4 800 оқушы оқу жылын жаңа ғимаратта бастайды
Пятница, 18 Август 2017 03:48
2017 жылдың тамыз айында Шымкент қаласының білім бөліміне қарасты білім мекемелерінің саны 228-ге жетіп, оның 132-сі мектеп, 88-і балабақша болса, 8-ін мектептен тыс мекемелер құрап отыр.
Шымкент қаласындағы 132 мектептің 118-і типтик ғимаратта, 12-сі ыңғайластырылған ғимаратта, ал 2 мектеп жабық мекемеде орналасқан.
Биылғы жаңа оқу жылының басталуына орай №125,128,129 үш жаңа мектеп пайдалануға берілмек. Сонымен қатар, №69 және №97 мектептерінің ғимараты жаңарса, қала аумағындағы тағы үш мектепте қосымша құрылыс жұмыстары жүргізілді. Қазір жаңа ғимараттар оқу құралдарымен жабдықталуда. Тамыз айының соңына дейін пайдалануға тапсырылмақ.
Бүгінге дейін Шымкент қаласында үш ауысымда білім беретін 8 мектеп жұмыс істеп келді.
1 қыркүйекте «Достық», «Ақжайық», «Жаңаталап», «Қайнарбұлақ», «Сәуле» шағынаудандарындағы 5 жаңа мектеп пайдалануға берілсе, 4 800 оқушы қалыпты білім беру жүйесіне көшеді.
1200 орындық тағы бір жаңа мектеп желтоқсан айында Әкімшілік іскерлік орталығында пайдалануға беріледі. Ал «Таскен» тұрғын алабындағы үш ауысымдық мектептің мәселесі 2018 жылы шешімін табатын болады. Сондай-ақ, «Самал-3» шағын ауданында да жер телімі рәсімделіп, оқушылар үшін жаңа білім ошағының жобалық-сметалық құжаттары әзірленуде. Оның құрылысын 2018 жылы бастап, 2019 жылы пайдалануға беру жоспарланған.
Қалалық білім бөлімінің басшысы Ж.Тәжиева бала саны белгілі мөлшерден артық 5 мектептің барын айтады.
– Бұл мектептерді үш ауысымдық оқу жүйесіне көшірмей-ақ, оқушыларға білім беруін жеңілдету мақсатында жақын маңдағы басқа мектептерден сынып бөлмелерін қарастырдық. Атап айтқанда, №9, 23 мектеп оқушыларына №14, 20 мектептерден сынып бөлмелері берілетін болады. Ал №1, 46, 65 мектептерге жалға алуға ғимараттар іздестірілуде, – дейді ол.
Бөлім басшысының айтуынша, №1 мектептің жанынан қосымша құрылыс салу үшін зерделеу жұмыстары жүргізілуде. Осыған ұқсас №65 мектептегі мәселені ретке келтіру үшін мектеп жанынан қосымша 0,72 га жер мемлекет мұқтаждығына қайтарылды. Қазіргі таңда рәсімдеу жұмыстары жүргізіліп жатқан әлеуметтік нысанның құрылыс жұмыстары 2018-2019 жылдарға жоспарланып отыр.
Демек, 2020 жылға дейін Шымкент қаласында үш ауысымдық мектептердің мәселесі толық шешімін табады.
Құрылыс саласында серпіліс бар
Среда, 16 Август 2017 05:42
Облыс орталығы – Шымкент қаласының халық саны миллионға жақындаған сайын құрылыс, әсіресе тұрғын үй құрылысы қарқынды дамып келеді.
Мемлекеттің өзекті экономикалық және саяси міндеттерінің бірі – заман талабына сай құрылыс саласын дамыту және құрылыс өнімінің қауіпсіздігі мен сапасын арттыру. Осы міндеттерге орай жыл сайын қыркүйектің екінші жексенбісінде «Құрылысшылар күніне» орай мерекелік іс-шара және құрылыс заттарының көрмесі биыл да дәстүрлі жалғасын тапты.
Шымкент қаласының «Көрме» Орталығында облыс әкімі Жансейіт Түймебаев құрылысшыларды кәсіби мерекесімен құттықтады.
– Біз құрылыс саласында еңбек еткен ардагерлерге кәсіби міндеттерін абыроймен атқарып, сәулетшілердің тың идеяларын жүзеге асырғаны үшін алғыс айтып, болашақ ұрпаққа өшпес қолтаңба қалдырып, өнеге бола алғаны үшін ризашылығымызды білдіреміз. Құрыш қолды құрылысшылардың адал еңбегінің арқасында мемлекетіміз зор екпінмен дами береді деп сенемін, – деді ол.
ОҚО Құрылыс басқармасы басшысының орынбасары Тоқтар Оразұлы құрылыс жанданса, тұтастай елдің экономикасы артады дейді.
– Құрылыс индустриясы өркендесе, қала сәулеті жаңа әрі сәнді ғимараттармен толығады. Алдымызда Шымкентті миллионды қала – мегаполиске айналдыру жоспары тұр. Демек бұл бағыттағы қарқынды құрылыс бос жұмыс орындарын арттырып, халықты жұмыспен қамту да жүйелі түрде жүзеге асады. Жаңа мектептер, балабақша, емхана сынды әлеуметтік нысандар мен тұрғын үйлер, жаңа жолдар, көшелер пайдалануға берілген сайын біздің өңір тұрғындарының әл-ауқаты, тұрмысы жақсара бермек, – дейді Т. Усубалиев.
Жыл басынан бері облыс аумағында 209 әлеуметтік нысандар құрылысы бойынша инвестициялық жобалардың іске асырылуына 64,9 млрд теңге қаралған. Жоспар бойынша оның 116-сы жыл соңына дейін пайдалануға тапсырылмақ. Ал ұлттық қордан – «Нұрлы жол» мемлекеттік бағдарламасы аясында 32 мектеп құрылысын жүргізуге 17,4 млрд теңге қаралса, 19 мектепті пайдалануға беру биылғы жылдың еншісіне жоспарланған. Әзірге 5 мектепте құрылыс жұмыстары аяқталып, жауапты мердігерлер пайдалануға тапсырып үлгерді.
Биыл 6 375 пәтер берілмек
Демографиялық ахуалы тұрақты дамитын Оңтүстік өңірінде тұрғын үй құрылысы да маңызды. Биыл барлық қаржыландыру көздері арқылы облыста 226 тұрғын үйдің құрылысы жүргізілуде. Яғни, 10 879 пәтер. Жыл соңына дейін 115 үйдің құрылысын аяқтап, 6 375 пәтерді пайдалануға беру жоспарланған.
Құрылыс саласының тағы бір жаңалығы 2017 жылы қолға алынған «Нұрлы жер» тұрғын үй құрылысы бағдарламасы. Бұл бағытта облыс аумағында 348,0 мың ш/м тұрғын үйді пайдалануға тапсыру жоспарланған. Сала мамандары бұл көрсеткішті жыл соңына дейін 700 мың ш/м-ге жеткізуді көздейді.
Жол құрылысы саласын дамытуға 2017 жылы бюджеттен 29 445,7 млн теңге қаралып, 1 570 шақырым жолдар мен көшелер құрылыс-жөндеу жұмыстарымен қамтылуда. Бұл 584 нысан. Облыстық және аудандық маңызы бар 801,8 шақырым жолдарда құрылыс-жөндеу, қайта құру жұмыстары жүргізіліп, жыл соңына дейін 115,4 шақырым жолды пайдалануға беру жоспарланған.
Осы бағытта аянбай еңбек етіп, өңір құрылысын дамытуда еселі еңбек еткен құрылысшылар ҚР Индустрия және даму министрлігінің Құрылыс және тұрғын үй коммуналдық шаруашылық істері комитетінің «Құрметті құрылысшы» төсбелгісімен, алғыс хатымен марапатталып, саланың 40-қа жуық үздігіне өңір басшысы сый-сыяпат тапсырды.
Салтанатты шараның қызығы «Көрмеде» көрініс тапты. Мұнда үйдің іргесін қалайтын тастың түр-түрі мен цементтен бастап, қабырғасын қалайтын түрлі кірпіштер, битум, полианион целлюлозасы, құрылыстық әйнектер, құм, шатыр мен есік терезеге, су және жылу құбырына қажетті құрылыс заттарының бәрін табуға болады. Жалпы, олардың өңірімізде өндірілетін саны 40-қа жуық, яғни құрылысқа қажетті материалдардың 90%-ын еліміздің өндіріс күші құрайды.
Отандық өнімге қомақты қолдау бар
Четверг, 10 Август 2017 19:37
Мемлекет басшысы «Қазақ-станның үшінші жаңғыруы: жаһандық бәсекеге қабілеттілік» атты Жолдауында кәсіпкерлікті дамытуға басымдық беруді нақты атап өтті. Осыған сәйкес, өңірімізде аймақтық экономиканың басым секторларын қаржыландыру мақсатында «Оңтүстік» аймақтық инвестициялық орталығы» ЖШС-і мен оның еншілес ұйымы «Ырыс» микроқаржы ұйымы кәсіпкерлерге қызмет еуде.
«Оңтүстік» АИО қаражат мөлшерін кәсіпкердің жобасы мен салық төлеу мүмкіндігіне қарай анықтап, оған жылына жеңілдетілген 7-8% үстемемен қарыз береді. Ал «Ырыс» МҚҰ-ы 16 миллион теңгеге дейін қаржыландырады. Аталған мекеменің баспасөз хатшысы Муаттар Азадованың айтуынша, кәсіпкерлерді қаржылай қолдаудың нәтижесінде 2009 жылдан бері өңірімізде 40 907 жаңа жұмыс орны ашылған.
– 2017 жылдың 6 айында «Оңтүстік» АИО және «Ырыс» МҚҰ бірлесе отырып 469,8 млн теңгені құрайтын 106 жобаға қаржылай қолдау көрсеткен. Қарызды қайтару мерзімі маусымдық. Яғни, мал бордақылау кәсібі 6 айда бір төлем жасаса, егін шаруашылығы алған қарызын жылына бір рет төлеп отырады, – дейді М.Азадова.
Кәсіпкер болудан бұрын адам таңдаған кәсібін жан-тәнімен сүюі керек. Біз мұны «Spirit Қазақстан» мен «Оңтүстік былғары» ЖШС-нің жұмысымен танысу барысында анық байқадық.
Астана қаласынан тапсырыс түскен
«Оңтүстік былғары» ЖШС-інің негізін қалаған Нұржамал Миржибаева тігін цехын ашқанға дейін бұл саланы көп зерттегенін айтады.
– Дизайн саласына мектеп жасынан қызығушылығым артты. Дәптерге түрлі ою-өрнекті сызудан жалықпайтын менің мамандық таңдауыма ата-анам да қолдау білдірді. Бұл саладағы тәжірибемді оқытушы болып жүріп тағы біраз дамыттым. Ойымды жинақтай келе қазақы оюмен көмкеріліп, былғарыдан тігілетін сөмкелер мен аксессуарлар дайындағым келді. Жоспарымды жүйелеп алып, Алматыдағы тері өңдеу зауытына бардым. Содан соң бір шешімге келіп, 2015 жылы салық төлеуші ретінде тіркеліп кәсібімді бастадым, – дейді Нұржамал Жүнісбекқызы.
Алғашында директор да, жарнама менеджері, дизайн жасаушы, тіпті тігінші де өзі болған Нұржамал кәсібін дамыту үшін тағы бір қадам жасайды. Жобасын облыстық кәсіпкерлік, индустриалды-инновациялық даму және туризм басқармасына тапсырып, 2016 жылы сала мамандары Н.Миржибаеваның кәсібін «инновациялық жоба» деп танып, нәтижесінде 2 млн теңге қаржылай грантқа ие болады.
– Бұл қаражатқа бірден техникалық жабдықтарды сатып алдым. Жұмысқа төрт қыз қабылдап, тапсырыспен жұмысты жандандырдық. Шикізат алып, дайын болған тауарды айналдыру үшін «Ырыс» микроқаржы ұйымынан тағы да 2,8 млн теңге көлемінде несие алдым, – дейді кәсіпкер.
Алматыдағы тері зауыты 1 шаршы метр былғарыны 60-100 теңге аралығында нарыққа шығарса, бұл шикізаттан дайындалған қолдорбаларының құны 10-15 000 теңгеге бағаланады. Шеберхана тым кішкентай болғанымен тігін құрал-жабдықтары мен техникасын орнатуға қолайлы. Тігінші қыздар – студенттер. Күннің жартысын білім алуға жұмсаса, екінші жартысында Нұржамалдың қолөнер шеберлігін үйренеді және жарты күнге 25 мың теңге көлемінде жалақы алады.
– Қыздарға бәрін өзім үйретемін. Себебі бұл салада кадр даярлаудың өзі енді ғана қолға алына бастады. Биыл екі студенттің диплом алып келуін күтіп отырмын. Сондай-ақ, қаржы жағын басқаратын білікті маманның орны да бос тұр. Әзірге 10-ға жуық адамды жұмыспен қамти алдық, – дейді болашақта кәсібін кеңейтуді көздеген Н. Миржибаева.
Бүгінде «Оңтүстік былғары» брендімен дайындалатын 30 клатч, 20 шақты сөмкеге Астана қаласынан тапсырыс түскен. Сондай-ақ, ұжым тігіншілері Алматы қаласына жартылай дайын өнімдерді дайындау барысында да қызу жұмысқа кіріскен. Өнімдер әлеуметтік желі және басқа да сауда нүктелері арқылы сатылымға шығады.
Қайта өңделген шикізат та кіріс көзі
Қазіргі таңда қолданыстағы заттың басым бөлігі, әсіресе ыдыстың түр-түрі пластмассадан дайындалады. Мәселен, су және басқа да сұйықтықты құюға арналған түрлі бөшкелер, контейнерлер, шылапшын, шара, тегене, ожаудың бәрі бар. Пайдалануға ыңғайлы, жеңіл дүниені сынып, жарамсыз болып қалғаннан кейін қоқысқа тастаймыз. Шынында жарамсыз дүние сияқты...
Алайда, мұның бәрі қайта өңдеуге жататын шикізаттар. «Spirit Қазақстан» зауыты дәл осы қайта өңделген пластмасса шикізатын сатып алып, спирттік ішімдікке арналған шөлмек қақпақтарын жасап шығарады. Сондай-ақ, зауыт өнімдерінің қатарында түрлі сусын құтыларын дайындайтын пэт преформа және агроөнімдерге арналған жәшіктер өндіреді.
«Spirit Қазақстан» ЖШС директоры Азамат Қуанышбайұлы
жоба құны 700 млн теңгеге бағаланғанын айтты.
– Бұл соманың 514,8 млн теңгесін «Оңтүстік» аймақтық инвестициялық орталығынан 7%-дық несиемен алдық. Қаражаттың 65%-ын техникалық және шикізат қажеттілігіне жұмсадық. Бірқатар заманауи итальяндық қондырғыны «Оңтүстiк» АИО-ның несиесiне лизинг арқылы қол жеткіздік. Отандық өнім болғандықтан жеміс-жидек, көкөніске арналған жәшіктердің құны 200 теңге болып бекітілген. Қазақстан аумағында, әсіресе, өзіміздің өңір, Жетісай, Сарыағаш аудандарында жәшікке сұраныс жоғары. Сондай-ақ, зауыт өнімдері Қырғызстан, Тәжікстан сынды көрші елдерге экспортталады – дейді жас кәсіпкер.
Тәуекел түбі – табыс
Кәсіпкерлікті дамыту жолында «Оңтүстік» АИО және «Ырыс» МҚҰ кәсіпкерлікпен айналысамын деушілерге барынша қолдау көрсетіп келеді. Қолдау тапқан кәсіпкерлік нысандардың бірі «Spirit Қазақстан» ЖШС болса, екіншісі «Ырыс» МҚҰ-дан 2,8 млн теңге несие алған «Оңтүстік былғары» ЖШС-і.
Жалпы, Шымкент қаласы бойынша «Оңтүстік» АИО 8 жылдың көлемінде жалпы сомасы 8,4 млрд теңгені құрайтын 468 жобаны қаржыландырған. Оның ішінде 1,7 млрд теңгені құрайтын 420 жоба «Ырыс» микроқаржы ұйымы арқылы жүзеге асқан. Аталған жобалар аясында
Шымкентте 855 жаңа жұмыс орындары ашылған.
Жолаушыларға жайлы жағдай жасалмақ
Четверг, 10 Август 2017 19:10
Облыс әкімі Жансейіт Түймебаев Шымкент қаласы аумағындағы жол-құрылыс нысандарын аралады. Өңір басшысы ең әуелі Шымкенттен Сайрам және Түлкібас ауданына алып баратын негізгі транспорттық жол торабы әрі қала ішілік маңызы зор Жібек жолы көшесінің қайта құру жұмыстарымен танысты.
Пазиков көшесінен Кіші айналма жолына дейінгі аралықта реттеліп жатқан жол құрылысының жалпы ұзындығы 7,8 шақырымды құрайды. Мұнда Жібек жолы көшесімен бірге Арғынбеков көшесі қиылысындағы жол айрығы да жөнделуде. Бұрынғы екі жолақты ескі жол бүгінде екі бағытқа қайта құрылып, әр бағытқа тағы екі жолақ қосылды. Яғни, ескі жол жаңарумен қатар екі есеге кеңейді. Қазір аяқжол салу ісі мен көгалдандыру және жол белгілерін орнату сияқты жұмыстар атқарылуда. Қалалық жолаушылар көлігі және автомобиль жолдары бөлімінің басшысы Қ.Жұматаевтың мәлімдеуінше, Жібек жолы көшесіндегі қайта құру жұмыстары аяқталуға жақын. Ал облыс әкімі Жансейіт Қансейітұлы аталған жолды бұдан да ерте тапсыруға болатынын айтты.
– Жол құрылысы жұмыстарын жүргізуді техникалық мүмкіндігі жоғары, ең тәжірибелі мердігер жеңіп алады да 8 шақырымдық жолдың құрылысын 2-3 жыл жалғастырады. 1 қыркүйек, яғни жаңа оқу жылы басталғанға дейін де тапсыруға болады емес пе? Ертең бұл көшелермен студенттер, оқушылар, оларға дәріс беретін қызметкерлер күні бойы өтеді.
Жаңа жолда көлік қозғалысын реттейтін жол белгілері орнатылып үлгермесе, жолаушыларға кедергі келтіреді. Жол-көлік оқиғасына алып баруы да әбден мүмкін. Сондықтан, бұған жауапкершілікпен қарап, жұмысты мерзімінен бұрын аяқтауға тырысыңыздар, – деген аймақ басшысы автомобиль жолдарының екі шетіндегі жұмыстарды да толық аяқтауды еске салды.
Облыс әкімі жол құрылысына қомақты қаражат бөлінгенін айтты. Ал мердігер мекеме өзіне жүктелген тапсырмаларды ескеруге сөз берді.
Жібек жолы көшесінің қайта құру жұмыстарына бюджеттен 2 млрд 537 млн теңге қаржы бөлінген. Жұмыс 2015 жылы басталып, биыл қараша айында тапсырылады деп жоспарланған.
Жыл соңына дейін пайдалануға тапсыруы жоспарланған қала ішіндегі облыстық маңызы бар көшелердің қатарында тағы екі көше бар. Оның бірі Қалалық қоқыс орнынан Жібек жолы көшесіне дейінгі аралықта ұзындығы 4,4 шақырымды құрайтын Қ.Төлеметов көшесінің қайта құру жұмыстары. Екіншісі, КХ-37. Яғни, «Шымкент-Қызыләскер-Түйетас» автомобиль жолының 0-3,9 шақырымы аралығында да жол құрылысы жүріп жатыр. Аталған жобалардың 80-90% жұмысы аяқталған.
Ж.Түймебаев жұмыстың сапалы орындалуы мен тұрғындарға жайлы болуын мердігер мекеме өкілдеріне ескертіп, оны қадағалауды сала басшыларына нықтап жүктеді.
Өңір басшысы бастаған топ бұдан кейін қыркүйек айында құрылысы басталатын облыстық маңызы бар КХ-97 «Ақсу-Қабылсай-Қайтпас-қалалық қоқыс аймағы» автомобиль жолын көрді. Құны 4 136 млн теңгеге бағаланған жобаға бюджеттен қаржы бөлінді. 8 шақырымдық жолды 2019 жылдың қарашасында аяқтау жоспарланған. Облыстық жолаушылар көлігі және автомобиль жолдары басқармасының басшысы Н.Байғұттың айтуынша, екі бағытта салынатын 4 жолақты көше болашақта Сайрам ауданы арқылы Төлеби ауданына және одан әрі «Қасқасу» демалыс аймағына баратын жолаушыларға қызмет етпек.
Жол-құрылыс нысандарын аралау барысында «Батыс Еуропа-Батыс Қытай» халықаралық транзиттік дәлізіндегі құрылыс жұмыстары бағамдалды. Облыстық сәулет және қала құрылысы басқармасының басшысы Е.Жүсіпов өңірімізге ат басын бұрған жолаушыға ғана емес, саяхатшыға да қолайлы жағдай жасай алатын жол бекетінің жобасымен таныстырды.
– Бекетте жай ғана жанар-жағармай құю қызметінен бастап, жолаушы кез келген қажетін өтей алады. Мұнда автобекет, азық-түлік дүкені өз жұмысын бастап үлгерді. Сонымен қатар автотұрақ, тамақтану орындары және кішігірім қонақүй құрылысы жүріп жатыр. Енді Оңтүстікке келетін жолаушы күн ұзақ жол жүріп шаршамай, бірер сағат бой жазып тыныға алады. Облыс аумағында дәл осындай 40-қа жуық бекет салуды жоспарлап отырмыз, – дейді Еркін Наурызбайұлы.
Облыс әкімі Жансейіт Қансейітұлы мұндай бекеттердің халықаралық талапқа сай болуын тапсырды.
– Біз әрбір маңызды құрылысты жүргізгенде әлемдік стандартты ескеруіміз қажет. Туризмді дамыту үшін шетелдіктерге де қызмет ете алатын сервис ұйымдастыра білуіміз керек. Бекет маңында құрылысы ұзаққа созылатын үлкен қонақүй салудан, кішігірім мотель тұрғызу әлдеқайда тиімді. Өйткені, жолаушы мұнда ұзақ тұрақтамайды. Ал құрылыс жұмыстары тез аяқталса, бекет те ертерек қызмет көрсетуді бастайды, – деді ол.
Облыс әкімі мен сала басшылары өңірімізде орналасқан республикалық маңызы бар жолдарды дамыту барысында биыл аяқталуы тиіс үш бағыттағы жол құрылысының жұмыстарымен де танысты. Оның бірі «Шымкент айналма жолы» мен «Шымкент – Қызылорда» бағытындағы 236 шақырымдық жолдың құрылысы 98%-ға аяқталған. Ал «Шымкент – Тараз» бағытындағы 83 шақырымның қайта құру жұмыстары 90%-ға дайын. Үшінші бағыт – «Шымкент – Ташкент». Ұзындығы 101 шақырымды құрайтын «Батыс Еуропа-Батыс Қытай» халықаралық транзиттік дәлізінің бұл бөлігінде 80 шақырымның қайта құру жұмысы аяқталып, қалған 25% жол құрылысының жұмысы жалғасуда.
Оңтүстік журналистерінің Түркияға сапары
Пятница, 04 Август 2017 06:23
БАҚ қызметкерлерін кәсіби мерекесімен құттықтаған облыс әкімі Жансейіт Түймебаев Оңтүстіктің 20 журналисіне Түркияға жолдама тарту еткен болатын. 10 күндік еңбек демалысында әріптестеріміз Түрік журналистикасының көшбасшысы саналатын «ТРТ» медиа холдингі мен әлемнің ең үздік 10 ақпарат агенттігінің бірі «Анадолы»-ның тыныс-тіршілігімен танысып қайтты. Өңір журналистерінің сапардан алған әсерін жариялауды жөн көрдік.
Бейсен ТӘЖІБАЕВ,
Облыс әкімінің баспасөз хатшысы, баспасөз орталығының жетекшісі:
«Анадолы» агенттігінің ақпаратын аламыз
– Түркияда бізді Қазақстан Республикасының сол елдегі бас консулы Еркебұлан Сәпиев қабылдады. Журналистерге жылы лебізін білдіріп, түрік инвесторлардың негізінен Оңтүстік Қазақстан облысына ерекше қызығушылық танытатынын айтты. Өңіріміздегі Қазақ-Түрік индустриялды аймағы ағайынды екі елдің іскерлік қарым-қатынасын бұдан әрі нығайтпақ.
Саясатқа белсенді түрде араласып, өз ықпалын жүргізуге көшкен Түркияның «Анадолы» ақпарат агенттігі әлемнің 97 елінде өкілдігі бар. Жақында тағы 3 елде ашуды жоспарлапты. Агенттік басшысы Сабри Челебиоғлу мырзаның айтуынша, 1920 жылы құрылған «Анадолы» 2500 адамды қызметпен қамтамасыз етіп отыр. Түркия газеттері ақпараттың 40 пайызын, ал сайттары 60 пайызын осы агенттіктен алады. Күн сайын 1200 ақпаратты 11 тілде таратады және 2500 фото, 310 видео қоса жүктеледі. Агенттік соғыс жүріп жатқан аймақтан ақпарат жинауды үйретеді. Бұл орталықта дайындалған тілшілердің материалын әлемдік және түркиялық БАҚ ақылы негізде сатып алады. Тәжірибе алмасу барысында агенттік басшылығы оңтүстікқазақстандық журналистерге 3 ай көлемінде барлық ақпаратты ақысыз ұсынатынын айтып қуантып қойды.
Уәли ҚЫДЫРОВ,
«Қазақстан» РТРК» АҚ Оңтүстік Қазақстан облыстық филиалының директоры:
Халық қаржыландыратын телеарна
– Түркияда біз «ТРТ» медиа холдигі мен «Анадолы» ақпарат агенттігінде болдық. «ТРТ» медиа холдингі мемлекеттік, бірақ, қаражат бөлу жағы Түркия Конституциясымен бекітілген. Яғни, халықтың электр энергиясына төлеген қаражатының 2%-ы және әрбір сатылған теледидардың 1% ақысы «ТРТ» медиа холдингін қаржыландыруға аударылады. Холдингтің түрлі салаға бағытталған 16 телеарнасы бар. Онда радиоқұрылым қызметкерлерін қоса есептегенде 8,5 мың адам жұмыс істейді. Ал біз 1500 адам қызмет ететін Ыстамбұлдағы өкілдігінің жұмыс барысымен таныстық. Қаражат мәселесінің керемет шешімін тапқаны қызықтырды. Ондағы журналистер қаржыландырушы белгілі бір тұлғаға немесе мекемеге жалтақтап отырмайды, халық үшін дер кезінде дәл ақпаратты 40 тілде таратады.
Ал «Анадолы» агенттігінің қызметкерлері от пен оқтың арасынан да ақпарат алып келе алады. Оларды бұған арнайы жаттықтырып үйретеді. Есесіне журналистер тек құнды ақпарат үшін тер төгеді. «ТРТ» медиа холдингінде ағылшынның әйгілі саясаткері әрі банкирі Натан Ротшильдтың «Ақпарат кімнің қолында болса, әлемді сол билейді» деген сөзін сезінуге толық мүмкіндік бар.
Журналистерді қолдап, осындай сапарға жіберген облыс әкімі Жансейіт Түймебаевқа айтар алғысымыз шексіз. Мұндай іс-сапарлар жалғасын тапса, біздің журналистикаға зор серпін берері анық.
Бақтияр ТАЙЖАН,
«Егемен Қазақстан» газетінің Оңтүстік Қазақстан облысындағы тілшісі:
Саяхатшыға деген құрметті сезіндік
– Журналистикада ғана емес, жалпы халықта сананың еркіндігі басым. Мемлекет басшысы ағылшын тілін үйренуге шақырса, біз «қос тіл тек жыланда болады» деп жауап береміз де барлық мүмкіндіктерге жол ашатын есіктерді іштен тарс жауып аламыз. Түркияның «Анадолы» ақпарат агенттігінде көбірек білуге біздегі тіл білімінің жетіспеуі салмақты ой салды.
Өткен жылы Риода фотоаппаратымды жоғалтып таба алмай қайтқанмын. Түркияда Асхат есімді әріптесіміз фотоаппаратын бір жерде ұмыт қалдырып, таба алмай қалды. Бірақ «жоғалды» деп ойлағанымыз бекер екен, қонақүйге келсек, Асхаттың фотоаппаратын ресепшнге қалдырыпты. Бір қуанып, бір таңданып әсерленіп-ақ қалдық. Иманның тазалығы, саяхатшыға деген адалдық, құрметті сезіндік. Ондай елде саяхаттап жүргенде өзіңді де қауіпсіз сезінеді екенсің.
Біздің елде де туризмді дамытуға аз қаражат бөлініп жатқан жоқ. Біздегі бітпейтін жөндеу, қайта құру жұмыстары туризмнің дамуын тежеп қойды. Қазақтың көрнекті жазушысы Дулат Исабектің «Яссауидің кесенесі мен бала кезде жөнделіп жатқан, қазір 70-ке келдім, әлі жөнделуде» деген сөзі бар. Сонау алыстан жер басып келген саяхатшыға бір есігін ашып, екіншісін жауып «мұнда жөндеу жұмыстары жүргізілуде» деген жауап айту мәдениетке қайшы. Сондайда кереметімізді көрсете алмай жүргеніміз қарын аштырады.
Роза БЕКЕТАЕВА, «Замана» газетінің тілшісі:
Түркияға жылына 33 млн турист келеді
– Бауырлас мемлекеттің ТРТ медиа холдингі мемлекеттік болғанмен, оны халық қаржыландырады. Ыстамбұлдағы өкілдігінің жетекшісі Абдулxамит Авсар сөз арасында былтырғы теракт кезінде басқыншылар осы медиахолдингті басып алмақ ниетте болғанын да айтып қалды. Сонда оны от пен оқтан қорғау үшін халық кеудесін тосқан! Бұл жергілікті тұрғындардың өз ақпарат айдынына деген сенімі мен құрметін көрсетеді емес пе? Конституция мен халқының өзі қолдап-қорғап отырған ақпарат таратушының әлеуетін осыдан түсіне беріңіз.
Ал Түркия еліне жылына 33 миллион турист барады екен. Ел кірісінің 5/1 бөлігін осы сала толтырып отыр. Саяхатшылар естелік ретінде жергілікті қолөнер шеберлерінің бұйымдарына тапсырыс беріп жатады. Яғни бір сала өзге салаларды «сүйреуші» есебінде жұмыс істейді. Туризмді дамытуда біз бір-бірімен сабақтаса өрілген осы тәжірибені енгізсек, ұтылмасымыз анық.
Туристің көптігіне қарамай экологиялық тазалық сақталған. Табиғатқа, қоршаған ортаға деген қамқорлығынан үлгі алуымыз керек.
Нұрбек БАЙБОСЫНОВ,
«Хабар» арнасының Оңтүстік Қазақстан облысындағы меншікті тілшісі:
Кеңсеге барып уақытын жоғалтпайды
– Түркиялық әріптестердің технологиясы біздіңкіне ұқсас болғанымен жүйесі басқа. Мұндағы әріптестер бір оқиғаға куә болса, оператор, камера іздеп әбігерге түспейді. Бірден оқиға орнынан ақпарат таратуға толық жағдай жасалған. Біз күнделікті пайдаланып жүрген әлеуметтік желінің тікелей эфирі смартфонымыздың камерасымен жақсы түсірілмейді. Ал Ыстамбұлдағы әріптестердің смартфоны өте сапалы. Камерасы осы салада жұмыс істеуге арналған. Мұның бір жақсы жері, журналистер кеңсеге барып, келіп уақытын жоғалтпайды. Кез келген жерден ақпаратты дайындап бере алады. Ол дайындаған ақпарат алдымен редактордың поштасына түседі.
Менеджменттің бір түрі – саяхатшыға сенім артады. Танымайтын адамға да қарызға зат береді. Мысалы, дүкен аралап жүрген туристің бір затты ұнатқанын байқаса, түскен қонақүйін сұрайды. «Ақысын кейін әкеліп бересің ғой» деп сеніп, әлгі затты қолына ұстатып жібереді. Тұрғын тұрмақ, шетелден келген туристке сенім артқан олардың таза көңілінен ұялып затты да аласың, ақысын да ұмытпай апарып бересің. Майда-шүйде дүние, десек те туристпен байланысты арттырудың тиімділігі осында шығар?!
«Қайнарбұлақ»: аулаларға – аяқжол, көшелерге – бейнекамера
Среда, 02 Август 2017 05:52
Жақында ғана «Қайнарбұлақ» тұрғын алабындағы бірқатар көшелерге 16 бейнебақылау камерасы орнатылды. «Қайнарбұлақта» 42 алап (массив), 213 көше бар. Жазғы маусымда 8 762 үйден 53 245 тұрғын тіркелсе, қысқы маусымда олардың саны 32 570-ке азаяды. Бұдан өзге «Қайнарбұлақ» тұрғын алабында 3 дәріхана, 51 сауда дүкені, 2 шіркеу мен 1 орталық базар және 1 мектеп жұмыс істейді. Аталған аумақ тәртібін Қаратау полиция бөліміне қарасты №54 учаскелік полиция пункті бақылайды.
Тәртіп сақшысына артылар жауапкершілік көп
Ғабит Патшаханұлының айтуынша, аудандағы құқық бұзушылық оқиғаның жартысынан көбі бір ғана «Қайнарбұлақ» тұрғын алабында тіркеледі.
– Бұл көрсеткіш көңілді көншітпей тұр. Құқық бұзушылықтың жиі орын алатын себебі, мұнда бұрынғы саяжай әлі де демалушылар үшін қызмет етуде. Демалуға 1-2 күнге ғана келетін адамдар көбіне тазалық тұрмақ, тәртіпті де сақтамайды. Спирттік ішімдік ішіп, бір-бірімен қақтығысып қалады. Жол жүру ережесін ескермейтін жүргізушілердің үстінен тұрғындар жиі шағымданады. Екіншіден, «Қайнарбұлақта» тұрғындар саны басқа шағынаудандарға қарағанда 3-4 есе көп. Үшіншіден, қаланың шетінде орналасқан, – дейді аудан әкімі.
Қылмыс жиі орын алатын аймақтағы жағдайды жан-жақты саралаған Ғ. Мәуленқұлов мәселені қала әкімі Ғ. Әбдірахымовтың назарына ұсынған.
Маңызды мәжіліс, нәтижелі жұмыс
«Қайнарбұлақ» тұрғындарының қауіпсіздігін қамтамасыз етіп, құқық бұзушылықты жою, инфрақұрылым салаларын дамыту және басқа да өзекті мәселелердің шешімін табу мақсатында жыл басында мәжіліс өтіп, хаттама толтырылған.
Ғ.Әбдірахымов төрағалық еткен алқалы жиынға қала әкімінің орынбасарлары, аппарат басшысы, қалалық құрылымдық бөлім басшылары мен қалалық және аудандық Жергілікті полиция қызметі, Қаратау ауданы прокуроры қатысып, нақты тапсырмалар алған.
Қала басшысы міндеттеген шаруалар хаттама негізінде 6 айда аяқталуы тиіс болса, Шымкент қаласы әкімі аппаратының басшысы Р.Аюпов оның бірқатарын атап өтті.
– «Қайнарбұлақ» тұрғындары енді коммуналдық қызмет төлемдерін төлеу үшін орталыққа келіп әуреленбейді. Олар үшін төлем қабылдайтын 7 терминал орнатылды. Сондай-ақ, «Қазпочта» АҚ басшысының келісімімен почта бөлімшесі ашылып, бүгінгі таңда саяжай тұрғындарына қызмет етуде, – дейді Рашид Абатуллаұлы.
Ғ.Әбдірахымов «Қайнарбұлақ» тұрғын алабы және саяжайындағы жер телімдері мен үйлердің құжаттары заңдастырылуын, тұрғындардың тұрғылықты мекен жайы бойынша тіркеуге алынуын орынбасары Н.Көшеров, құрылымдық бөлім басшылары Қ.Сайлауов, Н. Архабаевқа тапсырған. Бұл бағытта бүгінде тұрғындар тұрақты мекенжайы бойынша тіркеуге алынып, 96 үйдің құжаты заңдастырылды.
№83 жалпы орта мектептің де құжаты рәсімделді. Аудан әкімі Ғ. Мәуленқұлов осы орайда тұрғындарды қуантатын бір жаңалығымен бөлісті.
– Биыл қайнарбұлақтықтар үшін тағы бір жаңа мектеп пайдалануға беріледі. 1200 орындық білім ошағы «Нұрлы жол» бағдарламасы аясында жүзеге асып отыр. Жақында бұл аумақтан дәрігерлік амбулаторияны ашу жоспарланды. Қала орталығына қатынайтын қоғамдық көлік тұрғындардың жол жүруін жеңілдетті. Сондай-ақ, тұрғын алапта 7 аялдама, 2 бағдаршам орнатылды. Жол салу, шағал тас төсеу, жаяу жүргіншілерге арналған аяқжол құрылысы мен сапалы жарықпен қамтамасыз ету жұмыстары әлі де жалғаса бермек. Біз Ғабидолла Рахматоллаұлы міндеттеген тапсырмаларды 100% орындадық – дейді ол.
Сапалы бейнекамералар – сақтық кепілі
Мәжілісте «Шымкент – қауіпсіз қала» жобасы аясында қалалық ЖПҚ басшысы Д.Мейірхан мен Қаратау аудандық ЖПҚ басшысы С.Жұмановқа негізгі міндеттер жүктелді.
– «Қайнарбұлақ» саяжайы мен тұрғын алабында алдағы уақытта құқық бұзушылықты азайту үшін қала әкімінің тапсырмасына сәйкес учаскелік полиция инспекторларын 2 есеге арттырдық. Бүгінде 13 полиция инспекторы бар №54 учаскелік полиция бекеті Бақытжан Малдыбаевтың басшылығымен тәулік бойы қызмет етеді. Кешкі кезекшілікте 2 мамандандырылған көлік бар. Сондай-ақ, Шымкент қаласы мәслихатының депутаты, кәсіпкер Талғат Әмірбековтың демеушілігімен 16 бейнебақылау камерасы орнатылды, – дейді Сейдалы Оразалыұлы.
Кәсіпкер өзін сайлаған аумақтың жағдайына бей жай қарамайтынын тұрғындардың қауіпсіздігі үшін жасалған қадамымен дәлелдей алды.
– «Қайнарбұлақтағы» құқық бұзушылықтың алдын алу мақсатында орнатылған 16 бейнебақылау камераларының мүмкіндігі зор. Күндіз-түні және ауа рауының кез келген құбылысында көріністі анық жазып алады. Бұл камералар дыбысты да жазып алады. Ал жазбалардың орталық видеосервері 8 шақырымға дейін Wi-Fi қызметін де атқарады. Сондай-ақ, осы орталық жүйесіне тағы 200-ден астам бейнебақылау камерасын жалғауға болады, – дейді халық қалаулысы.
Бұл жекеменшік тұрғын үйлер орналасқан шағынаудандарда орнатылған алғашқы бейнебақылау камералары. Бұған дейін мұндай бақылау камералары көпқабатты үйлердің ауласы мен қаланың орталық көшелерінде ғана болған. Қаратау ауданының әкімі Ғ. Мәуленқұлов пен қалалық мәслихат депутаты Т.Әмірбеков алдағы уақытта тағы 30 бейнебақылау камерасын орнатуды ойластыратынын атап өтті. Бір ғана «Қайнарбұлақ» тұрғын алабымен шектелмей, көрші шағынаудандарды да бақылау мүмкіндігін қарастырмақ.
Тұрғындар атынан ризашылығын білдіре келген Айман Арысбаева қазірдің өзінде тәртіп сақтауда едәуір айырмашылық байқалатынын айтты.
– Көшемізге жаңа асфальт төселгеннен кейін көлік тізгінінде отырғандар жылдамдықты асыра айдайтын. Соның салдарынан жол-көлік оқиғасы да жиі қайталанды. Ал көшелерге камера орнатқалы көліктер шектеулі жылдамдықтан асырмайтын болды. Тағы бір оқиға жуырда біздің саяжайға демалуға келген жастар арасында орын алды. 2-3 минутта полиция қызметкерлері арнайы көліктерімен жетіп келіп, бұзақылықты тоқтатты, – дейді «Қайнарбұлақ» саяжайының тұрғыны.
Бүгінгі таңда «Қайнарбұлақ» саяжайы мен тұрғын алабын қауіпсіз аймаққа айналдыру барысында атқарылған жұмыстар оң нәтижесін бере бастады.
Даяшылық қызметке дайындады
Среда, 02 Август 2017 05:10
«Оңтүстік» туризм орталығы облыс әкімдігінің қолдауымен «Мейрамаханалық әдеп стандарты» және «Қонақүй бизнесі» атты 6 күндік семинар-тренингтерін өткізуде.
Шымкент қаласындағы түрлі кафе-мейрамханалардың даяшылары мен әкімдік қызметкерлері, жалпы саны 40 адам семинар-тренингке қатысуға ниет білдірген. Олар екі топқа бөлініп, «RIXOS» қонақүйінің «Қажымұқан» атындағы мәжіліс залында Надежда Уткинаның мейрамхана әдебі жайлы семинарын тыңдады.
Семинар-тренингке қатысушылардың бірі Қансейіт Тілеуберді Қ.Сәтбаев атындағы Қаз ҰТЗУ-дың ІІ курс студенті.
– Семинарға қатысушылардың дені дәмхана, мейрамхана қызметкерлері. Ал мен жазғы демалыста уақытымды босқа өткізгім келмеді. Мейрамхана әдебін меңгеріп, үйде қонақ күткенде ата-анама көмектессем деймін. Сондай-ақ, мейрамханаға кіргенде мұндай мәдениеттен хабардың болғаны да абырой емес пе? – дейді Қансейіт.
Ал Әл-Фараби атындағы ҚазҰУ-де туризм саласы бойынша біліктілігін арттырып жүрген 3 курс студенті Элиз Мейірбек өз саласында үздік болу үшін барлығын үйренуге құштар.
«ОҚО Туризм индустриясын дамыту орталығы» Ассоциациясының директоры Г. Ақбердиева «даяшылықты» жауапты қызмет деп санайтынын жеткізді.
– Бізде бұған дейін жұмыс таба алмағандар ғана даяшылық қызметке баратын. Қазір адамдардың көзқарасы өзгерді, талап басқаша. Кез келген дәмхана, мейрамханаға кіргенде ең әуелі даяшының әдебі ескеріледі. Сервистің сәнін келтіріп, әрбір тағамын ілтипатпен ұсына алған даяшы келушіні баурап алады. Ал ыдыстарды үстелге орналастыру мәдениеті, тамақтану кезіндегі жайлылық жоғары бағаланатыны сөзсіз. Мұндай сапаны меңгерген даяшы да табысты жұмыс істейді. Семинар-тренингтің мақсаты да сол. Бұл жолғы сабақтар ақысыз өтті және даяшы қызметіндегілер үйренгенін өзі қызмет ететін мейрамхана қызметкерлерімен бөліседі, – дейді Гүлмира Асатіллақызы.
Тренингте классикалық ыдыстарды үстелге дұрыс орналастыру, тақырыптық асxана жабдықтарын қолдану жағы да қамтылды. Мейрамхана әдебін үйренушілер соңғы күні психолог жаттықтырушымен жұмыс істеп, семинар-тренингтің сертификатын алды. Болашақта даяшылық қызметке мейрамхана әдебін меңгерген арнайы сертификаты бар мамандар тартылмақ.
Ал «Қонақүй бизнесі» тақырыбындағы сабақтар «Канвас» қонақүйінде жалғасуда. Семинар-тренинг 5 тамыз күні аяқталып, қатысушылар сертификатқа ие болады.
Сұлтанғали МАУТАЙҰЛЫ: «МЕДИЦИНАНЫҢ КЕШЕГІ ҚЫЗМЕТІ МЕН БҮГІНІНДЕ айырмашылық жер мен көктей»
Пятница, 28 Июль 2017 09:21
Сұлтанғали Маутайұлы Сарыбай – 1971 жылы 18 қыркүйекте Оңтүстік Қазақстан облысы, Төлеби ауданы, Қаратөбе ауылында дүниеге келген.
1988 жылы Төлеби ауданындағы Совет орта мектебін бітіріп, 1993 жылы Шымкент Мемлекеттік медицина институтында білімін шыңдаған.
Медицина саласындағы еңбек жолын 2000 жылы облыстық балалар ауруханасында балалар хирургі болып бастаған. С. Сарыбай 2014 жылдан бері №1 Шымкент қалалық балалар ауруханасында бас дәрігердің хирургия ісі бойынша орынбасары қызметін атқаруда. Дәрігермен балалар хирургиясы тақырыбында өрбіген сұхбатты назарларыңызға ұсынамыз.
Бір жылда 1000-нан астам ота жасалған
– Сұлтанғали Маутайұлы, өзіңіз қызмет ететін аурухананың бүгінгі тыныс-тіршілігі жөнінде баяндасаңыз.
– №1 Шымкент қалалық балалар ауруханасы өз қызметін бастағанына 4 жыл болды. Бұл – Елбасының тапсырмасына сәйкес «100 аурухана, 100 мектеп» бағдарламасы аясында жүзеге асқан жоба болатын. Бұған дейін 0-15 жас аралығындағы қала тұрғындары облыстық балалар ауруханасына қаралатын. Бүгінде бұл жастағы балалар саны 300 мыңға жетіп отыр. Гауһар Үкібаева басқаратын №1 Шымкент қалалық балалар ауруханасы қаладағы 300 мың балаға қызмет етеді. Мұнда 9 салалы бөлімше сапалы медициналық құрал-жабдықпен қамтылған. Білікті мамандар қызмет етеді. Гауһар Сапартайқызы педиатр-дәрігер болғанымен, балалардың нағыз жанашыры ретінде олардың денсаулығын да жан-жақты ойлай біледі. Осы аурухананың ішінен 30 орындық хирургия саласын ашуда оның көп еңбегі сіңді. Мұнда жарақат бекеті бар және 16 орындық травмотология-ортопедия бөлімі де балаларға қызмет етуде.
– Тақырыпты өзіңіз басқарып отырған хирургия саласына бұрайықшы. Ауруханада ота жасау көрсеткіші қандай?
– Бұл ауруханаға қызмет ауыстырғаныма 2 жылдан астам уақыт өтті. Мұнда травматология-ортопедия бөлімінің меңгерушісі Еркебай Бектаев пен хирургия бөлімінің меңгерушісі Қалдыбай Тәжібаев сынды білікті медицина мамандары бар. Біз бүгінгі жетістіктің бәріне бірлесе атқарған жұмыстардың нәтижесінде қол жеткізіп отырмыз. 2015 жылдан бері жаңа технологиямен инновациялық тәсілде ота жасауға көштік. Салыстырмалы түрде айтсақ, қалалық балалар ауруханасында 2016 жылы, яғни бір жылда түрлі деңгейдегі 1000-нан астам ота жасалды. Ал қазір тұрғындар саны күннен күнге артып жатыр. Оның үстіне, қала аумағына енген 40-тан астам жаңа елдімекен тұрғындары да халық санының артуына септігін тигізді. Халық саны артқан сайын біздің көмегімізге жүгінетін емделушілер саны да өсуде.
– Балалардың отадан кейінгі жағдайы қандай?
– Бізде жасалған отаның 80-90%-ы кішіинвазивті. Яғни, бала тәніндегі хирургиялық дертті кішкентай ғана саңылаулар арқылы жеңеміз. Мұндай жеңіл отадан кейін балалар небәрі үш күнде жағдайы жақсарып, орнынан тұрып, ел қатарлы тамақтана алады. Отадан кейін бұрынғыдай ауруханада сарғайып ұзақ жатпайды, денсаулығы жақсарып 2-3 күнде үйлеріне шығады.
Кішіинвазивті хирургия – жаңа туған нәресте
– Жаңа технологиялық мүмкіндіктің болғаны жақсы әрине. Дегенмен, мұндай ем қымбатқа түспей ме?
– Қымбатқа бағаланады. Есесіне, жаңа технология дәрі-дәрмекке жұмсалатын қаражатпен бірге науқастың қажыр-қайратын, ерік-жігерін де үнемдейді. Науқас отаның орнындағы ауруды сездірмейтін дәрі ішіп, оның жазылуын ұзақ күтіп, асқынып кетуден сақтанып түрлі дәрі-дәрмек қабылдап, төсекке таңылып әбігерге түспейді. Бұрын лапароскопиялық (іш-құрсақ қуысына жасалатын оталар) отаны дәстүрлі медицина жолымен жасағанда асқыну, іріңдеп кету, ішек жұмыстарының бұзылуы, жабысқақтық жиі қайталанатын. Жай ғана соқыр ішек отасынан кейін науқас кемінде бір апта ауруханада жатып, үйіне шыққан соң бір айға дейін ерекше күтімді қажет ететін. Медицинаның бұрынғысы мен бүгінгісінде айырмашылық жер мен көктей. Жаңа технология арқылы жасалатын кішіинвазивтік оталарда дәрі-дәрмек, антибиотиктер аз қолданылады және оңалту кезеңі 2-3 күнге созылады. Ал отаның одан да асқыну жағдайы мүлде тіркелген жоқ.
– Отаның күрделі түрлеріне де тоқталыңызшы.
– 2015 жылы Беларусь мемлекетінің астанасы Минск қаласында анестезиологиялық реанимация және хирургтардың бригадасы болып тәжірибе алмасып қайттық. Ондағы мақсатымыз осы кішіинвазивті хирургиялық тәсілді жаңа туған нәрестелерге қолдану болатын. Қазір жаңа туған нәрестелерде туа біткен диафрагма патологиясы (кеуде қуысындағы көкет ахауы) тіркелуде. Нәрестелерде көкеттегі жарық арқылы ішкі ағзалар кеуде қуысына қарай ығысып, баланың тыныс алуын қиындатады. Соның нәтижесінде шақалақтың шетінеп қалу жағдайы орын алады. Міне, осы диафрагма жарығына ота жасауды 2017 жылдың сәуір айында Денсаулық сақтау басқармасының бұйрығымен қолға алдық. Бүгінге дейін қалалық балалар ауруханасында жаңа туған 4 нәрестеге диафрагма ахауына қарсы ота жасалды. Дәрігерлер жақсы нәтиже көрсетті. Қазір балалардың жағдайы қалыпты. Жалпы, нәрестедегі диафрагма патологиясын жүктілік кезінде анықтауға болады. Егер ол дер кезінде анықталып, анасы перинатальдық орталықта босанып, содан кейін біздің хирургия бөліміне ауыстырылса, балалардың өмір сүру мүмкіндігі өте жоғары болар еді.
Санкт-Петербург дәрігерлерімен тәжірибе алмасамыз
– Жаңа технология балалар ауруханасына әжептеуір серпін беріпті. Бұл жетістіктің шыңы ма әлде аурухана қызметкерлері әлі де медициналық білімін арттыруды көздейді ме?
– Бұл – бүгінгі жетістік. Ал болашаққа біз әрқашан жоспар құрып отырамыз. Басқарма басшысы Мұхан Кеңесбекұлының қолдауымен бүгінде Алматыдағы «Педиатрия және хирургия» ғылыми орталығы мен Астанадағы «Ана мен бала» ұлттық ғылыми орталығымен тығыз байланыс орнаттық. Біз сол орталықтарға барып шеберлік сағаттарына қатысамыз. Ал аса күрделі оталар кезінде ол жақтан мамандар шақыртамыз. Диагностикалық сұрақтарға орай телемедицина, электронды пошта көмегін жиі пайдаланамыз. Сондай-ақ, жақында жаңа туған нәрестелерге қалай көмек көрсету, отадан кейінгі жағдайын бақылау, травмотология-ортопедия саласын жетілдіру мақсатында Санкт-Петербургтің үлкен ғылыми орталықтарына баруды көздеп отырмыз.
– Дәрігерліктің ең қиын жолын таңдапсыз, осы салада сізге жетекші бола білген хирургия саласының мамандарынан кімдерді атар едіңіз?
– Профессор Ағабек Қарабеков, Әбдішүкір Егізбаев, Қайрат Ізбасов сынды елге қызмет еткен ағалардан мол тәжірибе алдым. Хирургия саласындағы әрбір жетістігімде осы кісілерден алған білім мен тәжірибенің үлесі бар. «Бала өмірдің гүлі, көздің нұры» демекші, осы жас ғұмыр үшін еңбек етіп жүрген әріптестерімнің еңбегі әрқашан бағаланса деймін. Медицина саласында қызмет етіп жүрген дәрігерлерге жетістік тілеймін.
– Әңгімеңізге рахмет!