Шымкент қаласында 1 қыркүйек күні 21 мың 200 бала мектеп табалдырығын аттады. Олардың барлығына жол жүру ережелерін ұстаз, ата-анамен қатар, полицейлер де үйрете бастады. Осы ретте, қалада «Назар аударыңыз, балалар!» жедел іс-шарасы аясында 1 сынып оқушыларына арналған акция өтті.
ОҚО ІІД Жергілікті полиция қызметінің қызметкерлері алғашқы дәрістерін №55 орта мектебінде өткізді. Полицейлер балаларға оқу жылы барысында аса маңызды және қажет болатын жол белгілерімен таныстырды. Оқытылған теориялық білімнен соң, тәртіп сақшылары сабақты тәжірибе жүзінде шыңдау үшін жас өрендерді жол қиылысына алып барды.
Акция барысында оқушыларға «Жолдас көмекке асығуда» мультфильмі көрсетілді. Сонымен қатар, балақайларға естеліктер мен фильм дискілері таратылды.
Айта кетейік, жыл басынан бері Оңтүстік Қазақстан облысында жаяу жүргінші балалардың қатысуымен 246 жол-көлік оқиғасы тіркелген. Оның ішінде 22 бала қаза болып, 241 жарақаттанған.
