Еңбекші ауданы Жұлдыз тұрғын алабының бастауыш ардагерлер ұйымында ардагерлерге қамқорлық жасау бойынша елеулі жұмыстар атқарылуда. Осы мақсатта ұйымның жұмыс жоспары да жасалған.
Жуырда Жұлдыз бастауыш ардагерлер ұйымының төрағасы Ергелді Сұлтанның төрағалығымен ұйым мүшелері бас қосты.
Ардагерлер мен зейнеткерлерді қамқорлыққа алуды көздеген ұйым мүшелері биыл да қариялардың әлеуметтік-тұрмыстық жағдайларын бағамдап, материалдық көмек көрсетуге ықпал жасауды, дертке шалдыққаны болса, көңілін сұрап, үйлеріне баруды жоспарлап отыр.
Сондай-ақ, бастауыш ардагерлер ұйымы соғыс, тыл ардагерлері мен зейнеткерлерді мерейтойларымен құттықтап отырады. Мүмкіндікке қарай қарияларды арнайы демалыс, сауықтыру орындарына жіберіп те тұрады.
Бұған қоса таяуда Шымкент қаласы мәслихатының депутаты Қ.Мейірманов жергілікті тұрғындармен кездесіп, халық қалаулысына көшелерді көріктендіру және атаулы мерекелерді атап өту бойынша ұсыныстар айтылды.