Тәуелсіздік күніне арналған мерекелік іс-шаралар елордамыз Астанада әдеттегідей жоғары деңгейде өтті. Астанаға алыс-жақын шетелдерден арнайы келген қонақтар да, еліміздің өңірлерінен қуаныштың ортасында болуды ниет еткендер де Қазақ елі үшін ұлы мереке саналатын айтулы күннің мән-маңызын, дәреже-деңгейін, тарихи-танымын, сән-салтанатын паш ететін іс-шаралардың куәгері болды.
Елордадағы «Астана Опера» театрында өткен салтанатты шараға Мемлекет басшысы Нұрсұлтан Назарбаев қатысып, сөз сөйледі. Елбасы 1991 жылдың 16 желтоқсаны – өз тағдырымызға өзіміз қожалық етіп, өз болашағымызды өзіміз айқындауға қолымыз жеткен Ұлы күн екенін атап өтті. «Жер бетінде мыңдаған ұлттар мен ұлыстар бар. Біз – дербес мемлекет құру бақытына ие болған 193 ұлттың біріміз. Басқа бақыттың қонуы бір бөлек, сол бақытты бағалай білу бір бөлек. Тәуелсіз елдердің барлығы бірдей тұрақтылық пен татулыққа ұйып, дамудың даңғылына түсе алған жоқ. Тәуелсіздік – тарихтың сыйы немесе бүгінгі буынның меншігі емес. Ол – өткен бабалардың алдындағы қасиетті борыш және келешек ұрпақтың алдындағы зор жауапкершілік», – деді Н. Назарбаев. Сондай-ақ, Мемлекет басшысы «Нұрлы Жол» Жаңа Экономикалық Саясаты жаңа сын-қатерлерге Қазақстанның лайықты жауабы екенін айта келе, оның маңызды бағыттарына жекелей тоқталды. Қазіргі уақыттағы әлемдік саясаттағы дағдарыс пен санкциялар жаһандық экономика үшін тәуекелдерді күшейте түсу мақсатында жүзеге асырылуы тиіс міндеттерді атап көрсетті. Үкімет пен Ұлттық банк алдына экономиканы долларсыздандыру, инфляциялық шектеуге өту сынды екі маңызды міндет қойды. «Ұлан-ғайыр жері бар, ұлы мұратты Елі бар, бабалар жазған ұлы тарихы мен ұрпағы көз тіккен ұлы болашағы бар менің халқым – Ұлы халық! Тәуелсіздікті алу үшін қандай қажыр-қайрат керек болса, оны баянды ету үшін одан да зор қажыр-қайрат керек. Табысқа тоқмейілсімей, кейінгі ұрпаққа кемел Қазақстанды табыстау – ортақ парыз. ХХI ғасырдың сын-қатерлеріне төтеп беріп, ең дамыған елдердің біріне айналу – ортақ жауапкершілік», – деді Мемлекет басшысы.
Келер жылдың еншісіндегі шаралардың да маңызы зор. Ұлттық тарихымыз бен мәдениетіміздегі маңызды датаны – Қазақ хандығы құрылуының 550 жылдығын, Қазақстан халқы Ассамблеясы жылын және Қазақстан Республикасының Конституциясын бүкіл халық болып қабылдаудың 20 жылдығын атап өтетін боламыз. Ұлы Отан соғысында фашизмді жеңудің 70 жылдығы да кең көлемде мерекеленеді. Сонымен қатар, Мемлекет басшысы өз сөзінде Мәңгілік Ел – ертеңгі күнге есік ашатын, болашаққа сенім арттыратын идея, кері қайтпайтын және берік тұрақтылықтың символы екенін атап өтті.
«Қазақстан-2050» Стратегиясы – бұл біздің ұрпағымыздың көптеген буыны жүру маңдайына жазған миллиондар жолы. Біз белгілеген тарихи датаға дейін 36 жыл бар.
2050 жылы 1991 жылы туған Тәуелсіздіктің құрдастары сол кезде үлкен өмірге қадам басатын жас қазақстандықтар үшін аға буын болады. Тәуелсіздіктің құрдастары шамамен 60-қа келеді. Олар ақсақалдар буынына айналады. Қазақтарда «Елу жылда – ел жаңа» деген ұғым бар. Бұл сөздер не ғылыми-техникалық прогресс, не инновациялық технологиялар болмаған ерте кезеңде айтылған. Біздің дәуіріміз – жылдамдықтар уақыты. ХХІ ғасырда қоғам әрбір бес жыл сайын түбірінен өзгеріп отырады. Сондықтан басты екі қағида халық тағдырын айқындайды. Бірінші. Бұл ұрпақтар мен құндылықтар сабақтастығы. Екінші. Ұлттың серпінділігі, жастардың инновациялылығы. Біз өзіміздің тарихымызды батыл және лайықты жүзеге асыруға тиіспіз. Біз егер біртұтас болсақ, күштірек бола түсеміз. Біздің жалпыұлттық идеямыз – Мәңгілік Елдің мыңжылдық мәні, міне, осында», - деді Елбасы.
Халқымыздың қастерлі Тәуелсіздігі мен Мәңгілік Еліміздің болашағы өзін үнемі толғандыратынын, Тәуелсіздіктің өмірлік философиясы қандай болуы қажет деген сауалды өзіне сәт сайын қоятынын айта келе Н.Назарбаев еліміздің күллі азаматтарына, жалынды жастарға, бүгінгі буынның ерен істерін лайықты жалғастыратын ертеңгі ұрпаққа арналған «Тәуелсіздік толғауы» атты ой орамдарын жария етті. Сөзінің соңында Қазақстан халқын Тәуелсіздік күнімен құттықтады.
Салтанатты шара өнер шеберлерінің мерекелік концертіне ұласты. Мерекелік концертті ШЫҰ-ға мүше мемлекеттер үкіметтерінің басшылары да тамашалады.
Еселi еңбекке берiлген мемлекеттiң бағасы
Тәуелсіздік мерекесі қарсаңында Ақордада Мемлекет басшысы Нұрсұлтан Назарбаев мемлекеттік марапаттарға ие болған қазақстандықтардың бір тобына наградаларын өз қолымен тапсырды. « Сіздер бірлігімізді арттырып, берекемізді нығайтуға атсалысып келесіздер. Сондықтан бүгін өздеріңізге тапсырылатын мемлекеттік наградалардың маңызы өте зор. Бұл марапат сіздердің еселі еңбектеріңізге берілген мемлекеттің бағасы іспетті. Өйткені, сіздер өз салаларыңызда, өз ұжымдарыңызда еңбек ете отырып, ел байлығын еселеуде, атқарып отырған қызметтеріңізде көп нәрсеге қол жеткіздіңіздер.Шамамен алғанда, еліміз бойынша 1,5 мыңға жуық адам мемлекеттік марапаттарға ие болып отыр. Әрине, олардың барлығына бірдей мен өз қолыммен алған наградаларын тапсыра алмаймын. Сондықтан сіздерге наградаларды тапсыра отырып, өз атымнан оларға да тапсырдым деп есептеймін», – деді Елбасы салтанатты рәсімде сөйлеген сөзінде.
Бұл күні Мемлекет басшысы «Қазақстанның Еңбек Ері» атағын, «Отан», І,ІІ,ІІІ дәрежелі «Барыс», «Парасат», «Құрмет» ордендерін, бірінші, екінші дәрежелі «Даңқ», екінші дәрежелі «Айбын» ордендерін, сондай-ақ «Ерлігі үшін» және «Жауынгерлік ерлігі үшін» медальдарын табыс етті. Сонымен қатар, осы салтанатты шара барысында биылғы жылғы әдебиет пен өнер саласындағы Қазақстан Республикасының Мемлекеттік сыйлығын алған жазушы Қажығали Мұханбетқалиұлына, ақын Гүлнәр Салықбаеваға, әнші Пантелей Кесоглуге, композитор Балнұр Қыдырбекке және Қазақстан Республикасы Тәуелсіздігінің 20 жылдығына арналған тарихи-монументалды саябақ кешені үшін Асқар Мырзахметов, Бақытжан Әшірбаев бастаған бес адамнан тұратын авторлар ұжымына алған сыйлықтары табыс етілді.
