Бұл жөнінде онлайн өткен Үкімет отырысында ҚР Премьер-Министріне Шымкент қаласының әкімі Мұрат Әйтенов баяндады.
Қала әкімінің мәлімдеуінше, тіркелген өрттің басым бөлігі жеке тұрғын үйлерде орын алған. Өрттің шығу себептерінің 60 пайызы электр сымдары мен құралдарын дұрыс пайдаланбауына байланысты.
Жылыту маусымынан бастап, төтенше жағдайлар департаменті, жергілікті атқарушы органдар және жергілікті полиция қызметкерлері бірлесіп, 10 мыңға жуық үйді аралады, ондағы 43 мыңға жуық тұрғынға үгіт-насихат жұмыстарын жүргізген. Тұрғындардың қатысуымен 47 жиын өткізілді.
Сондай-ақ, арнайы техника жұмылдырылып, дауыс зорайтқышы арқылы қала тұрғындарына түсіндіру жұмыстары жүргізіліп, қаланың орталық көшелеріндегі LED-экрандарда, ірі сауда орындарында өрттің алдын алу туралы әлеуметтік бейне-роликтер көрсетілуде. Бұл жұмыстарға 100-ден астам волонтер қатысып, 5 мыңнан астам тұрғынға нұсқаулық пен ескертпелер таратылды.
Сонымен қатар, мемлекеттік-жекеменшік әріптестік шеңберінде 31 арнайы техника сатып алынып, төтенше жағдайлар департаментіне тапсырылған. Департамент қызметкерлері арасында өртке қарсы жауынгерлік даярлық жұмыстары да күшейтіліп жатыр.
Осы орайда мамандар қала тұрғындарын үйдегі қауіпсіздік ережелерін сақтауға шақырады.
