– Халық қашан да тұрақтылық пен татулықтың, өсіп-өркендеу мен бейбіт өмірдің қолдаушысы һәм жаршысы болып қала бермек, – дейді облыстық өзбек этномәдени орталығының басшысы Икрамжан Хашимжанов. – Ертеңіне деген сенімді көңілге ұялатқан Қазақстан халқы Ассамблеясының бастамасына өңірдің барлық этномәдени бірлестіктерінің бірауыздан қолдау көрсетуі – ынтымаққа ұйысқан елдің берекелі де бекем тірлігін айғақтайды. Елдің келешегін кемелді ете білер Нұрсұлтан Әбішұлының кандидатурасына қолдау таныта келген көпшіліктің ізгі ниеті осындай ортақ ойға саяды.
Форумға жиналғандар тәуелсіз қазақ елінің 20 жылдан астам уақытта қол жеткен биік белестерін ұлт көшбасшысы Нұрсұлтан Назарбаевтың сарабдал саясатының нәтижесімен байланыстырады. Бейбітшіліктің бесігіндей болған қазақ даласы бүгінде 100-ден астам ұлт пен ұлысты өзара ынтымақ пен татулық жағдайында үндесе ғұмыр кешіп келеді.
«Нұр Отан» партиясы қалалық филиалының төрағасы Өмірзақ Мелдеханов, облыстық мәслихат депутаты Әбілқасым Досболов және сөз кезегін алған өзге де азаматтар әлеуметтік - экономикалық тұрғыдан ел әлеуетінің жыл өткен сайын арта түсуі – Елбасының белгілеп берген ұзақ мерзімді стратегиялық бағыты мен түрлі бағдарламаларының айқын жемісі екеніне баса тоқталды. Өнер жұлдыздарының орындауындағы патриоттық рухта әуелеген әндер жиылған көпшіліктің көңіліне ерекше жігер беріп, дархан елдің еркін ұландары ретінде мақтаныш сезімін ұялата түсті.
Марат НАЗАРОВ
