«Нұр Отан» партиясы Төрағасының бірінші орынбасары Мұхтар Құл-Мұхаммед осы аптада Шымкент қаласына іссапармен келді. Мақсат – өңірдегі мемлекеттік бағдарламалардың орындалу барысымен және әлеуметтік инфрақұрылымның даму қарқынымен танысу.Сапар барысында М. Құл-Мұхаммед «Нұр Отан» партиясы Оңтүстік Қазақстан облыстық филиалының конференциясына қатысты. Онда облыс әкімі Жансейіт Түймебаев партияның облыстағы филиалының төрағасы болып сайланды. Партия Төрағасының бірінші орынбасары Ж. Түймебаевтың алдағы қызметіне сәттілік тіледі.
Партияның өңірдегі өкілдерімен кездесуде Мұхтар Абрарұлы Мемлекет басшысы белгілеген міндеттер мен тапсырмалардың маңыздылығына тоқталды. Ондағы басты міндеттің бірі – негізгі мемлекеттік бағдарламаларды іске асырудың сапасын қатаң бақылау. Бұдан бөлек, жиында партияның сайлауалды бағдарламасын және партиялық жобаларын жүзеге асыру, ішкі тәртіпті күшейту, қоғамдық-саяси жағдайға тұрақты мониторинг жүргізу мәселелері сөз болды.
Мұхтар Құл-Мұхаммед Шымкенттегі жаңадан бой көтерген тұрғын үй кешендерінің құрылыс жұмысымен де танысты. 5 қабатты тұрғын үйлер пайдалануға берілген сәтте, азаматтарды тұрғын үймен қамтып қана қоймай, қала сәулетіне ерекше реңк беретін болады. Жалпы, биыл облыста 1140 пәтер пайдалануға берілген. Олардың жалпы ауданы 64 мың шаршы метрді құрайды. Бұдан бөлек, 243 үйдің құрылыс жұмыстары жүргізілуде. Оның 147-сі – мемлекет бюджетінен, ал қалғаны ұлттық компаниялардың, тұрғын үй комбинаттарының және инвесторлардың есебінен қаржыландырылған.
Атқарылған жұмыстардың нәтижесінде, мамандар биыл өңірде пайдалануға берілген үйлер бір жарым есеге артқанын айтады. Мұндай жетістікке жетуде «Нұрлы жол» мемлекеттік бағдарламасы өз септігін тигізуде. Сондай-ақ, «Нұрлы жол» бағдарламасының басым бағыттарының бірі – мектеп құрылысы. Бұл бағытта, өңірде 25 білім ошағын салу көзделген. Сапар барысында «Нұр Отан» партиясы Төрағасының бірінші орынбасары «Достық» шағынауданында жаңадан салынып жатқан 1200 орындық білім ордасында болды.
– «Нұрлы жол» бағдарламасы арқылы Оңтүстік Қазақстан облысына республикалық бюджеттен 46 миллиард теңге бөлінген. Қаржы тиімді жұмсалар болса, көптеген түйткілді мәселелердің шешімі табылмақ. Мұның барлығы Мемлекет басшысының сарабдал саясатының нәтижесінде орындалуда, – деді Мұхтар Құл-Мұхаммед.
«Нұр Отан» партиясы Төрағасы бірінші орынбасары сапарында жаңадан салынған жылыжай кешені мен алдыңғы қатарлы өндірістерді аралады. Сонымен қатар, М. Әуезов атындағы Оңтүстік Қазақстан Мемлекеттік университетінің профессор-оқытушылар құрамымен және студенттерімен кездесті. Бұл шара ел Тәуелсіздігінің 25 жылдығына арналды.
Жеңісбек СЕРІКҰЛЫ