтар тарихи, рухани мұралар жайындағы өзекті мәселелерді ортақ талқыға салып, бірқатар ұсыныстарын жеткізді. Мәселен, олар өңірдің мәдениетін көтеру мақсатында ұлттық идеологияны қалыптастырып, қазақтың дәстүрлі өнерін дамыту, талантты жастарға қолдау көрсету үшін барлық аудан, қалалардан ақындар мектебін ашу мәселесін, өңірімізде тарих және мәдениет үшін айрықша маңызы зор археология және сәулет ескерткіштерін қорғау және Шымкент, Сайрам қалашықтарын ЮНЕСКО-ның тізіміне енгізу мәселелерін тілге тиек етті.

Өз кезегінде, облыс әкімі өңірдің туризм саласы бағыты бойынша үлкен тұжырымдама жасалынып жатқанын атап өтіп, туристерге Түркістанның рухани орталық екенін көрсету қажеттігін айтты.

– Бүгінде киелі Түркістанда туристер үшін кесенеден басқа баратын жер жоқ. Ол туралы деректерді көбірек насихаттау үшін Түркістан қаласынан Яссауидің жеке мұражайы мен ол туралы кейінгі ұрпаққа тереңірек таныту үшін Яссауи мектебін ұйымдастыруды ұсынамын, – деді облыс әкімі.

Сондай-ақ аймақ басшысы салт-дәстүр мен байырғы әдет-ғұрпымызды, ұлттық тағамдарымыз бен қолөнермізді дамыту қажеттігіне тоқталды. Осы бағыттағы жұмыстарды жандандыру мақсатында рухани саладағы әрбір сала мамандарынан облыс әкімі жанындағы ақылдастар алқасын құрып, сол азаматтардың ақыл-кеңестерін тыңдауға дайын екенін жеткізді.
Кездесу қорытындысы бойынша айтылған пікірлер мен ұсыныстар ескеріле отырып, мәдениет саласының жұмысын жақсарту бойынша облыс әкімдігінің хаттамасы толтырылды. Бұл ретте облыс әкімі Ж.Түймебаев әрбір көтерілген кемшіліктердің сапалы әрі мерзімді орындалуы қадағаланатынын ескертті.