«Нұр Отан» партиясының өкілдері, депутаттар және құзырлы мекеме басшылары қаламызда орналасқан заңсыз сауда орындарына рейд жүргізді. Нәтижесінде Громова көшесінде орналасқан «Темір» базарының жұмысы талапқа сәйкес келмейтіні анықталды.
Базар аумағында талаптарға сай емес 12 жер телімі бар. Бірнеше ескертулер мен салынған айыппұлдарға қарамастан 10 жыл бойы жұмыс жасап жатқан бұл базар темір жол мен автомагистраль торабында орналасқан.
«Нұр Отан» партиясы Шымкент қалалық филиалының төрағасы, облыстық мәслихат депутаты Өмірзақ Мелдехановтың айтуынша базар жол бойында кептелістердің орын алуына себепкер болып отыр. Сондай-ақ, жоғарғы кернеулі электр қуаты желілері өтетін орындарда сауда жасау адам өміріне қауіпті.
– Кәсіпкерлердің жұмысы заң шеңберінде тексеріліп, тиісті шаралар қолданылады. Барлық іс заң талаптарына сәйкес болуы қажет. Заңсыз сауда орындарын болдырмау мақсатында да осындай рейдтер ұйымдастыру тиімді, – дейді қала әкімінің орынбасары Бахадыр Нарымбетов.
Алдағы уақытта базар орнына жаяу жүргіншілер орны мен автомагистраль кеңейтіледі деп күтілуде.
