Бүгін Шымкент тұрғындары Ұлыстың ұлы күніне орай «Қошқар Ата сейілі» атты көктем мерекесін тойлады. Қошқар Ата өзені маңына жиналғандар қазақтың ұлттық бұйымдар көрмесі мен мерекелік бағдарламаны тамашалап, қазақша күрес, кір тасын көтеру, асық ойыны, қол күресі сынды спорттық шараларға куә болды.
Сондай-ақ, аудан-ауылдардан шаруалар алып келген асыл тұқымды қошқарлар да шараның басты көрігіне айналды. Оларға ғалымдар, ауыл шаруашылығы саласы мамандары баға беріп, жүлделі орындар тағайындалды.
Асыл тұқымды қошқарлар көрмесінде Бауыржан Оразалиев басшылық жасайтын Қазығұрт ауданындағы «Сералы» асыл тұқымды шаруа қожалығы жеңімпаз деп танылды. Аталған шаруа қожалығының ұжымына 300 мың теңге көлемінде қаржылай сыйлық табыс етілді.
Көпшіліктің қызығушылығын тудырған тағы бір байқау «қошқар көтеру» жарысы болды. Білекті де жүректі, «сен тұр, мен атайын» дейтін жігіттер иықтарына 85 келітартатын қошқарды салып, көтеріліп-тұрудан бақ сынады. Бұл бәсекеде аударыспақтан Азия чемпионы Біржан Қосалиев жеңіске жетті. Төлебилік жігіт 34 рет үзіліс жасамай, отырып тұрды.
«Қошқар Ата сейілі» көктем мерекесін ұйымдастырушылардың бірі Кеңес Исмаилов, бұл мереке тек Оңтүстік жұртшылығына ғана тән екенін, соңғы рет жүз жыл бұрын тойланғанын айтады.
– Ғабидолла Әбдірахымов қаламызға басшы болып келгенде белсенді азаматтардың басын қосып, туризм мен салт-дәстүрді насихаттап, дамыту үшін қандай ұсыныстарыңыз, идеяларыңыз бар деп сұраған. Сол кезде өлкетанушы А.Гончаров екеуміз осы «Қошқар Ата сейілі» мерекесі туралы ұсынысымызды айттық. Бірден қолдау тапты. Байырғы кезде ата-бабаларымыз Қошқар Ата өзені бойында асыл тұқымды қошқар сойып, Алладан молшылық, тыныштық тілеген, – деді К. Исмайлов.
Енді бұл мерекені тойлау жыл сайын дәстүрге айналмақ.