Облыста «Мектепке жол» акциясы басталды. Дәстүрге айналған шара биыл жетінші рет ұйымдастырылып отыр. Акцияның мақсаты – аз қамтылған, көпбалалы отбасыдан шыққан және ата-ана қамқорлығынсыз қалған балаларға жаңа оқу жылы қарсаңында киім-кешегі, оқу құралдары сияқты керек-жарағына жәрдем беру.
Жеті жылдан бері ұйымдастырылатын акция аясында 2 миллионнан астам балаға көмек көрсетіліпті. Есепке шаққанда, бұл 10 миллиард теңгені құрайды. «Мектепке жол» акциясы көмек қолын созумен ғана шектелмейді. Мамандар түрлі себептермен мектеп табалдырығын аттай алмай қалатын балаларды анықтап, олардың ата-аналарына түсіндірме жұмыстарын да жүргізеді. Өткен жылы дәл осы уақытта оқшаулауға алынған 270 оқушы болса, түнгі уақытта көше кезіп жүрген 1200-ге жуық жас-өспірімнің ата-анасы тәртіп сақшыларынан арнайы ескертпе алған. Ал, биылғы статистика тамыздың 1-і мен қыркүйектің 31-і аралығында өтетін акция барысында анықталып, жаңарады.
«Жалпы, облыста көмекке мұқтаж 30 мыңға жуық бала бар. Биыл бұл көрсеткіш біршама артуы мүмкін» дейді білім саласының мамандары. Бала-шағаны мектепке қамдауда қолы қысқа ата-аналар үшін облыстық білім, жастар саясаты және тілдерді дамыту басқармасында арнайы сенім телефоны жұмыс істейді. Қоңырау шалу тегін жүргізіледі.
8 (7252) 24-31-25.