Абай аудандық соты Ұлы Отан соғысының ардагерлеріне дастархан жайып, сый-құрмет көрсетті. Сот саласының қызметкерлері бұл іс-шараны 1 мамыр мерекесіне, Қазақстан халықтары Ассамблеясының 20 жылдығы және Ұлы Жеңістің 70 жылдығына орай өткізді.
Оған Абай ауданының әкімі А.Татыбаев, Абай аудандық сотының төрағасы Т.Бекімбетов, Абай ауданының прокуроры Ә.Мұстафаев қатысып, ардагерлерге арнап сөз сөйледі. Іс-шараны бастамас бұрын соғыстан қайтпаған боздақтардың рухына арналып Құран бағышталды. Мұнан соң сөзге шыққан азаматтар қазіргі ұрпақтың бейбітшіліктің арқасында бақытты ғұмыр кешіп отырғанын және қан майданда кеудесін отқа тосқан ардагерлеріміздің ерлігі жастарға үлгі екенін айтты.
Құрметпен шақырылғандардың бірі – ҰОС ардагері Абылай Қазыбаев. Соғысқа 1943 жылы аттанып, Курск түбінде шайқасып, жеңісті Кенисберг қаласында қарсы алған. Ал, 1950 жылдың сәуірінде Шымкентке оралып, қорғасын зауытында жұмыс істеген. Кеудесі орден мен медальға толы, 91 жасқа келген ақсақал сот қызметкерлерінің сый-құрметіне алғысын білдірді.
Айта кетейік, Абай ауданына қарасты 47 соғыс ардагері бар. Олардың 18-нің үйін әкімдік ағымдағы жөндеуден
өткізді.