Шымкентте Бадам өзеніндегі көпір жөндеуден кейін қайта пайдалануға берілді. Бұл көпір қайта жөндеу үшін ағымдағы жылдың 25 мамырында уақытша жабылған болатын.
Бадам өзені арқылы өтетін, мал базары маңындағы жол өткелі өткен ғасырдың 60-жылдары салынған. Оның жөндеуге дейінгі жағдайы жүргізушілер мен Шымкент қалалық жолаушылар көлігі және автокөлік жолдары бөлімінің мамандарын біраз алаңдатқан еді. Айта кетерлігі, көпір тек екі шағынауданды ғана жалғастырып жатқан жоқ, республикалық тасжолдың маңызды бір бөлігі саналады.
Жөндеу жұмыстары 10 маусымға дейін созылады деп жоспарланған болатын. Дегенмен, құрылысшылар жұмысты мерзімінен бұрын, яғни 10 күнде аяқтап отыр. Мамандардың мәлімдеуінше, көпірдің жол жабыны толық жаңартылған, ал тіреулері әлі де жарамды.
