Шымкент келбеті

Шымкент құрылыс бөлімінің басшысы Тәжібай Егетаевтың айтуынша, 2016 жылы 19 әлеуметтік нысанның құрылысына шамасы 8 млрд теңге қаржы бөлініп, оның ішінде 15 білім нысанының құрылысына 7,4 млрд теңге (14 мектеп, 1 балабақша), 3 спорт нысанының құрылысына 300 млн теңге және Бадам өзені бойын абаттандыру жұмыстарына 260 млн теңге қаралған. 

Атқарылған жұмыстың нәтижесінде 2016 жылы 6 мектеп және 1 балабақша пайдалануға берілген. Аталған 7 нысанның екеуі ұлттық қор есебіне, қалған бесеуі (4 мектеп, 1 балабақша) облыс және қала бюджеті есебінен тапсырылды. 

– Ал 2017 жылы жаңа 5 мектептің құрылысын бастау жоспарланған және аталған жұмыстарға шамамен 3,2 млрд теңге қаралған, – деп баяндады құрылыс бөлімінің басшысы әкімдіктің кезекті отырысында. 

Биыл қаламызда 5700 оқушы жаңа оқу ғимараттарында білім алады деп жоспарлануда.

Оңтүстікте электр энергиясының тапшылығы өзекті мәселелердің бірі. Бүгінде бұл бағытта өңірімізде ірі жобалар қолға алынып жатыр. Қазір Шымкентте 2 электр станциясының құрылысы жүруде.

Облыс тұрғындарын сапалы электр қуатымен қамтуда өткен жылы атқарылған айтарлықтай істер бар. Мәселен, 2016 жылы облыстық бюджеттен 5,534 млрд теңге бөлініп, 22 нысанның құрылысы жүргізілген. Нәтижесінде, 585,8 шақырым электр желілері мен 233 дана КТП орнатылып, 72 мың тұрғын тұрақты және сапалы электр қуатымен қамтылған.

– Шымкент қаласының солтүстік бөлігінде 350 мың халық пен әлеуметтік нысандарды сапалы электр қуатымен қамту мақсатында құны 6,7 млрд теңгені құрайтын 220 киловольттық «Бозарық» қосалқы станциясының құрылысы жүргізілуде. Сонымен қатар, 2016 жылы Шымкент қаласында 80 мың халықты қамтитын 110 киловольттық «Астана-1,2» қосалқы станциясының құрылысы басталды, – деді ОҚО Аймақтық коммуникациялар қызметінде өткен брифингте облыстық энергетика және тұрғын үй-коммуналдық шаруашылық басқармасының басшысы М. Марайым.

Мәліметтерге сүйенсек, «Оңтүстік Жарық Транзит» ЖШС-нің инвестициясы есебінен 4,86 млрд теңгеге 610,9 шақырым электр желілері мен 108 дана қондырғыларға қайта құру және жаңарту жұмыстары жүргізілген. Осылайша, электр жүйелерінің тозығы жетуі 57,5 пайыздан 55 пайызға төмендеп отыр.

«Шымсаяға» 1 мың түп ағаш отырғызылды

Шымкент қаласының Бас жоспарына сәйкес қала аумағына жаңадан елдімекендер қосылып, халықтың саны артты. Сондықтан қаланың экологиялық ахуалы мен ішкі туризмін жақсарту және қараусыз жатқан сайларды саябаққа айналдыру мақсатында өңірде «Шатқал» бағдарламасы әзірленді.

Өңір басшысы Ж.Түймебаевтың қатысуымен бағдарлама аясында жаңа демалыс орнының капсуласы салынды. Келешекте халқымыз тынығып, серуендейтін саялы баққа «Шымсая» деген атау берілді.

«Тассай» тұрғын үй алабының маңында орналасқан 25 гектар шатқалды көгалдандыру мақсатында құрылған демалыс аймағында 1 мың түп ағаш отырғызылды.

Көгалдандыру жұмысына өңір басшысымен бірлесе сол елді мекеннің тұрғындары, жастар, жоғарғы оқу орнының студенттері мен ұстаздары және БАҚ өкілдері боз арша, талшын шаған, емен, катальпа, аққайың ағаштарын егіп, қаламыздың гүлденіп, көркейуіне өз үлестерін қосты.

– Алдағы уақытта демалыс аймағына 6 мың түп ағаш көшеттері отырғызылып, балалар алаңшасы, шахмат және дойбы алаңы, вело жолдар мен театралдық сахна, полиция бөлімшесі, спорттық жаттығу алаңдары салынып, халық игілігіне беріледі. Бұдан бөлек биыл қалада тағы осы сынды 4 жер абаттандырылып, саябаққа айналдырылады. Сонымен қатар, «Шатқал» бағдарламасы аясында 16 мың гектардан астам алқапты құрайтын қаланың жасыл белдеуін қалыптастыруды жоспарлап отырмыз, – деді Ж.Түймебаев.

Саябақта серуендеп қана қоймай, мәдени кештер ұйымдастырылып, ашық аспан астындағы амфитеатр қойылады.

Облыс әкімінің бастамасымен қолға алынған тың жоба бойынша алдағы уақытта қалада 600 гектар шатқалды демалыс орындарына айналдыру жоспарлануда. Осы жылы бірінші кезеңдік жұмыстар шеңберінде қолға алынатын 5 шатқалдың (97 гектар жерді құрайды) біреуі бюджет қаржысы есебінен көгалдандырылып, сая жерлерге айналдырылса, қалғаны демеушілер есебінен жүзеге асырылатын болады. Осы іспеттес абаттандыру жұмыстары қаладағы «Самал-3», «Нұрсәт», «Достық» (оң жақ және сол жақ) шағынаудандарында жүргізіледі.

Көзі қарақты көпшілік біледі, Шымкенттегі «Жаңа талап» спорттық-туристік агенттігі 2016 жылдың үздік туристік ұйымы атанған болатын. 2010 жылы компанияның құрылуынан бастап атына сай «жаңа талапты» игере отырып, туристік сала нарығындағы жаңа стандартты қызмет көрсетудің озық үлгісін ұсынуда. Агенттік алты жыл ішінде өздерін сенімді серіктес, кең ауқымды қызмет түрін көрсетуші ретінде таныта білді. Оның жеңісінің құпиясы неде? Бұл жөнінде өз ойымен бөліскен «Жаңа талап» спорттық-туристік агенттігінің директоры Денис Жарменов мекеменің атқарылған істері мен болашағы жайлы баяндап берді.

– «Жаңа талап» – еліміздегі жалғыз спорттық-туристік агенттік – дейді Денис Қасымұлы. – Біздер спорт пен туризмді бір арнаға тоғыстырып, күш біріктіре білдік. Тұжырымдаманы жасауда негізгі күшті белсенді демалыс пен экстремалды спорт түріне бағыттай отыра, облысымызға туристерді тартып, ішкі туризмді дамытамыз. Бірақ, әрине сыртқы туризмге де қызмет көрсетеміз. Бүгінгі таңда агенттік қызметкерлерінің көмегімен әлемнің түкпір-түкпіріне баруға мүмкіндік туып отыр. Бүкіл әлем бойынша кең ауқымды турлар ұйымдастырамыз, оның ішінде: фитнес-тур, емдік-айықтыру турлары, тарихи-қажылық турлар, шоптур, экологиялық тур, сондай-ақ тау-шаңғы және жағажай турлары. Еліміздің спорт жанкүйерлерін ірі халықаралық жарыстарға жібереміз. Сонымен қатар, әуе және теміржол билеттерін алуда, қонақүй бөлмесін брондауда, шетелдіктердің күтіп алуына, қиындықта виза рәсімдеуге көмектесіп, кез келген көлік түрімен тасымалдау қызметін ұсынамыз. 

«Абырой – ақшадан қымбат» деген ұстанымда қызмет ету біздердің жеңісіміздің құпиясы болса керек. Әрбір тұтынушыға өзіндік ерекше назар аударамыз. Тіпті ең «қытымыр» туристің өзі бізге разы болып кетіп жатады. Сондықтан да, біз үшін ең алдымен қызмет көрсету деңгейі – басты назарда. Біздегі мамандар біліктілігін жоғарылату мақсатында үнемі семинар мен мастер-класқа, ақпараттық турларға қатысып тұрады. 

Бізге сенім білдірген қазақ-стандықтардың артуына орай, биылғы жылы «Жаңа талап» туристік агенттігінің Астана қаласында филиалын ашпақпыз. Осылайша облысымызға келетін туристер ағынын ұлғайтуға тырысамыз.

Елімізде туризмнің тұрақты дамуы үшін табиғат русурстары мен таптырмас мүмкіндік бар екенін айта кету керек. Бұл сала аймақтың гүлденуінің бастауы екенін түсініп, қолдау көрсетуші жергілікті биліктің болуы да үлкен рөл атқарады. Тиімді туристік орталық құру үшін мемлекет тарапынан, сонымен бірге отандық және шетелдік инвесторлар тұрғысынан да қаржылық салымдар қажет. 

Облыс әкімі Жансейіт Түймебаев бүгінде туризм саласын жұмысының маңызды бағытына айналдырды. Бұл ретте Қазақстан Республикасында 2020 жылға дейін туризм саласын дамыту бағдарламасына сәйкес, Оңтүстік Қазақстан «Ұлы Жібек жолының жүрегі» ретінде танылады.

Біздің облысымыздың туристік бағыты тамаша табиғат көріністерімен, көшпелілер тирихы мен мәдениетін, тарихи қала тынысын таныстыруды ұйымдастырады. Қазір туризмнің даму бағыты облыс әкімінің қолдауының арқасында дұрыс жолға қойылуда. Олар – Түркістан және Отырар аудандарындағы тарихи-мәдени туризм орталығы, Сарыағаш ауданында – емдеу-сауықтыру туризмі, Түлкібас пен Төлеби (Қасқасу) аудандарында, Шардарада экологиялық, тау-шаңғы және жағажай турлары бар. Жалпы алғанда, облыс басшылығымен атқарылып жатқан жұмыстар ОҚО-ның туристік әлеуетін көтеруге жол ашатынына сенемін. Облыстық кәсіпкерлік палатасы, Марат Қарабаевтың басқаруындағы индустриалды-инновациялық даму және туризм ұйымы, «ОҚО туристік индустриялық даму орталығы» Ассоциациясы (жетекшісі Гүлмира Ахбердиева), «Ontustik Tourism Center» туристік-ақпараттық орталық (директоры Жасұлан Тулебеков) біздерге үлкен көмегін көрсетуде. Осы ұйымдармен бірлесе «ЭКСПО-2017» халықаралық көрмесі туристерінің бағытын жасауға қатысамыз. Әрине, бұл іс-шара еліміздің беделін асқақтатуға зор үлесін қосады. Оның қатарына 29 қаңтарда Алматы қаласында бастау алатын ХХVІІ қысқы Бүкіләлемдік Универсиада да кіреді. Әлемнің әр түкпірінен келген туристерге қазыналы Оңтүстікті таныстыруда мол мүмкіндік берері сөзсіз. 

ОҚО-да спорттық туризмді, оның ішінде белсенді демалыстың барлық түрін дамыту керек деп ойлаймын. Биыл біз Алматыда өтетін ірі халықаралық көрмеге қатысып, «ОҚО-ның су әлемі» деп аталатын жобасымен таныстырамыз. Түрлі мемлекеттен келген қонақтарға облысымыздың су жүйесінің дамуы мен бағыттарының барлық мүмкіндіктері көрсетілетін болады. Сондай-ақ, оның базасында қолдануға болатын белсенді демалыс ұйымдастыру көрсетіледі. Атап айтсақ, өзенге серуен, балық аулау, су шаңғысы, дайвинг, т.б. Бұған облысымызда өзен мен көлдер жеткілікті деп айтуға болады. 

«ШК» АНЫҚТАМА

Денис Қасымұлы Жарменов – байдарка мен каноэ есуден Қазақстан Республикасының спорт шебері, ҚР Еңбек сіңірген жаттықтырушысы, байдарка мен каноэ есуден ОҚО федерациясының президенті, «Жаңа талап» спорт-туристігінің директоры.
2012 және 2014 жыл қорытындысымен облыстың үздік жаттықтырушысы болып танылған. Олимпиада қозғалысына қосқан үлесі үшін ҚР Ұлттық Олимпиада комитетінің дипломымен марапатталған.

Белгілі сәулетші Бақытжан Әшірбаевпен бірлесе отырып облыс басшылығына Оңтүстіктің ғана емес, бүкіл Қазақстанның басты қаруына айналатын ОҚО-дағы есу арнасының құрылысының жобасын ұсынбақпыз. Жоба эскизі дайын. Бұл еліміздегі алғашқы есу арнасы болмақ. 

Айта кету керек, екі жыл бұрын Бадам су қоймасында әмбебап есу кешені ашылған. Бұл оқиғаны оңтүстікқазақстандық спортшылар 20 жыл күткен болатын. Рио-де-Жанейрода өткен Олимпиада ойынына оңтүстікқазақстандық ескекшілер ең көп лицензияны жеңіп алғанын да ескеру қажет. Инчхонда өткен Азия ойындарында ОҚО өкілдері бес алтын жүлдені олжалады. Қазақстандағы жалғыз жастар арасында әлемнің бес дүркін жеңімпаздары ағайынды Емеляновтар екенін ерекше айтып өткеніміз жөн. 

Өсіп келе жатқан ескекшілердің бұдан да жоғары жетістіктерге жетуі үшін арнаны құру қажет. Бұл жерде Әлем кубогі, Азия чемпионаттарын өткізуге де болады. Бізге әлемнің спортшылары мен жанкүйерлері келіп, спорттық доданың көрігін қыздыруға қолайлы жағдай жасалады. Бұл жоба нәтижесінде облысымыздың туризмі қарқынды дамып, облысымызды жан-жақты насихаттауға болады. 2,5 шақырымға созылатын жарыс алаңымен қатар, волейбол ойнауға арналған алаң, кіші футбол, велосипед пен жүгіру кілемі, аквапарк, демалыс аймағына айналатын инфрақұрылымы жоғары деңгейдегі арна салынбақ. Жағажай аймағында суда мотоциклмен жүру, катамаран, скутер, су шаңғысы, парасейлинг секілді танымал суда демалу түрлері ұйымдастырылады. Аталған жоба инвестиция тартуға өте қолайлы. Жоба тек спортшыларға ғана емес, облысымыздың мыңдаған тұрғындары денешынықтыру және спортпен айналысып, тамаша демалыс сыйлауға жол ашады.

«Zhana Talap» спорттық-туристік агенттігі

Мекен-жайы: Шымкент қаласы, Жангельдин көшесі 8/48
Тел.: 8 7252 390 445, 8 7252 56 11 83, 8778 146 25 25
website: www.zhana-talap.com

Жұмыс уақыты: дүйсенбі-жұма: 09:00 - 19:00, сенбі: 09:00 - 15:00
e-mail: Этот адрес электронной почты защищён от спам-ботов. У вас должен быть включен JavaScript для просмотра.
instagram: @turfirma_zhana_talap

Халыққа жедел әрі сапалы қызмет көрсетеді

Осы аптада Шымкентте қос бірдей мамандандырылған Халыққа қызмет көрсету орталығы пайдалануға берілді. «Достық» шағынауданында орналасқан нысанның ашылу рәсіміне облыс басшысы Жансейіт Түймебаев пен қала әкімі Ғабидолла Әбдірахымов қатысты.

Ендігі жерде көлік құралдарын тіркеу және жүргізуші куәлігін беру қызметтері қолжетімді болмақ. Мамандандырылған орталықтағы теориялық және тәжірибелік емтихандарды тапсыру процестерін автоматтандыру адами факторларды толықтай жойып, оны барынша айқын етуге мүмкіндік береді. Сонымен қатар, мамандандырылған орталық қызметі азаматтардың уақытын үнемдеуде өте қолайлы. Енді автокөлікті электрондық кезек талонын алған сәттен бастап бір сағат ішінде тіркеуге болады. Ал жүргізуші куәлігін алуға теориялық және тәжірибелік емтиханды тапсыру уақытын қоса алғанда орта есеппен 2 сағат уақыт кетеді.

А, А1, В, В1, С, С1, D, D1 категориялары бойынша тәжірибелік емтиханды тапсыруға қажетті 3 жеңіл автокөлік, жүк көлігі, 2 автобус және 2 мотоцикл орталық меншігіне беріліп отыр. Мамандандырылған ХҚКО ғимаратында жүргізуші куәлігін алу үшін медициналық тексеруден өтуге болады.
Сондай-ақ, Жансейіт Түймебаев және Ғабидолла Әбдірахымов «Оңтүстік» шағынауданындағы (Қапал батыр көшесі, 4) №8 Халыққа қызмет көрсету орталығының салтанатты ашылу рәсіміне де қатысты.

Бүгінде Еңбекші ауданының 254 мыңнан аса тұрғыны бар. Аудан халқы үшін №8 ХҚКО арқылы 530 мемлекеттік қызмет түрі көрсетіледі. Оның ішінде электронды түрде 315 мемлекеттік және 215 дәстүрлі мемлекеттік қызмет түрі ұсынылады. Пилоттық жоба арқылы қосымша 53 мемлекеттік қызмет түрін көрсету жоспарланған.
Жаңа нысанда 25 қызметкер тұрақты жұмыспен қамтылып отыр. Аумағы 719 шаршы метрді құрайтын ғимараттың 40 автокөлікке арналған автотұрағы да бар.

Шымкент қаласындағы Shymkent Grand Hotel қонақүйінің қайта құру жұмыстары толық аяқталды. Сондай-ақ, қонақүй жанынан заманауи үлгідегі жаңа технологиямен жабдықталған «Saukele Ballroom» конференц-залы салтанатты түрде ашылды.

Жаңа нысанның тұсаукесеріне келген өңір басшысы Жансейіт Түймебаевты қала әкімі Ғабидолла Әбдірахымов пен қонақүйдің бас директоры Шыңғыс Әбдиев қарсы алды. 

– Жаңа жыл қарсаңында тағы да игі шараның тұсаукесеріне куә болдық. Облыс орталығы Шымкент қаласының көркеюіне еңбек сіңіріп жүрген жанашыр кәсіпкердің бірі – Шыңғыс Сейіткәрімұлының жаңа бастамаларына сәттілік тілейміз, – деді облыс әкімі құттықтау сөзінде.

Конференция залы – маңызды жиындар ұйымдастыру, жергілікті және халықаралық деңгейдегі инновациялық көрмелер өткізу, презентациялар жасау бағытында қызмет көрсетеді. Ауданы 1800 шаршы метрді құрайтын залдың сыйымдылығы 700 адамға арналған. Мұнда «KEBET» заманауи конференция жүйесі мен «Dynacord Cobra-2» музыкалық аудио-видео жабдықтары орнатылған. Нысанның ашылуымен қатар бұл жерде 50 адам жұмыспен қамтылды.

Бұдан кейін салтанатты іс-шараға жиналған қауым қонақүйдің жанынан құрылысы басталғалы тұрған жаңа аквапарктің жобасымен танысты. Сондай-ақ, облыс, қала басшылары «Фонтан» жаңа аквапаркінің капсуласын салу рәсіміне қатысты. Нысандардың құрылысын қаржыландырып отырған кәсіпкер Шыңғыс Сейіткәрімұлы аквапаркті пайдалануға беру мерзімін 2017 жылдың 1 маусымына жоспарланғанын айтты.

– Бұл инвестициялық жобаға 6 млрд-қа жуық қаражат жұмсалады. Олардың қатарына қазір ғана өңір басшысы капсуласын салған «Фонтан» аквапаркі де кіреді. Бұған дейін қонақүй жанында орналасқан субұрқақ ұзақ жыл қараусыз қалған болатын. Сол маңайды қайта түлету бағытында көп іздендік, зерттеп көрдік. Нәтижесінде 1,9 гектарды құрайтын жерге қала тұрғындарына арналған саялы орын салуды жөн деп таптық. Әзірге құрылыстың 25%-ы аяқталды. Ал негізгі жұмыстар 2017 жылы басталады. Жаз маусымы басталғанда пайдалануға береміз деген мақсат бар. Жалпы, Shymkent Grand Hotel қонақүй-ойын-сауық кешені болашақта 500-ге жуық адамды жұмыспен қамтамасыз етсе, қонақүй 120, конференц-зал 700, аквапарк бір күнде 1500 адамға дейін қызмет көрсететін болады, – деді ол журналистерге берген сұхбатында.

Жоба бойынша аквапаркте ересектерге және балаларға арналған 3 бассейн түседі. «Kanikaze», «Aquatube», «Body slide», «Black Hole», «Space hole» атты заманауи су төбешіктері ересектерге арналған аймақта орналасса, балаларға арналған бөлігінде су қалашығын тұрғызу жоспарланған.

Облыста көркемсурет галереясының жаңа ғимараты салынбақ. Бұл туралы облыс әкімі Жансейіт Түймебаев суретшілермен кездесуі барысында айтты.

Облыстық Бейнелеу өнері мұражайында болған кездесуге аймақ басшысы Суретшілер одағының мүшелерімен кездесіп, саладағы өзекті мәселелерді талқылады. Жиынға Қырғызстан Көркемөнер академиясының академигі, Мемлекеттік сыйлықтың иегері Ерболат Төлепбай қатысты. Ал Қазақстан Суретшілер Одағы облыстық филиалының директоры Нұрлан Шилібаев өнер адамдарының әлеуметтік жағдайын жасау мәселесін көтеріп, шығармашылықпен айналысатын жұмыс орнының жоқтығына алаңдаушылық білдірді. Сондай-ақ, жергілікті суретшілердің туындыларын аталған бейнелеу өнері музейінің қорына сатып алу жайын қозғап, түрлі тақырыпта жоспардан тыс жылына екі рет көрме ұйымдастыруды сұрады. 

Осынау проблемаларға қанық болған аймақ басшысы нарықтық экономика заманында әрбір азамат күні-түні жұмыс істеп, еліміздің көркеюіне атсалысу қажеттігіне назар аударды. Шығармашылық өкілдерінің жұмысын тек жергілікті деңгейде ғана емес, халықаралық дәрежеде көрме ұйымдастыру арқылы өткізу керектігін айтқан әкім облыста заманауи талаптарға сай жаңадан Оңтүстік Қазақстан облысының көркемсурет галереясының салынатынын жеткізді.

КӨЛІК КЕПТЕЛІСІН АЗАЙТАДЫ

«Оңтүстік» шағынауданынан қала орталығына қатынайтын жолаушылар енді жол қиындығын сезінбейтін болды. Үлкен шағынауданды қаланың орталығымен қосатын Қапал батыр көшесіндегі теміржол өткелінің көпірі пайдалануға берілді.

Құрылысы 2 жылға созылған нысанның ашылуына облыс әкімі Жансейіт Түймебаев, Шымкент қаласының әкімі Ғабидолла Әбдірахымов қатысты.

– Нысанды қайта құру жұмыстары барысында көпірдің, кірме жолдардың жүріс бөлігінің енін кеңейту, сыртқы жарықтандыру жұмыстары атқарылды. Нәтижесінде, Төле би, Қапал батыр, Ақназар хан, Анаров көшелеріндегі көлік кептелістерін азайтуға мүмкіндік туындады, – деді қала тұрғындарымен қуанышын бөліскен облыс әкімі Жансейіт Қансейітұлы.

Құрылыс жұмыстарын мердігер мекеме «Корпорация Береке А» ЖШС-і жүргізді. Өткелдің ұзындығы 170, кіреберіс ұзындығы 253 метрді құрайды. Жаңа көпірде 6 қозғалыс жолақтары орнатылған және өткел қабатының негізі темір бетонмен жабдықталған.

толықтай пайдалануға берілді

Қапал батыр көшесіндегі «Оңтүстік» шағынауданы мен қала орталығын байланыстыратын көпірдің құрылысы аяқталды. Көптен күткен жол өткелі 31 қазанда ашылды. Енді 6 жолақты теміржол өткелінен автокөліктер емін-еркін жүре бастады.

Көпірді қайта құру жұмыстары 2014 жылы басталған болатын. Естеріңізде болса, жүргізушілер мен жаяу жүргіншілердің қиналмауы үшін қала әкімдігі 1 қыркүйекте көпірдің бір бөлігін пайдалануға берген-ді. Енді міне, көпір толық аяқталып, ел игілігіне беріліп отыр.

Құрылысы екі жылға созылған көпірдің құрылысын «Береке А» корпорациясы жүргізді. Кеңес заманынан жөндеу көрмеген ескі өткелдің ұзындығы – 500, ал ені 24 метр. Айта кетсек, бұрын көпірдің ені 8 метр ғана болған. Онда кептеліс жиі болып, автокөлік апаттары да орын алатын.

«Оңтүстік» шағынауданы тұрғындарынан бөлек бұл жолдың ашылуын төлебиліктер де асыға күткен болатын. Жол кеңейтілгелі бері тұрғындардың қуанышында шек жоқ. Себебі, аудан тұрғындарын Шымкентке жалғайтын негізгі жол осы өткел еді.

ШЫМКЕНТТЕ ЖАҢА МЕМЛЕКЕТТІК ҚЫЗМЕТ
КӨРСЕТУ ОРТАЛЫҒЫ АШЫЛДЫ

Тұңғыш рет Шымкент қаласы әкімдігінің жанынан жаңа мемлекеттік қызмет көрсету орталығы – «Фронт-офис» ашылды.

Қаладағы Т.Рысқұлов көшесі №8А мекен-жайында орналасқан бұл офис бүгінде ТМД-дағы теңдесі жоқ жоба болып отыр. Мұнда қалалық әкімдік тарапынан көрсетілетін мемлекеттік қызметтердің барлық түрін бір жерден «Бір терезе» жүйесі арқылы ұсынады. 

Өңір басшысы Жансейіт Түймебаев пен қала әкімі Ғабидолла Әбдірахымовтың қатысуымен бірегей «Фронт-офис» жобасының лентасы қиылды. 

Сала жауаптыларының айтуынша мемлекеттік қызмет көрсетудің бұл түрі бизнес жүйесінің өкілдеріне сенім береді дейді. 

«Фронт-офис» жүйесі өтініш иесінің құжаттарын қабылдау кезінде арнайы бақылау коды арқылы беріліп, тіркеуге алынған құжат штрих код арқылы әкімдіктің тиісті бөліміне жөнелтіледі. Өтініш қысқа мерзімде қаралған соң, жауабы «Фронт-офиске» бағытталып, тұрғындарға беріледі немесе өтініш иесінің электронды мекен-жайына жіберіледі. Сондай-ақ өтініш иелері бақылау коды арқылы өтініштің қаралу барысы жөнінде мәлімет алуға мүмкіндігі бар.

Сонымен қатар қала тұрғындары бұл жобаға shymkent.gov.kz/frontoffice сайты арқылы кіруге немесе байланыс орталығының 545-545 телефонына қоңырау шалу арқылы ақпарат алуға болады. Бұл – ыңғайлы, жылдам әрі заман талабына сай қызмет түрі болып саналады.

Айта кетерлігі, бұл кеңседе 25-26 маман еңбек етіп, 100-ге жуық мемлекеттік қызмет түрін көрсететін болады деп жоспарланып отыр. Барлық өтініш, сұрақтарға ҚР Заңнамасында белгіленген мерзімде жауап берілетін болады.