Өткен жылы қаламызда әйелдер таксист қызметін көрсете бастағанда бәрімізге таңсық көрінді. «Қалай болар екен?» деп әліптің соңын бақтық.
«Ер азаматтың өзі белсене кірісе қоймайтын бұл кәсіпті әйелдер қалай игереді екен, оның жауапкершілігі мол емес пе?» дегендер де болды. Әсіресе, ерлер жағы таңданысын жасырмады. Бірақ, нәзік жандылар шымкенттіктердің үмітін ақтады. Олар бір жылдың ішінде өз ісінің шебері болып, жолаушыларын діттеген жеріне дер кезінде жеткізуде алдына жан салмайды. Солардың бірі –Зухра Разметова. – Такси қызметі жұмысын бастағанда бізге сенім білдіре қоймады. Көп ретте, әйелдер, жас қыздар шақыратын еді. Біртіндеп, ер кісілер де қызметімізді пайдаланатын болды. Өкінішке қарай,түнгі уақыт біз үшін қауіпті. Өйткені, жол ережесін сақтамай, бағдаршамның қызыл түсіне өтіп кететіндер көп. Әсіресе, жастар жағы ереже бұзады. Қазір біздің таксопаркімізде 7 қыз таксист болып жұмыс істейді, – дейді Зухра.