Шымкент келбеті

«Сайрам» тұрғын алабы жаңа кейіпке енбек. Кезінде Испиджаб деп аталған, қазіргі Шымкенттің көне ауданының көшелерінде таяу болашақта сәулет ескерткіштері мен заманауи ғимараттар қатар бой түзейді.

Қала әкімі Ғ. Әбдірахымов аталған тұрғын алапқа барып, тұрғындармен кездесті. Сапар барысында алдағы жоспарды қалай жүзеге асыру керектігін жергілікті тұрғындармен ақылдасты. Билік өкілдерінің «Сайрам» тұрғын алабындағы көшпелі отырысы Наурыз алаңын аралаудан басталды. Ашылғанына 26 жыл болған бұл саябақта қазір қайта құру жұмыстары жүруде. Енді екі аптадан соң жөндеу аяқталмақ. 

Кездесуде орталық көшелердің ахуалы да сөз болды. Шаһар басшысы осындағы кафелер мен дүкендердің иелерін ғимараттарды жөндеп, әрлеуді, таза ұстауды тапсырды. Бұл елдімекеннің көшелері де шұғыл жөндеуді қажет етеді. Осы ретте әкім тұрғын алабының орталық көшесіндегі шұңқырларды тез арада жөндеуге нұсқау берді. Ал Леңгірге апаратын жол толық жөнделмек.

– Қазір міне, саябақ пен бірнеше көшені аралап көрдік. Ескі айналма әткеншекті орнынан аламыз. Көшенің көркін бұзған орындарды да ретке келтіреміз. Тұрғын ретінде сіздер өз ұсыныстарыңызды айтыңыздар, біз бірге ақылдасып шешеміз, – деді қала әкімі.

Шымкент қаласы Әл-Фараби ауданы әкімі аппараты аудандық Ардагерлер кеңесімен бірлесіп, 8 наурыз – Халықаралық әйелдер күніне арналған мерекелік іс-шара ұйымдастырды.

– Ардақты аналар, қымбатты қыз-келіншектер! Сіздердің қоғамдағы алатын орындарыңыз зор, құрметтеріңіз қашанда биік! Сіздерге зор денсаулық, амандық тілей отырып, мерекелік көңіл күй сыйлауға рұқсат етіңіздер, – деген Бауыржан Ахметәліұлы ауданның өсіп-өркендеуі мен даму жолына қосқан үлесі зор қыз-келіншектерді алғыс хат пен мерекелік сый-сыяпатын табыстады.

ҰОС және Тыл ардагерлері, «Алтын алқа», «Күміс алқа» иегерлері, заң және кәсіпкерлік саласының үздік мамандары, жергілікті БАҚ және аудандық «Нұр Отан» партиясының өкілдері, «Аналар үйі», Халыққа қызмет көрсету орталығы, сондай-ақ, білім саласының қызметкерлері мен үй басқарушылары салтанатты шараның қадірлі қонағы болды. Мереке иелері эстрадалық, дәстүрлі және халық әндерін тыңдап, көктемнің нәзік гүліндей болған бишілердің өнерін тамашалады.

«Қайнар» қонақүйінде Қаратау ауданы әкімі жанындағы әйелдер істері және отбасылық-демографиялық саясат жөніндегі комиссияның ұйымдастыруымен «Іскер әйел – қоғам тірегі» тақырыбында форум өтті. Аудандағы іскер әйелдердің басын қосқан жиынның мақсаты – гендерлік саясатты қолдау, әйелдің белсенділігін арттырумен қатар оларды қоғамдағы бала тәрбиесіне қатысты мәселелерге атсалысуға шақыру еді.

– Сіздердің әрбіріңізді өз салаңыз бойынша үздік, отбасы өмірін үйлестіре білетін мықты, сондай-ақ айтар ойы бар ықпалды азаматша деп білеміз. «Бір қолымен бесігін, екінші қолымен әлемді тербеткен» әйел ретінде танимыз. Сондықтан да Қаратау ауданы бойынша жастар мен жасөспірімдердің тәрбиесіне көңіл бөлулеріңізді сұраймыз. Күйбең тіршілік пен зорлық-зомбылықтан дәрменсіз күйге түскен әйел өз баласына да көңіл бөле алмайды. Міне, сондай жандар болса, олардың өмірін жақсартуға, жұмысқа орналасып, азамат ретінде құқығы қорғалып, баласына жақсы тәрбие беруге сіздермен бірігіп, мүмкіндік туғызайық, – деді Ғабит Патшаханұлы.

Форумға облыстық әйелдер кеңесі төрайымы Б.Жандосова, облыс әкімі жанындағы әйелдер ісі және отбасылық-демографиялық саясат жөніндегі комиссия мүшесі Г.Әбілдаева және облыстық іскер әйелдер қауымдастығының төрайымы Қ.Бикеновалар қатысып, өз ойларын ортаға салды. Ал «Даму» қорының бас менеджері М.Бердалиева кез келген әйелдің кәсіпкер бола алатынын және мемлекет тарапынан әрбір азаматқа бастапқы қолдау ретінде 18 млн теңге көлемінде несие беру мүмкіндігі қарастырылғанын атап өтті.
Форумның екінші бөлімі сергіту тренингтерімен жалғасып, қатысушыларға сертификаттар табысталды. Сондай-ақ, Қаратау ауданы әкімі іскер азаматшаларды 8 наурыз мерекесімен құттықтап, сый-құрмет көрсетті.

Мүлiктi жария етудің жайы қалай?

Абай ауданы әкімінің орынбасары Е. Бекназаровтың төрағалығымен кезекті отырыс өтті. Онда мүлікті жария ету науқаны талқыланды. Отырыстың күн тәртібінде негізгі тақырып бойынша Е. Бекназаров баяндама жасады.

Оның айтуынша, мүлікті заңдастыруға байланысты жұмыстар ауқымды әрі жауапты. Бүгінге дейін 2374 хабарлама таратылып, тиісті мәліметтер берілген. БАҚ арқылы 77 мақала жарық көрген. Аудан әкімдігі жанынан құрылған комиссияға рәсімдеуге 1212 өтініш қабылданып, оның 900-і жарияланды. Жарияланған жылжымайтын мүліктің құны 12 260 991 теңге болды.
– Мүлікті заңдастыруға байланысты жұртшылықты толғандырған мәселелер көп. Кейбіреулер заң аясында жекеменшік пәтерін қайта жобалауға бола ма деп сұрайды. Бағалы қағаздарды заңдастыру мәселесімен келгендер де бар. Біз оларға аудандық комиссия тек жылжымайтын мүлікті заңдастырумен айналысатынын түсіндірдік, – дейді Е. Бекназаров.
Отырыс қорытындысы бойынша аудан әкімінің орынбасары Е. Бекназаров заңның жаңа нормаларын тұрғындарға түсіндіріп, сала мамандарына науқанды аяқтауды тапсырды.

Заң нормалары сақталуы тиiс

Абай ауданы әкімдігінің қызметкерлері арасында сыбайлас жемқорлыққа қарсы іс-қимыл тақырыбында дөңгелек үстел өтті.

Дөңгелек үстелде қоғамда сыбайлас жемқорлыққа қарсы күрес жайы сөз болды. ҚР Мемлекеттік қызмет істері министрлігінің ОҚО бойынша департаментінің бас маманы Алексей Колосков заң нормалары талаптарының сақталуы жайында баяндама жасады. Сондай-ақ Абай ауданы прокурорының көмекшісі Жанар Нұрланқызы қызметкерлер тарапынан қойылған сауалдарға жауап берді.
Сыбайлас жемқорлық – бүгінде қоғамдағы өзекті мәселе. Ол белең алып кетсе елдің дамуына кері әсерін тигізеді.
Біздің қоғамда сыбайлас жемқорлыққа орын жоқ. Халықтың күш-жігерін біріктіріп, осы дерттің одан әрі ушықпауы үшін барлық амалдарды қолдану арқылы ғана бұл құбылысқа тиімді түрде қарсы тұра алады.

Көпбалалы аналар марапатталды

Өскелең ұрпақты тәрбиелеуде ананың рөлі ерекше. Баласын елдің қызметіне лайықты азамат ретінде тәрбиелейтін жан барлық мақтауға лайық. Сондай аналардың демографияға да үлес қосып, қазіргі таңда жас аналардың «Батыр ана» атанып жатқаны қуантады.

Әлемге өмір сыйлайтын аналарға деген құрмет қашанда маңызды. Адамзат баласының барлығына да жарық дүние сыйлаған анаға құрмет көрсету-парыз. Бұл орайда мемлекет те ана мен балаға барынша жағдай жасап, жан-жақты қолдау көрсетуде. Президент Жарлығына сәйкес Абай ауданы әкімдігі 28 көпбалалы ананы марапаттады. Оның ішінде 5 «Алтын алқа» және 23 «Күміс алқа» иегерлерін аудан әкімнің орынбасары Г. Ташимова құттықтады.
Абай ауданы бойынша 2989, «Алтын» (1205) және «Күміс» (1784) алқа иегері бар. Енді көп балалы аналар әлеуметтік жәрдемақы алу үшін төлем орталықтарына жүгінуге құқылы. Сонымен қатар, олар бір жыл ішінде қоғамдық көлікті тегін пайдалана алады.

Алтыншы шақырылған Шымкент қалалық мәслихатының кезектен тыс бесінші сессиясында ҚР Президент әкімшілігі мен облыс әкімі Б. Атамқұловтың келісімімен Қаратау ауданының әкімі болып Ғабит Патшаханұлы Мәуленқұлов тағайындалды.
Қазақстан Республикасының 2001 жылғы 23 қаңтардағы «Қазақстан Республикасындағы жергілікті мемлекеттік басқару және өзін-өзі басқару туралы» Заңының 6-бабына сәйкес, қалалық мәслихаттың кезектен тыс бесінші сессиясында жаңа аудан әкімінің кандидатурасы мақұлданды.
Сессияның күн тәртібінде Қаратау ауданы әкімін тағайындауды келісу туралы Шымкент қаласының әкімі Ғабидолла Әбдірахымов баяндама жасады. Сессия жиынынан соң қала әкімі Ғабидолла Әбдірахымов Қаратау ауданы әкімдігіне жаңа басшысы Ғабит Патшаханұлы Мәуленқұловты таныстырып, жаңа қызметіне сәттілік тіледі.
Ғабит Патшаханұлы 1977 жылы 22 наурызда Оңтүстік Қазақстан облысы Созақ ауданы Шолаққорған ауылында туылған.
Қ. А. Яссауи атындағы Халықаралық қазақ-түрік университетінің Халықаралық құқық және нарық академиясы мамандығы бойынша жоғары білім алған. Алғаш еңбек жолын 2000 жылы Каспий экологиялық прокуратурасының маманы ретінде бастаған. 2010-2016 жылдары Қазақстан Республикасы Жоғарғы Сот аппараты Қазақстан Республикасы Жоғарғы Сотының қызметін қамтамасыз ету департаменті азаматтық және әкімшілік жұмыстары бойынша бақылау сот алқасы хатшылығының меңгерушісі, 2016 жылы 4 қаңтардан бастап, Қазақстан Республикасы Жоғарғы Сот аппараты Қазақстан Республикасы Жоғарғы Сотының қызметін қамтамасыз ету департаменті азаматтық істер жөніндегі сот алқасы хатшылығының меңгерушісі болып еңбек еткен.

Шымкентте мемлекет пен жекеменшік серіктестіктің арқасында жаңа шағынаудан салынып жатыр. Құрылысшылар 495 пәтерлі алғашқы 5 үйді алдағы қарашада тапсыруды көздеп отыр.

Жұмыс алаңында 500-ге тарта жергілікті жұмысшылар еңбек етуде. Құрылыс материалдары да жергілікті өнімдер. Бұл жерде жалпы аумағы 98 мың шаршы метрден асатын 1 мың 112 пәтер салу жоспарда бар. Жаңа шағынауданда болған Мәжіліс депутаты Мұхтар Ерманның айтуынша, жұмыс кестеге сай әрі сапалы атқарылуда.
– Мега шаһардың үлкен жобаларын көріп жатырмыз. 500 пәтерлік үлкен тұрғын үй кешені, аурухананың құрылысы, жаңа мектептің құрылыстары жүргізілуде. Бұл оңтүстік Қазақстан облысының үлкен патенциалы бар екенін көрсетеді, – дейді Мұхтар Ерман.

Абай – халқы тығыз орналасқан аудан. Қазір қала орталығы қарқынды даму жолына түсті. Жаңа құрылыстар салынып, инфрақұрылым жақсара бастады. Әкімдік тұрғындардың жайлы өмір сүруіне жағдай жасауды басты назарда ұстайды. Ауданның бүгінгі тыныс-тіршілігін білу мақсатында, бірқатар құрылыс нысандарын аралаған болатынбыз. Аудан әкімінің орынбасары Нұрлан Тілеш бізге атқарылған жұмыстарды баяндай келе, әлі де шешімін таппаған мәселелердің барын алға тартты.

ТҰРҒЫН АЛАПТАҒЫ ИГIЛIКТI IСТЕР

Қызылжардың тұрғындары еңбексүйгіш жандар. Олар Жер-Ананың төсінен несібесін тауып отыр. Бау-бақша өсіріп, күнделікті нәпақасын айырады. Екі жыл бұрын қызылжарлықтар сусыз қалған болатын. Жуырда түйткілге айналған мәселе шешімін таппақ. Жаңа су құбырын жобалау жұмыстары қолға алынбақ. Абай әкімдігі аппаратының халықпен жұмыс бөлімінің меңгерушісі Ержан Саржан Игілік, Жаңаталап, Қызылжар елді мекендерінде жаяу жүргіншілер мен жол салынатынын айтты. Күн көзімен жылтырап жатқан жаңа асфальттың сапасына көңіл сүйсінді. 8 шақырым жолды жаңғырту мақсатында бюджеттен 116 млн теңге бөлінген. Күзге дейін жол шаруашылығы жұмысты толық бітіреді. Одан бөлек, тұрғын алапқа жасанды жол кедергілері, ал мектеп маңына бағдаршам орнатылмақ.
– Тұрғын алап қаланың шет аймағында болғандықтан, ескі жоба бойынша орталық жолдар мен жаяу жүргіншілер өткелдері қарастырылмаған. Қазіргі уақытта Әбдіраимов көшесінің 17 шақырымын жарықтандыру жөнінде ұсыныс бердік. Айта кету керек, бізге облыстық мәслихаттың депутаты Дулат Әбіш көмектесуде. Көшелерге орынсыз берілген атаулар мәселесін де ретке келтіріп жатырмыз. 12 жасанды жол кедергілерін орнатамыз, – дейді Ержан Саржан.
Қала аумағының кеңеюіне байланысты тұрғын алаптағы мәселелер біртіндеп шешіліп келеді. Мұнда достық пен келісімнің үлгісіндей болып қазақ, орыс, әзірбайжан, түрік, өзбек этностары тату-тәтті ғұмыр кешуде. Десе де, келер жылы тамызда қолданысқа беруге жоспарланып отырған 600 орындық мектеп тұрғын алаптың көрікті орнына айналатыны анық.

Мектептің тарлығы Абай ауданындағы Жаңаталаптың түйткілді мәселесі. Мұнда жыл сайын халық саны артып келеді. Соған байланысты бала саны да көбейген. Биыл тұрғын алап тұрғындарының қуанышында шек жоқ. «Нұрлы жол» бағдарламасы бойынша жаңа мектептің құрылысы жүріп жатыр. 

1600 орындық білім ордасының құрылысына тапсырыс беруші – Шымкент қаласының құрылыс бөлімі, мердігер – «MabekTradeLTD» ЖШС. Жоба құны 903 715 330,56 теңгені құрайды. 2016 жылы бұл қаржының 400 миллионы игерілуде. Қазіргі кезде құрылыста 85 адам жұмыс істейді. Мектептің іргетас блоктары орнатылып, қабырғалары қалануда.
Жобаның жалпы құны 904 млн теңгені құрайды. Күйдірілген кірпіштен салынып жатқан үлкен ғимаратқа қоса мәжіліс, спорт залдары мен асхана бой көтермек. Мердігер «Маbex Trade LTD» ЖШС құрылыстағы қадамын жаңадан бастап отырған жоқ. Серіктестіктің жұмыс жүргізушісі Уәлихан Сандыбаевтың құрылыс жұмысына көңілі толады. Өйткені құрылыс материалдары уақытылы жеткізілуде, оның үстіне мұнда бәрі «алтын қолды» жұмысшылар.
– Нысан құрылысына 85 адам жұмылдырылған. Бәрі – өз ісінің шеберлері, – дейді ол. – Оларға қойылатын басты талап – қауіпсіздік талаптарын сақтай отырып жан-тәнімен жұмыс істеу. Құрылыс материалдарының біраз бөлігі жергілікті тауар өндірушілердікі,-дейді құрылысшы.
Жаңа мектеп тұрғындардың басты қажеттілігі. Бүгінге дейін №82 мектепте балалар 4 ауысым бойынша білім алып келді. Ал мектеп салуға жердің жоқтығы қолбайлау болды. 49 жылға жалға берілген фермерлердің жерін қайтарып алып, заңсыз құрылыстарды бұзу арқылы бұл мәселе шешімін тапты. Енді ескі оқу ордасында балалар, ал жаңа мектепте жоғарғы сынып оқушылары білім алатын болады.

ТАЗАЛЫҚҚА ТИЯНАҚТЫЛЫҚ ҚАЖЕТ

Тельман бөлімшесінде назар аударатын қауіпті орын бар. Төлебаев көшесіндегі аумақта бір кездері «21 партсъезд» деген атпен минералды тыңайтқыштар мен улы химикаттардың қоймасы болған. Кеңшар тараған соң, аумақ қараусыз қалды. Ал жер телімдері тұрғындарға үй салу мақсатында берілді. Жұрт үй салғанымен залалды мәселенің шешімін таба алмады. Үйілген қоқыстың иісі алыстан-ақ қолқаны қабады. Сондай-ақ тұрғындар әртүрлі сырқатпен ауыра бастады. Улы химикаттар төгілген аумақтың қоршауы жоқ. Жанынан адамдар әрлі-бері өтіп, балалар ойнап жүреді.

– Химиялық қалдықтарды көму аудан экологиясына ғана емес, осындағы халықтың денсаулығына зиянын тигізді, – дейді Ержан Саржан. Олар аллергия, онкологиялық аурулар бойынша дәрігерлерге жиі баратын болды. Улы қоқыстарды жою бағытындағы он жылдан бергі жұмыстарымыз нәтижесіз болып келді. Тек осы жылы қайта-қайта шағымдануымыздың нәтижесінде қауіпті қалдықтарды Ақмола облысына жөнелтіп, кәдеге жаратуға қаражат бөлінді.
«СТ-сервис» фирмасының инженері Еркін Сыпатаев жұмыстың басталып кеткенін жеткізді. Арнайы қорғаныс киіміндегі екі жұмысшы тасымалдауға ыңғайлы болу үшін үлкен цистерналарды толтырып жүр. Жалпы сыйымдылығы – 4 400. Одан бөлек, жердің жоғарғы қабатында да өндіріс қалдықтарын кәдеге жарату жұмыстары жүргізіледі. Бұл іс биыл қазан айында аяқталмақ.

Көше тұрғындары улы химикаттардан құтылатынына қуанышты. Қауіпті қоймамен көршілес қонған тұрғын Ақберді Әлиев те солардың қатарында.
– Бұл мәселені кімдер шешуге тырыспады десеңізші. Тіпті, Алматыдан экологтар, шетелдік ҮЕҰ, басқа да қоғамдық ұйымдардың өкілдері келіп, таңғалып кеткен. Көбі уәде бергенімен жұмыс істеген жоқ. Міне, енді улы қоқыс күн өткен сайын азайып келеді. Ауа айтарлықтай тазарды, – дейді ол.
Соңғы жылдары әкімдікте шаруа қордаланып қалды: қала шекарасы кеңейген соң жаңадан пайда болған шағынаудандар мен тұрғын алаптардағы коммуникациялық, ауызсу, әлеуметтік мәселелерді жолға қоюға тура келеді. Әрине, халыққа қызмет ету оңай емес. Дегенмен, жұмыстар рет-ретімен шешіліп келеді.

«Текесу» – Шымкент қаласына Төлеби ауданынан қосылған елді мекеннің бірі. Әл-Фараби ауданына қарасты шағынауданда қазір 700-ге жуық адам тұрады. Қаладан 22 шақырым қашықтықта орналасқан шағынауданда бүгінгі таңда мәселесі жеткілікті. Қала құрамына енгеннен бастап, мұнда әкімдік тарапынан зерделеу жұмыстары жүргізіліп, атқарылатын жұмыс жоспарлары бекітілді.

Шағынауданға барғанымызда халық жиылып, күтіп отыр екен. Әрқайсысы көкейіндегі мазалаған мәселелерін айтып, шешімі табылатынына сенімді. Жергілікті тұрғындар үшін қазіргі кезде қоғамдық көлік мәселесі өзекті.

– Бұрын бағыттағы таксилер 5 мезгіл жүретін еді. Қазір қоғамдық көлік мүлдем тоқтады. Қалаға тек жеке меншік таксистерді жалдап, 200 теңгемен барамыз. Жолымыз да нашар. Әсіресе, қыс ауасында қиналамыз. Жолды қар басып қалады. Сондықтан, трактор жалдап, қардан тазартамыз. Ауыл халқы үшін қоғамдық көлік мәселесі шешілсе екен,– дейді шағынаудан тұрғыны Б. Баймаханов.
Жергілікті билік бұл жөнінен хабардар. Шағынаудан қала құрамына қосылғалы бері қордаланған мәселелер зерделеніп, оны шешудің жолдары қарастырылуда. Осы ретте Шымкент қалалық жолаушылар көлігі және автомобиль жолдары бөлімінің сектор меңгерушісі Наурыз Сүгірәлиевтің айтуынша, алдағы уақытта жергілікті тұрғындар жайлы автобустармен қалаға қатынайтын болады. Бұл тұрғыда билік тарапынан келіссөздер жүргізілуде.

– Қала құрамына енгенге дейін Текесу-Абай облыстық бағыттағы автобус жүрген. Ол тек ескі автовокзалға дейін баратын. Біршама уақыт қалалық бағыттардың жолақысымен халықты тасымалдап жүр еді, тиімсіз болғандықтан бағытты тоқтатты. Қазір басқа да тасымалдаушылармен келіссөздер жүргізіп жатырмыз. «Текесулықтардың» қоғамдық көлік мәселесін шешу жолдарын қарастырудамыз. Соның бір жолы – әлеуметтік маңызы бар 10 бағыт ашпақпыз. Олар «Текесу» секілді қоғамдық көлікке зәру бағыттар бойынша қызмет көрсетпек. Қазір екі көлік компаниясы шыққан шығын бюджет есебінен төленетін болса, шағынауданға қызмет көрсететінін айтып, ұсыныс жасап отыр. Осы ретте жұмысшы топ құрылды. Әлеуметтік маңызы бар бағыттар ашылатын болса, «Текесу», «Асар», «Ақтас», «Тұран», «Ақжар», «Абдулабад», «Жаңаталап» шағынаудандары мен Арғынбеков, Тимирязев көшелері бойынша қоғамдық көлік қатынайды,– дейді Н. Сүгірәлиев.

Шағынаудан халқы үшін ауызсу мәселесі де өзекті. Құбырдан ағатын су жиі тоқтайды. Ауыл биі Әмірхан Исақов жергілікті халықтың тіршілік нәрін үнемдеп пайдаланатынын жеткізді.

– Ауыз су ауылға Абай ауылының бір көшесі арқылы тартылған. Су құбыры сол ауылды басып өтетіндіктен, Абай тұрғындары өз аулаларына бізге келетін құбыр арқылы су тартып алған. Оған қоса, құбырлар бірнеше жерден жарылған. Соның салдарынан лай аралас су ағады. Осы мәселені айтып, «Ленгір су» мекемесіне хабарласқанымызда, шешімін табатынын айтқан болатын. Бірақ әлі күнге дейін нәтиже жоқ. Бізге ешқандай елді мекенді басып өтпейтін су құбырын тартып берсе деген ұсынысымыз бар, – дейді ауыл биі Ә. Исақов.

Әл-Фараби ауданы әкімі орынбасарының міндетін атқарушы Бақыт Мелдебеков «Текесу» шағынауданы халқының ауыз су мәселесі алдағы уақытта шешілетінін айтты. Қазір әкімдік тарапынан 2017 жылға жобалау сметалық құжат жасалып, шағынаудан халқына қаладан су құбырын тарту жағы қарастырылуда. Ішкі су құбыры да дайын. Айта кетейік, «Текесудағы» су құбырлары 4 жыл бұрын салынған. Қалаға қосылған сәттен бастап, ауыл халқы ауыз судан таршылық көрмейді.

«Текесу» қала мәртебесін алғалы бері жергілікті тұрғындар арыз-өтініштерімен қалаға баруды жиілеткен. Соның нәтижесі болса керек, биыл әкімдіктегілер шағынауданның Көлді және Ақсай көшелеріне шағал тас төселетінін айтып, қуантыпты. Бұдан бөлек, шағынаудан халқы мектеп орналасқан көшеге жасанды жол кедергілерін қойып, аялдамалардың қажеттігін де алға тартқан.

«Текесу» шағынауданында 120 шаңырақ түтін түтетіп отыр. Олардың игілігі үшін мектеп пен медициналық пункт жұмыс істеп тұр. Білім ұясы ескірген. Бұрынғы жатақхананың ғимараты. Іргетасы 1967 жылы қаланған екен. Мектеп директоры Бауыржан Дәрібаев қалаға қосылғалы бері бала санының аздығынан, 9 жылдық білім беретін №121 Текесу негізгі орта мектеп болып қайта құрылғанын айтты. Онда қазір 120 оқушыға 20 мұғалім дәріс береді. 10,11 сыныптарды бұл ауылдың балалары көршілес «Жұлдыз» шағынауданына барып оқиды екен. Мектептің жанынан ашылған шағын орталықта қазір 20 бүлдіршін түске дейін ғана тәрбиеленуде. Осы ретте тұрғындар балабақша салынса деген өтінішін жеткізді. 

«Текесу» шағынауданының халқы негізінен мал және егін шаруашылығымен күн көреді. Мал бордақылап, оны базарға апарып сатады, етін саудалайды. Сондай-ақ, бидай, мақсары, жоңышқа және тары егеді. Ал кейбірі өз ауласында шағын құс шаруашылығымен айналысып отыр. Олег және Ирина Гренадеровтардың меншігінде 100-ден астам үйрек бар. Екеуі де жұмыссыз болғандықтан, қарап отырмай, күнкөрістің жолын тауыпты. Олар үйрек жұмыртқаларының әр данасын 40 теңгеден сатады. Осылайша, балаларымен қосқанда төрт жанды асырап отыр.