ҚМДБ-ның төрағасы, Бас мүфти Ержан қажы Малғажыұлының бастамасымен Қазақстан мұсылмандары діни басқармасы жанынан құрылған ақпараттық-насихат тобы Шымкент қаласына келді. Жер-жерлерде көпшілікпен кездесу ұйымдастыруды ойға алған топтың құрамында білікті де тәжірибелі имам-ғалымдар, теологтар мен дінтанушылар бар.
Облыстық орталық мешітте жергілікті БАҚ өкілдерімен баспасөз мәслихатын өткізген ақпараттық-насихат топ мүшелері атқарылған жұмыстардың қорытындысын мәлімдеп, алдағы мақсат-міндеттері туралы әңгімеледі.
– Апта ішінде арнайы жасақталған топ шалғай ауылдарда жергілікті тұрғындармен кездесіп, ондағы қажеттіліктерге көңіл аударды. Сонымен қатар, әр түрлі режимдегі түзеу мекемелеріндегі жазасын өтеушілерге адамгершілік құндылықтарды насихаттады, – дейді облыстың бас имамы Ахметжан Керімбек.
Айта кетейік, ақпараттық-насихаттық топтың негізгі мақсаты – дәстүрлі дініміз – Исламның құндылықтарын дәріптеу, халықтың діни сауатын арттыру, қалың бұқара арасында ҚМБД-ның әлеуетін арттырып, алға қойған бағыттармен таныстыру. Сондай-ақ, ҚР Президенті
Н.Назарбаевтың Қазақстан халқына Жолдауын насихаттау, ел арасында деструктивті, жат ағымдардың таралуының алдын алып, ақпараттық насихаттау болып табылады.